Ngai nĩwe ũthuuraga namba nini ya Akristiano ehokeku arĩa thutha wa gĩkuũ kĩao makaariũkio matũũre kũrĩa igũrũ. (1 Petero 1:3, 4) Thutha wao gũthuurũo no mũhaka mathiĩ na mbere gũtũũra kũringana na ithimi cia Gĩkristiano cia wĩtĩkio na mĩtugo nĩguo matikage kwagĩrĩra gũkaaheo igai rĩao kũrĩa igũrũ.​—Aefeso 5:5; Afilipi 3:12-14.

Arĩa magathiĩ igũrũ magathiĩ gwĩka atĩa?

 Magatungata hamwe na Jesu marĩ athamaki na athĩnjĩri-Ngai kwa ihinda rĩa mĩaka 1,000. (Kũguũrĩrio 5:9, 10; 20:6) Magathondeka “igũrũ rĩerũ,” nĩrĩo thirikari ya igũrũ, ĩrĩa ĩgaathana igũrũ rĩa “thĩ njerũ,” nĩo andũ arĩa magaatũũra thĩ. Athani acio magaateithia harĩ gũcokeria andũ ũgima mũkinyanĩru wa mwĩrĩ, wa meciria, na wa kĩĩroho o ta ũrĩa Jehova aatanyĩte kĩambĩrĩria-inĩ.—Isaia 65:17; 2 Petero 3:13.

Nĩ aigana makariũkio mathiĩ igũrũ?

 Bibilia yonanagia atĩ andũ 144,000 nĩ makariũkio magatũũre kũrĩa igũrũ. (Kũguũrĩrio 7:4) Kĩoneki-inĩ kĩrĩa kĩandĩkĩtwo thĩinĩ wa Kũguũrĩrio 14:1-3, mũtũmwo Johana onire “Gatũrũme arũgamĩte kĩrĩma-inĩ gĩa Zayuni, arĩ hamwe na andũ ngiri igana rĩa mĩrongo ĩna na inya”. Kĩoneki-inĩ kĩu “Gatũrũme” arũgamĩrĩire Jesu ũrĩa wariũkirio. (Johana 1:29; 1 Petero 1:19) ‘Kĩrĩma gĩa Zayuni’ kĩrũgamĩrĩire itemi inene rĩa Jesu hamwe na arĩa 144,000 arĩa magaathamaka hamwe nake kũrĩa igũrũ.​—Thaburi 2:6; Ahibirania 12:22.

 Arĩa “metĩtwo na magathurũo” nĩguo magaathana na Kristo Ũthamaki-inĩ ũcio, metagwo “karũũru kanini.” (Kũguũrĩrio 17:14; Luka 12:32) Ũguo nĩ kuonania atĩ namba yao nĩ nini ĩkĩringithanio na namba nene ya ng’ondu ciothe cia Jesu.​—Johana 10:16.

Mawoni mahĩtanu megiĩ arĩa mathiaga igũrũ

 Mawoni mahĩtanu: Namba 144,000, ĩyo ĩgwetetwo thĩinĩ wa Kũguũrĩrio nĩ ya mũhaano, ti ya biũ.

 Ũrĩa kũrĩ: O na gũtuĩka ibuku rĩa Kũguũrĩrio nĩ rĩkoragwo na namba ihũthĩkaga na njĩra ya mũhaano, namba imwe rĩhũthagĩra nĩ cia biũ. Kwa ngerekano, ibuku rĩu nĩ rĩaragia ũhoro wa “marĩĩtwa ikũmi na merĩ ma atũmwo a Gatũrũme.” (Kũguũrĩrio 21:14) Rora wone ũira ũrĩa ũngĩtũma tuuge atĩ namba ĩyo 144,000 o nayo yagĩrĩirũo kuoywo ĩrĩ ya biũ.

 Ibuku rĩa Kũguũrĩrio 7:4 riugaga “mũigana wa andũ arĩa maahũũrirũo mũhũũri [a gũgathiĩ gũtũũra igũrũ], maarĩ ngiri igana rĩa mĩrongo ĩna na inya.” Mĩhari ĩrĩa ĩkuhanĩrĩirie na mũhari ũcio, nĩ yonanĩtie ũhoro wa gĩkundi gĩa kerĩ ngũrani na kĩu, kĩrĩa gĩtĩtwo “kĩrĩndĩ kĩnene kĩa andũ, arĩa gũtarĩ mũndũ ũngĩahotire kũmatara.” Acio a “kĩrĩndĩ kĩnene” o nao nĩ marahonokio nĩ Ngai. (Kũguũrĩrio 7:9, 10) Angĩkorũo namba 144,000 nĩ ya mũhaano, ĩkĩonania gĩkundi kĩnene gĩtangĩtarĩka, hatingĩkorũo na ngũrani harĩ ikundi icio cierĩ. a

 Makĩria ma ũguo, arĩa 144,000 mataarĩirio atĩ “maagũrirũo kuuma harĩ andũ matuĩke maciaro ma mbere.” (Kũguũrĩrio 14:4) Ciugo “maciaro ma mbere” ciaragĩrĩria gakundi kanini ka andũ mathuurĩtwo kuuma harĩ andũ angĩ. Irũgamĩrĩire na njĩra njega arĩa magaathamaka hamwe na Kristo kũrĩa igũrũ magĩthamakĩra mũigana ũtatarĩtwo wa raiya a gũkũ thĩ.​—Kũguũrĩrio 5:10.