MŨRŨ WA ITHE WITŨ Ernst * ũrĩa ũrĩ na mĩaka mĩrongo mũgwanja na kĩndũ oigire ũũ: “Nĩ ũndũ wa gũkorũo itarĩ na ũgima mwega wa mwĩrĩ ndihotaga gwĩka maũndũ maingĩ.” Wee nĩ ũiguaga ũguo? Angĩkorũo nĩ ũrathiĩ ũgĩkũraga na ũkaigua atĩ nĩ ũrathiĩ ũkĩũragwo nĩ hinya, no ũtaũkĩrũo wega nĩ ciugo iria irĩ thĩinĩ wa Kohelethu 12. Mũhari wa 1 wĩtaga mahinda ma ũkũrũ “matukũ ma ũũru.” O na kũrĩ ũguo, ti kuuga atĩ ũtũũro waku ũrĩkoragwo ũiyũirũo nĩ mathĩna na ruo. No kũhoteke ũkorũo na ũtũũro mwega na ũtungatagĩre Jehova ũrĩ na gĩkeno.

Athuri na atumia akũrũ arĩa maatungatagĩra Jehova matukũ-inĩ ma tene nĩ maacemanagia na moritũ o ta marĩa inyuĩ aarĩ na ariũ a Ithe witũ akũrũ mũracemania namo ũmũthĩ. Kwa ngerekano, Isaaka, Jakubu na Ahija nĩ moorire maitho nĩ ũndũ wa ũkũrũ. (Kĩam. 27:1; 48:10; 1 Ath. 14:4) Mũthamaki Daudi aakũra “ndaigana kũigua ũrugarĩ.” (1 Ath. 1:1) Barizilai mũthuri warĩ mũtongu mũno ndaacokire kũigua mũcamo mwega wa irio kana gũkenera mĩgambo ya nyĩmbo. (2 Sam. 19:32-35) Nao Iburahimu na Naomi maarĩ na ihooru mũno nĩ ũndũ wa gũkuĩrũo nĩ arĩa maahikanĩtie nao.—Kĩam. 23:1, 2; Ruth 1:3, 12.

Nĩ kĩĩ gĩateithirie o ũmwe wao gũikara arĩ mwĩhokeku harĩ Jehova na gũtũũria gĩkeno? Nĩ ũndũ wa Iburahimu kwĩhoka ciĩranĩro cia Ngai, o na arĩ mũkũrũ nĩ ‘aagĩire na hinya nĩ ũndũ wa gwĩtĩkia.’ (Rom. 4:19, 20) O na ithuĩ nĩ tũkũbatara gũkorũo na wĩtĩkio mũrũmu. Wĩtĩkio ta ũcio ndwĩhocetie harĩ mĩaka, ũhoti, o na kana ũrĩa mũndũ atariĩ. Kwa ngerekano, o na ihinda-inĩ rĩrĩa Jakubu orĩtwo nĩ hinya, akora maitho, na atangĩoimire ũrĩrĩ, nĩ onanirie wĩtĩkio mũrũmu harĩ ciĩranĩro cia Ngai. (Kĩam. 48:1-4, 10; Ahib. 11:21) Mwarĩ wa Ithe witũ Ines ũrĩa ũrĩ na mĩaka 93 nĩ athumbũragwo nĩ mũrimũ wa kwaga hinya marũngo. O na kũrĩ ũguo oigaga ũũ: “O mũthenya njiguaga Jehova andathimĩte mũno. Gũtirĩ mũthenya iteciragia ũhoro wa Paradiso. Ũndũ ũcio nĩ ũũheaga mwĩhoko.” Na githĩ ũcio ti mwerekera mwega!

Twĩkagĩra wĩtĩkio witũ hinya na njĩra ya kũhoya, gũthuthuria Kiugo kĩa Ngai, na gũthiĩ mĩcemanio ya Gĩkristiano. O na rĩrĩa aarĩ mũkũrũ, mũnabii Danieli aahoyaga Jehova maita matatũ o mũthenya na agathiĩ na mbere gũthoma Kiugo kĩa Ngai. (Dan. 6:10; 9:2) Nake Anna, ũrĩa warĩ mũtumia mũkũrũ wa ndigwa “ndoimaga hekarũ.” (Luk. 2:36, 37) Rĩrĩa rĩothe wahota gũthiĩ mĩcemanio na werutanĩria gũcokia ciũria, ũndũ ũcio ũgwĩkagĩra hinya na ũgekĩra andũ arĩa angĩ. Ningĩ hingo ciothe Jehova nĩ akenagio nĩ mahoya maku o na angĩkorũo ndũrahota kũhingia maũndũ maingĩ.—Thim. 15:8.

Inyuĩ andũ akũrũ no mwende gũkorũo na ũhoti mwega wa kuona, gũthoma, na wa gũthiĩ mĩcemanio, ĩndĩ mũkona atĩ no mũrathiĩ mũkĩremagĩrĩrwo o na kana mũkaremererwo biũ. Mũngĩka atĩa? Hũthagĩrai wega indo iria mũngĩkorũo nacio. Amwe arĩa matahotaga gũthiĩ mĩcemanio, nĩ mamĩthikagĩrĩria kũgerera thimũ. Ũhoti wa kuona wa mwarĩ wa Ithe witũ Inge ũrĩa ũrĩ na mĩaka 79 ũthiaga o ũgĩthũkaga. Nĩ ũndũ ũcio, aharagĩria mĩcemanio akĩhũthĩra maratathi marĩ na ndemwa nene biũ marĩa arutagĩrũo nĩ mũrũ wa Ithe witũ ũmwe wa kĩũngano kĩao kuuma kompiuta-inĩ.

No kũhoteke nĩ ũkoragwo na mahinda maingĩ gũkĩra andũ aingĩ. Na githĩ to ũhũthagĩre mahinda macio gũthikĩrĩria CD cia Bibilia, cia mabuku maitũ, cia mĩario na cia drama? Ningĩ no ũhũũragĩre Akristiano arĩa angĩ thimũ nĩguo ũmagaĩre kĩheo gĩa kĩĩroho na ‘mũũmanĩrĩrie.’—Rom. 1:11, 12.

Mwarĩ wa Ithe witũ Christa ũrĩa ũrĩ na mĩaka mĩrongo ĩnana na kĩndũ oigire ũũ arĩ na kĩeha: “Nĩ ũndũ ũrĩ ruo mũno kũremwo nĩ gwĩka maũndũ ũrahotaga gwĩka.” Gũkĩrĩ ũguo-rĩ, arĩa akũrũ mangĩtũũria gĩkeno kĩao atĩa? Mũrũ wa Ithe witũ Peter ũrĩa ũrĩ na mĩaka 75 oigire ũũ: “Nĩ na njĩra ya gũkorũo na mawoni  marĩa magĩrĩire, na kwaga gũikara ũgĩciragia ũhoro wa maũndũ marĩa ũtangĩhota gwĩka ĩndĩ ũgakenera marĩa ũrahota.”

Ta wĩcirie ũhoro wa njĩra cia kũhunjia iria ũngĩhũthĩra! Kwa ngerekano mwarĩ wa Ithe witũ Heidi ndahotaga gũthiĩ nyũmba kwa nyũmba ta ũrĩa eekaga tene. Arĩ na mĩaka mĩrongo ĩnana na kĩndũ nĩ eerutire kũhũthĩra kompiuta kwandĩkĩra andũ marũa. Andũ amwe akũrũ nĩ mambagĩrĩria ndeereti ya Bibilia na andũ maikarĩte itĩ-inĩ cia kũhurũka iria ikoragwo kũndũ kwa mũingĩ kana ceceni-inĩ ya mbathi. Ningĩ angĩkorũo ũikaraga thĩinĩ wa mũciĩ wa gũtumberia andũ akũrũ no ũhunjagĩrie arigitani arĩa magũtumberagia o hamwe na andũ angĩ.

Mũthamaki Daudi arĩ mũkũrũ nĩ kũrĩ maũndũ aahingirie ũthathaiya-inĩ mũtheru. Nĩ aarutire mĩhothi na akĩbanga ũrĩa hekarũ ĩgaakwo. (1 Maũ. 28:11–29:5) O nawe no wĩke o ũrĩa wothe ũngĩhota kũnyita mbaru wĩra wa Ũthamaki ũrĩa ũrathiĩ na mbere thĩinĩ wa thĩ yothe. Ningĩ no ũnyitage mbaru mapainia kana ahunjia angĩ kĩũngano-inĩ kĩanyu na njĩra ya kũmeera ciugo cia kũmekĩra ngoro, kũmahe kĩheo, kana kũnyuanĩra kĩndũ. Ningĩ mahoya-inĩ maku no ũririkanage andũ arĩa ethĩ, arĩa marĩ na famĩlĩ, ndungata cia hĩndĩ-ciothe, arĩa arũaru, na arĩa mehokeirũo maũndũ maritũ.

Wee nĩ wonagwo ũrĩ wa bata mũno o hamwe na ũtungata waku. Gũtirĩ hingo Ithe witũ wa igũrũ angĩtiganĩria arĩa akũrũ. (Thab. 71:9) Jehova nĩ amendete na nĩ amonaga marĩ a bata. Ihinda rĩtarĩ kũraihu ithuothe tũrĩtũũraga tene na tene, ĩndĩ tũtarĩ na kaũndũ o na kamwe karatũrehera ruo. Ithenya rĩa ũguo, tũgaakoragwo na hinya mũingĩ na ũgima mwega wa mwĩrĩ na tũthiĩ na mbere gũtungatĩra Jehova Ngai witũ ũrĩ wendo tene na tene!