Hihi Nĩ Ũraririkana?

Hihi nĩ ũthomete na kinyi icunjĩ cia ica ikuhĩ cia Mũrangĩri? Ta rora kana no ũhote gũcokia ciũria ici:

Tũngĩhota atĩa kũhoria mwaki wa rũrĩmĩ?

Twagĩrĩirũo gũthuthuria ngoro citũ ithuĩ ene. Handũ ha kwaria ũũru igũrũ rĩgiĩ mũrũ wa Ithe witũ-rĩ, githĩ ti kaba gũthuthuria kĩrĩa kĩratũma tũmuone ũguo? Hihi tũraaria ũũru igũrũ rĩake nĩguo tũoneke tũrĩ ega kũmũkĩra? Ningĩ-rĩ, kwaria ũũru igũrũ rĩake no gũthũkie maũndũ makĩria.​—8/15, karatathi ka 21.

Nĩ na njĩra ĩrĩkũ Ngai ohagĩra na akariganĩrũo nĩ mehia ma arĩa merirĩte?

Jehova oigaga ũũ igũrũ rĩgiĩ arĩa etĩkĩrĩte: “Mehia mao ndigacoka kũmaririkana o rĩ, o rĩ.” (Jer. 31:34) No ohere andũ mehia kũgerera mũthingi wa igongona rĩa ũkũri. Rĩrĩa eka ũguo, Ngai ariganagĩrũo na njĩra ya atĩ ndagacoka kũmaririkana rĩngĩ akĩenda kũherithia mũndũ ũcio.—10/1, karatathi ka 32.

O ũrĩa mũthenya wa Jehova ũrakuhĩrĩria-rĩ, nĩ maũndũ marĩkũ marĩĩkĩka?

Nĩ kũrĩanĩrĩrũo atĩ ‘nĩ kũrĩ thayũ na ũgitĩri!’ Ndũrĩrĩ nĩ ĩrĩtharĩkĩra na iniine Babuloni Ũrĩa Mũnene. Andũ a Ngai nĩ magaatharĩkĩrũo. Mbaara ya Hari–Magedoni ĩrũwo, Shaitani na ndaimono ciake macoke maikio irima rĩrĩa rĩtarĩ gĩturi.—9/15, karatathi ga 4.

Tũgunĩkaga atĩa nĩ kwaga kũmenya rĩrĩa mũthia ũgooka?

Kwaga kũmenya mũthenya kana ithaa nĩ gũtũmaga kĩrĩa kĩrĩ ngoro-inĩ citũ kĩmenyeke. Nĩ gũtũheaga mweke wa gũkenia ngoro ya Ngai. Gũgatwĩkĩra ngoro gũtũũra mũtũũrĩre wa kwĩima na gũgatũteithia kwĩhoka Ngai biũ o hamwe na Kiugo gĩake. Ningĩ nĩ gũtũmaga moritũ marĩa tũracemania namo matwagagĩrie.—9/15, karatathi ka 24-25.

Ngai akaarũnga maũndũ marĩa marehetwo nĩ mĩnyamaro ya andũ atĩa?

Ica ikuhĩ Ngai nĩ ekũrehe thĩ njerũ ĩrĩ na ũthingu ĩrĩa andũ arĩa megũthuura kuonania wendo harĩ andũ arĩa angĩ na harĩ Ngai magetĩkĩrio kũmĩtũũra. (2 Pet. 3:13) Arĩ Mũthamaki wa Ngai kũrĩa igũrũ, Jesu nĩ arĩrũnga maũndũ marĩa mathũkĩtio. (Isa. 33:24; Kũg. 21:4)—10/1, karatathi ka 7.

Nĩ a marũgamĩrĩirũo nĩ “njata mũgwanja” iria irĩ guoko-inĩ kwa ũrĩo kwa Jesu thĩinĩ wa Kũguũrĩrio 1:16, 20?

Irũgamagĩrĩra athuri arĩa aitĩrĩrie maguta kũgerera roho thĩinĩ wa ciũngano, o hamwe na athuri othe a ciũngano.—10/15, karatathi ka 14.

Ithimi imwe cia Bibilia iria itũteithagia kũmenya mawoni ma Ngai megiĩ ũhũthĩri wa thigara nĩ irĩkũ?

Ngai endaga tũtĩe muoyo. (Gũcok. 5:17) Erĩgagĩrĩra tũmwende na twende andũ arĩa angĩ. (Mar. 12:28-31) Endaga twĩtheme mĩtugo ĩtarĩ mĩtheru. (2 Kor. 7:1)—10/1, karatathi ga 15.

Jesu onanirie atĩa mwerekera wa wĩnyihia ũrĩa ũgwetetwo rĩandĩko-inĩ rĩa Isaia 50:4, 5?

Mĩhari ĩyo yugĩte atĩ ũrĩa ũrĩ na “rũrĩmĩ rũa andũ arĩa marutagwo maũndũ” ndarĩ hĩndĩ ‘angĩgacoka na thutha.’ Jesu nĩ onanirie mwerekera wa wĩnyihia, na agĩthikĩrĩria na kinyi maũndũ marĩa Ithe aamũrutaga. Aarĩ na wendi na nĩ eeharĩirie kwĩruta kuuma kũrĩ Jehova, na nĩ aabaraga na kinyi ũrĩa Ngai onagia andũ matarĩ akinyanĩru tha.—11/15, karatathi ga 11.

Tũgunĩkaga atĩa nĩ gwĩka andũ arĩa angĩ maũndũ ma ũtugi?

Rĩrĩa tweka andũ arĩa angĩ maũndũ ma ũtugi, nĩ tũkinyagĩrĩra kũmenya Ngai wega, na ũndũ ũcio nĩ ũtũmaga tũgĩe na gĩkeno. (1 Joh. 4; Mat. 5:7, 8) Makĩria ma ũguo, Jehova nĩ akenaga kuona andũ magĩka andũ arĩa angĩ maũndũ ma ũtugi. (Thim. 19:17)—10/1, karatathi ga 20.