MŨRŨ WA ITHE WITŨ ũmwe wa bũrũri wa Canada wĩtagwo Don nĩ erutanagĩria mũno kũhunjĩria andũ arĩa makomaga baranda-inĩ cia taũni. Ũhoro-inĩ wĩgiĩ mũndũ ũmwe ta ũcio, Don ataaragĩria ũũ: “Mũndũ ũmwe ũtaarĩ na gwa gũikara wetagwo Peter nĩwe mũndũ ũrĩa warĩ gĩko mũno ndanona ũikaraga baranda-inĩ. Aarĩ mũndũ mũũru ũtangĩendekire na wahotaga gũtũma andũ maikare haraihu nake. Hĩndĩ ciothe nĩ aaregaga ciĩko cia tha iria onagio nĩ andũ arĩa angĩ.” No Don nĩ eerutanĩirie kuonia mũndũ ũcio tha o rĩngĩ na rĩngĩ kwa ihinda rĩa mĩaka 14.

Mũthenya ũmwe Peter oririe Don ũũ: “Ũtindanagĩra na niĩ nĩkĩ? Andũ arĩa angĩ matitindanagĩra na niĩ. Wee ũnũmbũyagia nĩkĩ?” Don aahũthĩrire Maandĩko matatũ na njĩra ya ũũgĩ nĩguo akinyĩre ngoro ya Peter. Aambire akĩũria Peter kana nĩ oĩ atĩ Ngai nĩ arĩ rĩĩtwa, na akĩmũũria athome rĩĩtwa rĩu ĩmwe kwa ĩmwe kuuma Bibilia-inĩ thĩinĩ wa rĩandĩko rĩa Thaburi 83:18. Nĩguo Don onie Peter kĩrĩa gĩatũmaga amũrũmbũiye, aacokire akĩmwĩra athome rĩandĩko rĩa Aroma 10:13, 14 rĩrĩa rĩtaaragĩria atĩ “mũndũ o wothe ũkayagĩra rĩĩtwa rĩa Jehova nĩ akaahonokio.” Mũthia-inĩ Don agĩthoma Mathayo 9:36, agĩcoka akĩra Peter ethomere we mwene. Mũhari ũcio ugaga ũũ: “Rĩrĩa onire kĩrĩndĩ, [Jesu] akĩringwo nĩ tha tondũ nĩ gĩatihangĩtio na gĩgatiganĩrio ta ng’ondu itarĩ na mũrĩithi.” Athoma, Peter oririe Don ũũ arĩ na maithori: “Niĩ ndĩ ũmwe wa ng’ondu icio?”

Peter akĩambĩrĩria kũgarũrũka. Eethambire, akĩenja nderu ciake wega na agĩkĩra nguo njega iria Don aamũheire. Peter aathire na mbere gũikaraga arĩ mũtheru.

Peter nĩ aandĩkaga maũndũ marĩa ahĩtũkagĩra o mũthenya kabuku-inĩ. Maũndũ marĩa aandĩkĩte kĩambĩrĩria-inĩ gĩa kabuku kau maarĩ ma kĩeha, no rĩu nĩ aambĩrĩirie kwandĩka maũndũ ngũrani. Ũndũ ũmwe aandĩkĩte nĩ ũyũ: “Nĩ ndĩrutire rĩĩtwa rĩa Ngai ũmũthĩ. Hĩndĩ ĩrĩa ngũhoya, rĩu no hoyage Jehova. Nĩ ũndũ mwega mũno kũmenya rĩĩtwa rĩake. Don aroiga atĩ Jehova no atuĩke Mũrata wakwa wa hakuhĩ ũrĩa ũrĩkoragwo na ihinda rĩa gũthikĩrĩria o ũrĩa ingĩenda kũmwĩra na hĩndĩ o yothe.”

 Ciugo cia mũico cia Peter, aandĩkĩire mũrũ wa nyina na mwarĩ wa nyina. Aamandĩkĩire ũũ:

“Ndiraigua wega ũmũthĩ. Ngwĩciria ndĩ mũkũrũ mũno rĩu. No o na angĩkorũo ũyũ nĩguo mũthenya wakwa wa mũthia, nĩ njũĩ atĩ nĩ ngona mũrata wakwa [Don] rĩngĩ thĩinĩ wa Paradiso. Angĩkorũo nĩ mũrathoma ũhoro ũyũ, menyai ndirĩ ho rĩu. No mathiko-inĩ makwa mũngĩkona mũndũ mũtaramenya, mwarĩriei, na ndamũthaitha mũthome kabuku gaka ka mburuu [akĩaria ũhoro wa kabuku ga kwĩruta ũhoro wa Bibilia ka “Ma Ĩrĩa Ĩtongoragia Muoyo-inĩ wa Tene na Tene” karĩa aahetwo mĩaka ĩigana ũna mbere ĩyo]. * Koigĩte atĩ nĩ ngona mũrata wakwa rĩngĩ thĩinĩ wa Paradiso. Nĩ njĩtĩkĩtie ũguo na ngoro yakwa yothe. Nĩ niĩ mũrũ wa maitũ wanyu ũmwendete, Peter.”

Thutha wa mathiko, mwarĩ wa nyina na Peter wĩtagwo Ummi aataarĩirie ũũ: “Kĩndũ mĩaka ĩĩrĩ mĩhĩtũku, Peter nĩ aanjarĩirie. Rĩarĩ riita rĩa mbere kuona arĩ na gĩkeno thutha wa mĩaka mĩingĩ. O na nĩ aathekire hanini.” Ummi eerire Don ũũ: “Nĩ ngũthoma kabuku kau tondũ ũndũ o wothe ũngĩhutia mũrũ wa maitũ no mũhaka ũkorũo ũrĩ wa mwanya mũno.” Ningĩ Ummi nĩ eetĩkĩrire kwĩruta na Mũira wa Jehova ibuku rĩa ica ikuhĩ makĩria rĩa Bibilia Ĩrutanaga Atĩa Kũna?.

O na ithuĩ no twage kũrora tu o ũrĩa mũndũ atariĩ na nja, tuonanie wendo wa ma, na tũkorũo na wetereri kwerekera andũ a mĩthemba yothe. (1 Tim. 2:3, 4) Tũgĩka ũguo, no tũhote kũgucĩrĩria andũ arĩa mahaana ta Peter, marĩ na ngoro njega o na gũtuĩka no makorũo matekwendeka nĩ andũ. No tũkorũo na ma atĩ Ngai, ũrĩa ‘ũbaraga ngoro thĩinĩ,’ nĩ egũkũria ũhoro wa ma thĩinĩ wa ngoro cia arĩa marĩ na mwerekera mwega.—1 Sam. 16:7; Joh. 6:44.