“Ĩ Jehova, nĩ nginya hĩndĩ ĩ ngũtũũra ngũkayagĩra na ndũnjigue? Ndũire ngũkayagĩra nĩ ũndũ wa maũndũ ma ũhinya, nawe ũkaaga kũhonokania.” (Habakuku 1:2, 3) Icio nĩ ciugo cia Habakuku, mũthuri warĩ mwega wetĩkĩrĩkĩte nĩ Ngai. Hihi mathaithana make monanagia atĩ ndaarĩ na wĩtĩkio? Tiguo o na hanini! Ngai nĩ oomĩrĩirie Habakuku atĩ nĩ aatuĩte ihinda rĩrĩa angĩkaaniina mĩnyamaro.—Habakuku 2:2, 3.

Rĩrĩa ũranyamarĩka kana rĩrĩa mũndũ mwĩtainwo aranyamarĩka, nĩ ũhũthũ kuuga atĩ Ngai nĩ aikarĩte mũno angĩkoya ikinya, kana atĩ agĩrĩirũo gũkorũo ateithĩrĩirie. No rĩrĩ, Bibilia ĩtwĩraga ũũ: “Jehova ndekururagia kũhingia ciĩranĩro ciake ta ũrĩa andũ amwe meciragia, no nĩ kũmũkirĩrĩria amũkiragĩrĩria tondũ ndendaga mũndũ o na ũmwe akaaniinwo no endaga othe merire.”—2 Petero 3:9.

Ica ikuhĩ! Jesu oonanirie atĩ harĩ rũciaro rũngĩkeyonera maũndũ ma mwanya matiganĩte marĩa mangĩkonania matukũ ma kũrigĩrĩria ma ‘mũtabarĩre wa maũndũ.’ (Mathayo 24:3-42) Kũhinga kwa ũrathi wa Jesu matukũ-inĩ maya kũronania atĩ Ngai arĩ hakuhĩ kuoya ikinya gũkũ thĩ. *

No hihi Ngai akaaniina mĩnyamaro yothe atĩa? Rĩrĩa Jesu aarĩ gũkũ thĩ nĩ oonanirie atĩ Ngai arĩ na hinya wa kũniinĩra andũ mĩnyamaro. Wĩcirie maũndũ maya maigana ũna maronania ũguo.

Icanjama cia Ndũire: Rĩrĩa Jesu na atũmwo ake maaringaga Iria rĩa Galili, gatarũ kao kaarĩ hakuhĩ kũrikĩra nĩ ũndũ wa kĩhuhũkanio kĩnene. No Jesu nĩ oonanirie atĩ we o hamwe na Ithe no mahote gwatha mahinya ma ndũire. (Akolosai 1:15, 16) Jesu ooigire ũũ: “Horera na ũkire!” Moimĩrĩro maarĩ marĩkũ? “Rũhuho rũgĩtiga kũhurutana na gũkĩhoorera biũ.”—Mariko 4:35-39.

Mĩrimũ: Jesu nĩ ooĩkaine wega nĩ ũndũ wa ũhoti wake wa kũhonia atumumu na cionje, o hamwe na arĩa maanyamaragio nĩ kĩbaba, mangũ, kana ndwari ingĩ. Nĩ ‘aahonirie arĩa othe maarwarĩte.’—Mathayo 4:23, 24; 8:16; 11:2-5.

Ng’aragu: Jesu nĩ aahũthĩrire hinya ũrĩa aahetwo nĩ Ithe gũtũma irio ciarĩ nini cingĩhe. Bibilia yugaga atĩ maita merĩ hĩndĩ ya ũtungata wake, nĩ aaheire andũ ngiri nyingĩ irio.—Mathayo 14:14-21; 15:32-38.

Gĩkuũ: Maita matatũ marĩa Jesu aariũkirie andũ nĩ monanagia wega atĩ Jehova arĩ na ũhoti wa gũcokia andũ muoyo. Ũmwe wa acio maariũkirio aakoretwo e mũkuũ ihinda rĩa thikũ inya.—Mariko 5:35-42; Luka 7:11-16; Johana 11:3-44.