Tũũmbĩtwo Tũtũũre Tene na Tene
ITHUOTHE nĩ twendaga gũkenera ũtũũro mũraihu ũrĩ na gĩkeno. Ta hũũra mbica ũgĩtũũra tene na tene ũrĩ na ũgima mwega wa mwĩrĩ na gĩkeno! No tũkenere kũhũthĩra mahinda hamwe na endwa aitũ, tũceere kũndũ gũtiganĩte thĩinĩ wa thĩ, twĩrute maũndũ matiganĩte, tũgĩe na ũũgĩ wa maũndũ, na twĩrute na njĩra ndikĩru biũ maũndũ marĩa maratũkenia.
Hihi merirĩria ta macio nĩ magĩrĩire? Ĩĩ! Maandĩko matwĩraga atĩ Ngai nĩ ekĩrĩte merirĩria macio thĩinĩ witũ. (Kohelethu 3:11) Ningĩ moigaga atĩ “Ngai nĩ wendo.” (1 Johana 4:8) Hihi Ngai ũrĩ wendo no ekĩre merirĩria ma gũtũũra tene na tene thĩinĩ witũ akĩmenyaga atĩ gũtingĩhoteka tũtũũre tene na tene?
Ũrĩa kũrĩ nĩ atĩ, gũtirĩ mũndũ wendaga gũkua. O na Bibilia ĩtaga gĩkuũ “thũ.” (1 Akorintho 15:26) Amwe makuaga marĩ andũ anini na angĩ magakua marĩ akũrũ. No thutha mũtheri gĩkuũ no gĩũkaga. Andũ aingĩ nĩ metigagĩra gwĩciria ũhoro wa gĩkuũ. Hihi nĩ harĩ hĩndĩ thũ ĩyo ĩgaatoorio? Hihi ũndũ ũcio no ũhoteke?
ŨIRA ŨRĨA ŨTŨHEAGA MWĨHOKO
Hihi no ũmake kũmenya atĩ ndwarĩ muoroto wa Ngai andũ makuage? Ibuku rĩa Kĩambĩrĩria nĩ rĩkoragwo na ũira atĩ muoroto wa Ngai warĩ andũ matũũre tene na tene thĩinĩ wa thĩ. Jehova Ngai oombire thĩ ĩrĩ na indo ciothe iria andũ mabataraga nĩguo matũũre na gĩkeno tene na tene. Agĩcoka akĩũmba Adamu mũndũ wa mbere, na akĩmũiga mũgũnda-inĩ wa Edeni ũrĩa wahaanaga paradiso. Thutha ũcio, “Ngai akĩona indo iria ciothe oombĩte, na rĩrĩ! ciarĩ njega mũno.”—Kĩambĩrĩria 1:26, 31.
Ngai oombire Adamu na mũhianĩre wake, arĩ mũkinyanĩru. (Gũcokerithia Maathani 32:4) O na Hawa, mũtumia wa Adamu ndaarĩ na kawathe o gothe, aarĩ mũkinyanĩru mwĩrĩ na meciria. Jehova aamerĩte ũũ: “Ciaranai na mũingĩhe, mũiyũrie thĩ na mũmĩtoorie, mwathage thamaki cia iria-inĩ na ciũmbe iria ciũmbũkaga na kĩũmbe o gĩothe kĩrĩ muoyo gĩthiagĩra thĩ.”—Kĩambĩrĩria 1:28.
Kũiyũria thĩ na njiarũa ciao nĩ kũngĩoire ihinda. Hawa nĩ aangĩagĩire na ciana, nacio ciana icio iciare ciana ingĩ, nginya thĩ ĩiyũre biũ o ta ũrĩa Ngai aabangĩte. (Isaia 45:18) Hihi nĩ ũkuona ta Jehova aangĩerĩte Adamu na Hawa mahingie ũndũ ũcio korũo maarĩ matũũre o ihinda inini, hihi mone o ciana ciao na ciana cia ciana ciao macoke makue matekuona ũndũ ũcio ũkĩhinga?
Ningĩ ta wĩcirie wĩra ũrĩa aamaheete wa gwathaga nyamũ. Adamu eerĩtwo ahe nyamũ marĩĩtwa na ũndũ ũcio nĩ ũngĩoire ihinda. (Kĩambĩrĩria 2:19) No nĩguo ahote gũciatha nĩ aangĩabatarire kwĩruta ũhoro wacio na gũtaũkĩrũo ũrĩa aabatiĩ gũcirũmbũiya. Ũndũ ũcio nĩ ũngĩoire mahinda maingĩ makĩria.
Kwoguo watho ũrĩa Ngai aaheire Adamu na Hawa wa kũiyũria thĩ na gwatha nyamũ wonanagia atĩ moombĩtwo matũũre ihinda iraihu. Na ũrĩa kũrĩ nĩ atĩ, Adamu aatũũrire ihinda iraihu mũno.
MUOROTO WA NGAI WARĨ ANDŨ MATŨŨRE TENE NA TENE THĨINĨ WA PARADISO GŨKŨ THĨ
MAATŨŨRAGA IHINDA IRAIHU MŨNO
Adamu, mĩaka 930
Methusela, mĩaka 969
Nuhu, mĩaka 950
Ũmũthĩ, mĩaka 70-80
Bibilia yonanagia atĩ nĩ harĩ hĩndĩ andũ maatũũraga ihinda iraihu gũkĩra ũrĩa matũũraga mahinda-inĩ maya. Yugaga ũũ: “Matukũ mothe ma ũtũũro wa Adamu maarĩ mĩaka 930.” Ĩgacoka ĩkagweta arũme angĩ atandatũ arĩa maatũũrire makĩria ma mĩaka 900! Maarĩ Sethi, Enoshi, Kenani, Jaredi, Methusela, na Nuhu. Othe maatũũraga mbere ya Mũiyũro wa hĩndĩ ya Nuhu, Nuhu aatũũrire mĩaka 600 mbere ya Mũiyũro gũka. (Kĩambĩrĩria 5:5-27; 7:6; 9:29) Ũtũũro ta ũcio mũraihu ũguo wahotekaga atĩa?
Andũ acio othe maatũũraga hakuhĩ na ihinda rĩrĩa Adamu na Hawa maarĩ akinyanĩru. No kũhoteke kĩu nĩkĩo gĩatũmaga matũũre ihinda iraihu ũguo. No hihi ũkinyanĩru ũkonainie atĩa na gũtũũra ihinda iraihu? Na gĩkuũ gĩgaatoorio atĩa? Nĩguo tuone macokio ma ciũria icio, nĩ tũrabatara kwamba gũtaũkĩrũo kĩrĩa gĩtũmaga tũkũre na tũkue.
