MAWONI MA ANDŨ

Thĩinĩ wa ũndũire wa andũ amwe, gũkomania nja wa kĩhiko gũtionekaga arĩ ũũru, kaingĩ hĩndĩ ĩrĩa mũthuri nĩwe ũreka ũguo. Amwe nao mationaga kĩhiko ta kĩrĩ gĩa gũtũũra.

ŨRĨA BIBILIA YUGAGA

Bibilia yonanagia atĩ ũtharia nĩ gĩĩko kĩa ngomanio ya kwĩyendera kĩa mũthuri kana mũtumia ũrĩ thĩinĩ wa kĩhiko hamwe na mũndũ matahikanĩtie nake. (Ayubu 24:15; Thimo 30:20) Ngai nĩ athũire ũtharia mũno. Mũndũ angĩatharirie hĩndĩ ya Aisiraeli no kũragwo oragagwo. (Maũndũ ma Alawii 18:20, 22, 29) Jesu aarutanire atĩ no mũhaka arũmĩrĩri ake metheme ũtharia.—Mathayo 5:27, 28; Luka 18:18-20.

NĨKĨ ŨNDŨ ŨYŨ NĨ MŨRITŨ?

Mũndũ ũgũtharia akoragwo akiuna mwĩhĩtwa ũrĩa eehĩtire makĩhikania. Ningĩ gũtharia nĩ ‘kwĩhĩria Ngai.’ (Kĩambĩrĩria 39:7-9) Ũtharia no wamũranie ciana na aciari na njĩra ya gũtuurithia mũno. Bibilia yugaga atĩ “atharania nĩ Ngai ũkamatuĩra ituĩro.”—Ahibirania 13:4.

“Ũhoro wa kũhikania nĩwĩkĩrĩrũo nĩ andũ othe, na gũkomania kwa arĩa mahikanĩtie nĩgũtuwo ũndũ mũthingu.”—Ahibirania 13:4.

ŨRĨA BIBILIA YUGAGA

Bibilia nĩ ĩtĩkĩrĩtie mũndũ ũrĩ thĩinĩ wa kĩhiko kũniina kĩhiko gĩake angĩkorũo ũrĩa mahikanĩtie nake nĩ atharĩtie. (Mathayo 19:9) Ũguo nĩ kuuga atĩ, ũrĩa ũtarĩ na mahĩtia ma ũtharia arĩ na kĩhooto gĩa kwĩyamũrĩra kana nĩ egũthiĩ na mbere gũtũũrania na ũrĩa ũtharĩtie kana nĩ ekũmũtiga. Itua rĩu nĩ rĩa mũndũ kĩũmbe.—Agalatia 6:5.

O na kũrĩ ũguo, kũringana na Ngai, kĩhiko nĩ gĩtheru na nĩ gĩa gũtũũra. (1 Akorintho 7:39) Ngai nĩ athũire mũndũ ũgũtigana na ũrĩa mahikanĩtie nake nĩ ũndũ wa itũmi itarĩ na kũrĩa irĩ, ta hihi mũndũ kũigua atekũiganĩra nĩ ũrĩa mahikanĩtie nake. Kwoguo, itua rĩa gũtigana nĩ iritũ.—Malaki 2:16; Mathayo 19:3-6.

“Ngũmwĩra atĩrĩ, atĩ o mũndũ ũrĩa ũngĩte mũtumia wake, tiga o ũndũ wa ũtharia, nĩegũtũma atuĩke mũtharia.”—Mathayo 5:32.

ŨRĨA BIBILIA YUGAGA

Ĩĩ. Bibilia yugaga atĩ Ngai nĩ ohagĩra arĩa meriraga na makagarũrũka na magatigana na mehia mao, o hamwe na ma ũtharia. (Atũmwo 3:19; Agalatia 5:19-21) Bibilia o na nĩ yarĩtie ũhoro wa athuri na atumia arĩa maanatigana na ũtharia na thutha-inĩ magĩtuĩka arata a Ngai.—1 Akorintho 6:9-11.

Ngai nĩ oheire Mũthamaki Daudi wa Isiraeli. Daudi aatharirie na mũtumia wa mũthigari ũmwe wa mbũtũ yake. (2 Samueli 11:2-4) Bibilia yugaga cararũkũ atĩ “ũndũ ũcio Daudi ekĩte nĩwarakaririe Jehova” mũno. (2 Samueli 11:27) Daudi nĩ eeririre thutha wa kũrũngwo na Ngai akĩmuohera. O na kũrĩ ũguo no mũhaka Daudi angĩakundire ruo rwa moimĩrĩro ma mahĩtia make. (2 Samueli 12:13, 14) Thutha-inĩ, Mũthamaki Suleimani ũrĩa warĩ mũũgĩ oigire atĩ “mũndũ wa gũtharia . . . nĩ kwaga aagĩte wĩcirio.”—Thimo 6:32.

ŨRĨA ŨNGĨKA

Angĩkorũo nĩ ũtharĩtie, nĩ ũkũbatara kũria Ngai na ũrĩa mũhikanĩtie nake makuohere. (Thaburi 51:1-5) Thũũra ũtharia o ta ũrĩa Ngai aũthũire. (Thaburi 97:10) Wĩhotore gwĩthema ponografĩ, gũcumĩkĩra ngomanio, gũthakĩra mũndũ mũtahikanĩtie, kana ũndũ ũngĩ o wothe ũngĩtũma wĩrirĩrie ngomanio na mũndũ ũngĩ tiga ũrĩa mũhikanĩtie nake.—Mathayo 5:27, 28; Jakubu 1:14, 15.

Angĩkorũo ũrĩa mũhikanĩtie nake nĩwe ũtharĩtie, ririkana atĩ Ngai nĩ aramenya ũrĩa ũraigua. (Malaki 2:13, 14) Mũhoe akũũmĩrĩrie na agũtongorie na nĩ ‘egũgũtiirĩrĩra.’ (Thaburi 55:22) Angĩkorũo ũgũtua kuohera ũrĩa mũhikanĩtie nake na mũthiĩ na mbere gũtũũrania thĩinĩ wa kĩhiko, o inyuerĩ nĩ mũkũbatara gwĩkĩra kĩyo harĩ gwaka rĩngĩ kĩhiko kĩrũmu.—Aefeso 4:32.

Rĩrĩa Daudi eeririre thutha wa gũtharia, mũnabii Nathani aamwĩrire ũũ: “Jehova nĩakwehereirie wĩhia ũcio waku.”—2 Samuel 12:13.