Twĩre ũhoro wĩgiĩ mũrerere waku.

Ndaciarirũo mwaka wa 1979 bũrũri-inĩ wa Amerika (US). Ndĩ na mĩaka ĩtatũ aciari akwa nĩ maatiganire. Mami aanderire kũringana na ũndũire wa Kĩyahudi na akĩndwara cukuru cia Kĩyahudi. Rĩrĩa ndarĩ na mĩaka mũgwanja, nĩ twathamĩire Israel ihinda rĩa mwaka ũmwe na ndathiaga cukuru yarĩ gĩcagi-inĩ kĩa andũ maarutaga wĩra hamwe gĩtagwo kibbutz. Thutha ũcio nĩ twathamĩire Mexico twĩ na mami.

O na gũtuĩka gũtiarĩ na thunagogi kũrĩa twaikaraga, nĩ ndarũmagĩrĩra ũndũire witũ wa Kĩyahudi. Nĩ ndakagia mĩcumaa mũthenya wa Thabatũ, ngathoma maandĩko ma Kĩyahudi, na ngahoya ngĩhũthĩra ibuku rĩa mahoya. Ndĩ cukuru nderaga arĩa twathomaga nao atĩ ndini itũ nĩyo yarĩ ya mbere biũ. Ndiathomete mabuku marĩa metagwo Kĩrĩkanĩro Kĩerũ, marĩa maragia mũno ũhoro wa ũtungata wa Jesu Kristo na morutani make. O na mami nĩ aanganĩtie gũthoma mabuku macio tondũ oonaga ta wĩtĩkio wakwa ũngĩthũkio nĩ morutani mamo.

Nĩ kĩĩ gĩatũmire wende gũthoma Kĩrĩkanĩro Kĩrĩa Kĩerũ?

Ndakinyia mĩaka 17, nĩ ndacokire Amerika (US) nĩgetha ngarĩkie gĩthomo. Ndĩ kũu, mũrata wakwa warĩ Mũkristiano aanjĩrire atĩ ũtũũro wakwa ndũngĩkorũo na muoroto angĩkorũo ndiĩtĩkĩtie Jesu.

Na niĩ ngĩmwĩra, “Andũ arĩa metĩkĩtie Jesu nĩ morĩte njĩra.”

Akĩnjũria, “Ũrĩ wathoma Kĩrĩkanĩro Kĩrĩa Kĩerũ?”

Ngĩmwĩra, “Aca.”

Nake akĩnjũria, “Nĩ ũrona ta arĩ wega kũheana mawoni megiĩ ũndũ o na ũtoĩ ũhoro waguo?”

Ciugo icio ciake nĩ ciahutirie ngoro mũno, tondũ nĩ ndonaga ti wega mũndũ kũruta mawoni megiĩ ũndũ atoĩ. Nĩ ũndũ wa kũigua njonokete, ndainũkire na Bibilia yake na ngĩambĩrĩria gũthoma Kĩrĩkanĩro Kĩrĩa Kĩerũ.

Wahutirio atĩa nĩ maũndũ marĩa wathomire?

Nĩ ndamakire kũmenya atĩ andĩki a mabuku ma Kĩrĩkanĩro Kĩerũ maarĩ Ayahudi. Ningĩ o ũrĩa ndathomaga, noguo ndonaga atĩ Jesu aarĩ Mũyahudi mũtugi na mwĩnyihia, wendaga gũteithia andũ no ti kũmahũthĩra ũũru. O na nĩ ndathiaga library ngahoya mabuku marĩa mararia ũhoro wake. No gũtirĩ o na rĩmwe rĩatũmire njĩtĩkie atĩ Jesu nĩwe warĩ Mesia. Mamwe maaugaga atĩ nĩwe Ngai, na ndionaga ũndũ ũcio ũrĩ wa ma. Angĩkorũo Jesu nĩ Ngai-rĩ, eerekagĩria mahoya make kũrĩ we mwene? Makĩria ma ũguo, Jesu nĩ aakuire. No Bibilia yugaga ũũ igũrũ rĩgiĩ Ngai: “Ndũkuaga.” *

Wonire atĩa macokio ma ciũria icio?

Ũhoro wa ma ndwĩbingaga, na nĩ ndatuĩte itua rĩa gũcaria ũhoro wa ma. Kwoguo ngĩhoya Ngai kuuma ngoro na ngĩrĩraga, na nĩrĩo rĩarĩ riita rĩa mbere kũhoya itekũhũthĩra ibuku rĩa mahoya. Ndarĩkia kũhoya o ũguo, ngĩigua mũrango waringaringwo. Ndahingũra ngĩkora Aira a Jehova erĩ. Maaheire ibuku rĩmwe maahũthagĩra kũrutana Bibilia. Ibuku rĩu, hamwe na ndeereti iria twacokire kũgĩa nacio hamwe nao, nĩ ciatũmire njĩtĩkie atĩ wĩtĩkio wao uumanĩte na Bibilia. Kwa ngerekano, Aira a Jehova metĩkĩtie atĩ Jesu nĩ “Mũrũ wa Ngai” * na “kĩambĩrĩria kĩa ũũmbi wa Ngai,” * no ti gĩcunjĩ kĩa Ũtatũ.

Kahinda kanini thutha ũcio, nĩ ndacokire Mexico, na ngĩthiĩ na mbere kwĩruta morathi megiĩ Mesia hamwe na Aira a Jehova. Nĩ ndamakire kuona ũrĩa morathi macio marĩ maingĩ! O na kũrĩ ũguo, ndarĩ o na nganja hanini. Ndeyũragia: ‘Jesu nowe wahingirie morathi macio?’ na ngeyũria, ‘Ĩ angĩkorũo no gwĩtua eetuaga?’

Nĩ kĩĩ gĩatũmire nganja ciaku ithire?

Aira a Jehova nĩ maanyonirie morathi, na ngĩona atĩ gũtirĩ mũndũ ũngĩtua na njĩra ta ĩyo. Kwa ngerekano, mĩaka 700 mbere ya Jesu gũciarũo, mũnabii Mika nĩ aaugĩte atĩ Mesia angĩgaciarĩrũo Bethilehemu ya Judea. * Hihi nĩ kũrĩ mũndũ ũngĩthuura kũrĩa egũciarĩrũo? Isaia aandĩkĩte atĩ Mesia angĩoragirũo arĩ mwĩki-naĩ, no angĩathikirũo hamwe na andũ atongu. * Jesu nĩ aahingirie morathi macio mothe.

Ũndũ wa mũico ũrĩa watũmire nganja ciakwa ithire nĩ ũhoro wĩgiĩ rũciaro rũrĩa Jesu aaumanire naruo. Bibilia yaugĩte atĩ Mesia angĩgakorũo arĩ wa rũciaro rwa Mũthamaki Daudi. * Tondũ Ayahudi nĩ maaigaga rekondi ciao kĩũmbe na cia mũingĩ ciĩgiĩ ndĩra ciao, korũo Jesu ndaarĩ wa rũciaro rwa Daudi thũ ciake nĩ ingĩaugire ũndũ ũcio. No itiaugire ũguo tondũ gũtirĩ mũndũ ũngĩakararirie atĩ Jesu aarĩ wa rũciaro rwa Daudi. O na andũ maamwĩtaga “Mũrũ wa Daudi.” *

Mwaka wa 70 M.M.—mĩaka 37 thutha wa Jesu gũkua, mbũtũ cia Roma nĩ cianangire Jerusalemu, na rekondi cia ndĩra ikĩũra kana igĩthũkio. Kwoguo nĩgetha Mesia amenyeke aaumanĩte na rũciaro rũrĩkũ, no mũhaka angĩokire mbere ya mwaka wa 70 M.M.

Kũmenya maũndũ macio gwakũhutirie atĩa?

Thĩinĩ wa Gũcokerithia Maathani 18:18, 19, nĩ kwarathĩtwo atĩ Ngai nĩ angĩkarahũra mũnabii ũtariĩ ta Musa thĩinĩ wa Isiraeli. Ngai aaugĩte ũũ: “No mũhaka ngooria mũndũ ũrĩa ũtagathikĩrĩria ciugo ciakwa iria mũnabii ũcio akaaria na rĩĩtwa rĩakwa.” Gũthoma Bibilia yothe na njĩra ndikĩru nĩ gwatũmire ngorũo na ma atĩ Jesu wa Nazarethi nĩwe warĩ mũnabii ũcio.