Naduh ki por hyndai, U Jehobah u kwah ba kawei pa kawei ka longïing kan ïa pynlut por lang ban tei ïa ka jinglong mynsiem bad ban pynskhem ïa ka longïing longsem jong ki. (Deuteronomi 6:6, 7) Na kata ka daw, ki Nongsakhi U Jehobah ki buh kyrpang ïa ka por ban ïa mane lang man la ka taïew. Kumba ïa shongkai, ki ïasylloklang shaphang kiei kiei kiba kynja mynsiem katkum ki jingdonkam jong ki. Lada phi sah marwei ruh, phi lah ban pynlut ïa kum kita ki por bad U Blei da kaba pule bniah ïa ka Baibl katkum ki phang ba phi jied.

Ka dei ka por ban kham jan sha U Jehobah. “To wan hajan ia U Blei, te un wan hajan ia phi.” (Jakob 4:8) Ngin ïoh ban tip kham bha ïa U Jehobah da kaba pule bniah shaphang ki jinglong bad ki kam jong u lyngba ka Ktien jong u, ka Baibl. Ban kham pynsuk ïa ka jingïamane shiïing phi lah ban ïa pule jam lang ïa ka Baibl shiphang, lehse da kaba bud ïa ka prokram ba la buh lypa man la ka taïew ha ka Jingïalang ka Jingim bad ka Kam Ïalap. Baroh ki dkhot jong ka ïing ki lah ban pule lang mar khyndiat, nangta baroh ki lah ban ïasam ïa kaei kaba ki sngewthuh.

Ka dei ka por ban kham ïa jan shiïing shisem. U lok bad ka lok, kumjuh ruh ki kmie ki kpa bad ki khun, ki lah ban pynskhem ïa ka jingïadei hapdeng jong ki da kaba pule lang ïa ka Baibl. Ka dei ban long ka por ka basuk bakmen bad kaba ki ïa khmih lynti man la ka taïew. Ki kmie ki kpa ki lah ban jied ïa ki phang katkum ki rta ba ïa dei bad ki khun jong ki, lehse da kaba jied ïa ki phang na ka Kut Ap Phira bad To Sharai! (ha ka phareng) ne na ka website jong ngi, ka jw.org. Balei phim peit ïa ka prokram ba la pyni ha JW Broadcasting (tv.jw.org) bad ïasyllok lang hadien? Phi lah ban ïa kren shaphang ka jingeh ba ki khun jong phi ki shem bad kumno ban tehlakam ïa ki. Phi lah ban rwai ïa kito ki jingrwai kiba phin sa rwai ha ki jingïalang bad nangta, phi lah ban ïa dih sha sngewbha.

Kane ka por kaba kyrpang kaba phi ïa mane lang ïa U Jehobah kan ïarap ïa ka ïing ka sem baroh kawei ban sngewtynnad ban pule ïa ka ktien U Blei, bad U Jehobah un theh kyrhai ïa ki jingkyrkhu halor jong phi.​—Salm 1:1-3.

• Balei ngi buh por kyrpang ban ïa mane lang shiïing shisem?

• Kumno ki kmie ki kpa ki lah ban pynlong ïa kane ka por kaba kmen na ka bynta baroh shiïing?