Ka Baibl ka kren shaphang ar tylli ki kynhun jong ki rangbah Khristan kiba sharai ïa ka balang​—‘ki nongsharai bad ki nongïarap hapoh ka balang.’ (Philipi 1:1) Khambun sien, ha kawei pa kawei ka balang don katto katne ngut ki para bangeit shynrang kiba shakri kum ki nongïarap balang. Kaei ka kamram jong ki nongïarap?

Ki ïarap ïa ka kynhun ki rangbah balang. Ki nongïarap balang ki long kiba shitrhem, kiba lah ban shaniah bad kiba tipbriew; don na ki kiba dang samla bad kiba la rangbah. Ki peit ïa ki kam ba donkam ba dei ban leh man la ka por ha ka balang. Kane ka ailad ïa ki rangbah balang ba kin ïoh ban peit ïa ka kam hikai bad ban sharai.

Ki ai jingshakri bapher bapher. La bynta ïa katto katne ngut ki nongïarap balang ban pdiang sngewbha ïa kito kiba poi sha ki jingïalang. Kiwei pat ki lah ban peit ïa ki tiar pynsawa, ïa ki jingkheiñ-jingdiah ha ka balang, ban sam ïa ki kot ki sla bad ban bynta ïa ki jaka ha ki dkhot ka balang ba kin leit ïalap. Ki ïarap ruh ha ka ban pynbha ïa ka Ïing Hima. Ki rangbah balang ki lah ruh ban phah ïa ki ban ïarap ïa kiba la tymmen. Ki nongïarap balang ki kloi ban pdiang ïa kano kano ka kam katba phah bad kane ka pynlong ïa ka balang baroh kawei ban burom ïa ki.​—1 Timothi 3:13.

Ki pyni ka nuksa babha kum ki Khristan. La jied ïa ki nongïarap balang naba ki don ka jinglong Khristan babha. Ka jingshim bynta jong ki ha ki jingïalang ka pynskhem ïa ka jingngeit jong ngi. Ka nuksa babha jong ki ha ka kam ïalap ka pynlong ïa ngi ban shitrhem. Namarba ki ïatyllilang bad ka kynhun ki rangbah balang ka wanrah ïa ka jingkmen bad jingïatylli. (Ephesos 4:16) Katba dang ïaid ka por, ki ruh ki lah ban shimti kum ki rangbah balang.

• Ki nongïarap balang ki dei ki briew kiba kumno?

• Kumno ki nongïarap ki ïarap ïa ka balang ba kan ïaid beit?