Ym kum kiwei pat ki briew, shuwa ba yn kha ïa u Jisu ha pyrthei u la im ha bneng kum u angel. (Ioannis 8:23) U la long u jingthaw banyngkong jong U Blei bad u la ïarap ha ka ban thaw ïa kiwei pat ki jingthaw. Dei tang ïa u Jisu ba U Jehobah u la thaw hi da lade. Namarkata la khot ïa u “u khun ba la kha marwei” jong U Blei. (Ioannis 1:14) U Jisu u la long u nongkren jong U Blei, namarkata la khot ïa u “U Ktien.”—Pule Proberb 8:22, 23, 30; Kolossai 1:15, 16.

U Blei u la phah ïa la u khun sha ka pyrthei da kaba pynkynriah ïa ka jingim jong u sha ka kpoh jong ka theisotti kaba kyrteng ka Mary. Kumta, u kpa jong u Jisu dei U Blei, ym u briew. (Loukas 1:30-35) U Jisu u la wan sha ka pyrthei (1) ban hikai ïa ngi ïa ka jingshisha shaphang U Blei, (2) ban pyni nuksa ïa ngi kumno ban leh ïa ka mon jong U Blei wat hapdeng ki jingeh bad (3) ban aiti ïa la ka jingim ba janai kum ka “jingsiewspah.”—Pule Mathaios 20:28.

Ka jingsiewspah ka dei ka dor ba la siew ban pyllait ïa u briew na ka jingbyrngem ban pynïap. (Eksodos 21:29, 30) Ka jingïap bad ka jingtymmen kim don bynta ha ka jingthmu jong U Blei ïa u briew. Kumno ngi tip ïa kata? U Blei u la ong ïa u Adam ba lada u leh “pop” un sa ïap. Te lada u Adam u khlem leh pop haduh mynta un dang im. (Jenesis 2:16, 17; 5:5) Katkum ka Baibl, ka jingïap ka la “bsut” ne rung  ha ka pyrthei lyngba u Adam. Lyngba u Adam ka pop bad ka jingïap ka la hiarpateng ha ngi ki briew. Na kata daw ngi donkam ïa ka jingsiewspah ban pyllait ïa ngi na ki saikhum jong ka jingïap kaba ngi la ïoh na u Adam.—Pule Rom 5:12; 6:23.

Mano ba lah ban siew ïa ka jingsiewpah ban pyllait ïa ngi na ka jingïap? Haba ngi ïap ngi siew tang ïa ka kuna na ka bynta ki pop la jong. Ym don uwei ruh u ba lah ban siew na ka bynta ki pop jong kiwei.—Pule Salm 49:7-9.

Ym kum ma ngi, u Jisu u long u bajanai. Um donkam ban ïap na ka bynta la ki pop, namar um ju leh pop. Hynrei u la ïap na ka bynta ki pop jong kiwei. U Blei u la pyni ka jingieit ba kyrpang ïa u bynriew da kaba phah ïa la u khun ban ïap na ka bynta jong ngi. U Jisu ruh u la pyni ba u ieit ïa ngi da kaba u kohnguh ïa la u kpa bad aiti ïa la ka jingim namar ki pop jong ngi.—Pule Ioannis 3:16; Rom 5:18, 19.

Peit ïa ka video Balei U Jisu U La Ïap?

Ha ka por ba u don ha pyrthei, u Jisu u la pynkoit ïa kiba pang, pynmihpat ïa kiba ïap bad u la pyllait ïa ki briew na ka jingma. U la pyni nuksa ba kumno un sa leh ha ka lawei na ka bynta ki briew kiba kohnguh. (Mathaios 15:30, 31; Ioannis 5:28) Hadien ba u Jisu u la ïap, U Blei u la ai biang ha u ïa ka jingim ba kynja mynsiem. (1 Petros 3:18) Nangta u Jisu u la ap ha ka kti kamon jong U Blei haduh ba U Jehobah u la aibor ïa u ban synshar kum u syiem ha ka pyrthei baroh kawei. (Hebru 10:12, 13) Mynta u Jisu u synshar kum u Syiem ha bneng, bad ki nongbud jong u ha satlak ka pyrthei ki ïa pynbna ïa kata ka khubor babha.—Pule Daniel 7:13, 14; Mathaios 24:14.

Shen, u Jisu un sa pyndonkam ïa la ka bor kum u Syiem ban pynkut ïa ki jingjynjar baroh lem bad ïa kito kiba pynlong ïa ki. Baroh kiba ngeit ha u Jisu bad kiba kohnguh ïa u kin im junom ha ka jingkmen ha paradais.—Pule Salm 37:9-11.