Lynnong 10
Kumno Phi Lah Ban Ithuh ïa ka Jingmane Bashisha?
1. Hato don tang kawei ka niam bashisha?
“To sumar na ki nongiathuhlypa balamler.”—MATHAIOS 7:15.
U Jisu u la hikai ïa la ki nongbud ba don tang kawei ka niam, ka niam bashisha. Ka long kum ka lynti kaba ïalam sha ka jingim bymjukut. U Jisu u la ong, “ki long khyndiat ruh kiba shem ia kata” ka lynti. (Mathaios 7:14) U Blei u pdiang tang ïa ka jingmane kaba ïahap bad ka Baibl. Baroh ki nongmane bashisha ki ïatylli lang ha kawei ka jingngeit.—Pule Ioannis 4:23, 24; 14:6; Ephesos 4:4, 5.
Peit ïa ka video Hato U Blei U Pdiang Ïa Ki Jingmane Baroh?
2. U Jisu u ong aïu shaphang ki Khristan balamler?
“Ki phla ba ki tip ia U Blei; hynrei ha la ki kam ki len ia u.”—TITOS 1:16.
U Jisu u la maham ba ki nongïathuhlypa balamler kin pynpyut ïa ka jinglong Khristan. Na shabar i kumba ki dei ki nongmane bashisha. Ki balang jong ki, ki kam ba ki dei ki Khristan. Hynrei phi lah ban ithuh ïa kum kita ki briew. Kumno? Tang ka jingmane bashisha ka sei ki soh babha, ki briew ki lah ban ithuh ïa ki Khristan bashisha da ki jinglong bad ki jingleh babha jong ki.—Pule Mathaios 7:13-23.
3. Kumno phi lah ban ithuh ïa ki nongmane bashisha?
To peit bniah ïa kine ki san tylli ki dak kiba pynshisha:
-
Ki nongmane bashisha ki niewkor ïa ka Baibl kum ka ktien jong U Blei. Ki pyrshang katba lah ban im katkum ki aiñ jong ka. Te, ka niam bashisha ka pher na ki niam kiba la pynshong nongrim ha ki jinghikai jong u briew. (Mathaios 15:7-9) Ki nongmane bashisha kim ju ïalap da kawei bad leh da kum wei pat.—Pule Ioannis 17:17; 2 Timothi 3:16, 17.
-
Ki nongbud jong u Jisu ki burom ïa ka kyrteng jong U Blei, U Jehobah. U Jisu u burom ïa ka kyrteng jong U Blei da kaba pynbna ïa ka ha kiwei. U ïarap ïa ki briew ban tip shaphang U Blei bad hikai ïa ki kumno ban duwai ban pynkyntang khuid ïa ka kyrteng U Blei. (Mathaios 6:9) Ka niam aïu kaba pynbna ïa ka kyrteng jong U Blei ha ka shnong jong phi?—Pule Ioannis 17:26; Rom 10:13, 14.
-
Ki Khristan bashisha ki ïalap ïa ka Hima U Blei. U Blei u la phah ïa u Jisu ban ïalap ïa ka khubor babha shaphang ka Hima. Tang ka Hima U Blei ka ai jingkyrmen ïa u bynriew. U Jisu u ïai kren shaphang jong ka haduh ka sngi ka jingïap jong u. (Loukas 4:43; 8:1; 23:42, 43) U la ong ba ki nongbud jong u kin ïalap shaphang ka Hima U Blei. Lada don ba wan ïathuh ïa phi shaphang ka Hima U Blei, te phi tharai, ki dei na ka niam aïu?—Pule Mathaios 24:14.
-
Ki nongbud jong u Jisu kim ïa don bynta bad ka pyrthei bymman. Phi lah ban ithuh ïa ki namar kim ju shim bynta ha ki kam saiñ pyrthei ne ha kam ïaleh pyrshah ha ka imlang sahlang. (Ioannis 17:16; 18:36) Kumjuh, kim ju pyrthuh bud ïa ki jingmlien kiba pynmynsaw bad ïa ki jinglong kiba sniew.—Pule Jakob 4:4.
-
Ki Khristan bashisha ki don jingieit bashisha iwei ïa iwei. Ki ïoh jinghikai na ka ktien U Blei ban burom ïa ki briew baroh. Ki niam ba hikai bakla bunsien ki ju ïashah ïa ki thma, hynrei ki nongmane bashisha kim ju ïashah ïa ki thma. (Mikah 4:1-3) Ki Khristan bashisha da ka mon sngewbha ki ai ïa la ka por bad ïa la ki jingdon jingem ban ïarap bad pynshlur ïa kiwei.—Pule Ioannis 13:34, 35; 1 Ioannis 4:20.
4. Phi lah mo ban ithuh ïa ka niam bashisha?
Ka niam aïu kaba pynshong nongrim ïa la ki jinghikai na ka ktien U Blei, kaba burom ïa ka kyrteng U Blei bad kaba pynbna ba dei tang ka Hima U Blei kaba ai jingkyrmen ïa u bynriew? Ka kynhun aïu kaba ieit iwei ïa iwei bad ka bym ju ïashim bynta ha ka thma? Phi tharai kumno?—Pule 1 Ioannis 3:10-12.
