Nthĩnĩ wa livoti ĩnaumiwʼe Mweinĩ wa 6, 2022, mũnene wa World Bank Group anaisye: “Ũkwati wa nthĩ yonthe wĩ vathũku. Yu tũĩ, ngalama ya syĩndũ yambatĩte na mĩtũkĩ na andũ maendeee kũnyivĩwa nĩ mbesa.”

 Nayo ngwatanĩo yĩtawa International Monetary Fund yaisye ũũ: “Thooa wa mauta na wa lĩu wambatie na mĩtũkĩ mũno, na kĩu kĩtumĩte andũ ala matetonya na mekalaa nthĩ ila ite ũkwati mwingĩ makũnĩka mũno vyũ.”

 Mbivilia nĩtũtetheesye kũelewa nĩkĩ andũ methĩĩtwe na thĩna mwingĩ ũu wa ũkwati, ũndũ tũtonya kũmĩanĩsya na thĩna ũsu, na wĩkwatyo ũla twĩ nawʼo wa kwona thĩna ũsu ũithela vyũ.

•   Mbivilia yĩtĩte ĩvinda yĩĩ tũtwĩe ‘mĩthenya ya mũminũkĩlyo.’—2 Timotheo 3:1.

•   Yesũ aisye kana ĩvindanĩ yĩĩ kũkeethĩwa na “maũndũ ma kũtelemya.” (Luka 21:11) Andũ nĩmatelemaa ngalama ya syĩndũ yambata. Masaanĩawʼa maũndũ methi ata, na ethĩwa nĩmeũvota kwĩanĩsya mavata ma mĩsyĩ yoo.

•   Ĩvuku ya Ũvuanyʼo yathanie kana ĩvindanĩ yĩĩ thooa wa lĩu ũkambata. Yaĩtye: “Nĩneewie kĩndũ ta wasya . . . ũkwasya atĩĩ, ‘Mũkeve ũmwe wa mũtu wa nganũ wĩthĩwe na thooa wa ĩtuvi ya mũndũ ya mũthenya ũmwe, nayo mĩkeve ĩtatũ ya . . . mbaale ĩyĩthĩwa na thooa wa ĩtuvi ya mũndũ ya mũthenya ũmwe.’”—Ũvuanyʼo 6:6, The Holy Bible in Current Kikamba Language.

 Nĩ kana ũkwate ũvoo mwingangĩ ĩũlũ wa ‘mĩthenya ya mũminũkĩlyo’ na wathani ũla wĩ ĩvukunĩ ya Ũvuanyʼo, sisya vitio Nthĩ Nĩvĩndũkĩte Kuma Mwaka wa 1914, na ũisoma kĩlungu kĩ na kyongo, “Ala Aũme Ana Makuĩtwe Nĩ Mbalasi Naaũ?”

•   “Makaaka nyũmba, na kũtũa nthĩnĩ wasyo; na makavanda mĩũnda ya mĩsavivũ, na makaya ũsyao wayo. Matikaka na ũngĩ aitũa; matikavanda na ũngĩ aiya.”—Isaia 65:21, 22.

•   “Kũkeethĩwa lĩu mwingĩ mũno wa mbaa ngetha nthĩ iĩmanĩ ĩũlũ.”—Savuli 72:16.

•   “Nũndũ wa ngya kũthĩna, nũndũ wa kũvevũũka kwa mũthĩni, oyu nĩngũkĩla, easya ũu Yeova.”—Savuli 12:5. a

 Ngai akilyĩ kwosa ĩtambya aĩkĩĩthye kana andũ onthe kĩla vandũ ĩũlũ wa nthĩ me na ũkwati wĩanene. Nĩ kana ũmanye ũndũ ũkeka ũu, soma kĩlungu kĩ na kyongo, “Nĩvatonyeka Andũ Makethĩwa na Ũkwati Wĩanene?”

 Ĩndĩ o na ũmũnthĩ, Mbivilia no ĩũtetheesye kũmĩanĩsya na thĩna ũla wĩ kwʼo nũndũ wa thooa wa syĩndũ kwambata. Ata? Yĩ na ũtao mũseo ũkwonetye ũndũ ũtonya kũtũmĩa mbesa nesa. (Nthimo 23:4, 5; Mũtavanʼya 7:12) Nĩ kana ũkwate ũvoo mwingangĩ, sisya kĩlungu kĩ na kyongo, “Linda Mapato Yako,” na “Ũndũ Ũtonya Kwĩka Yĩla Wanyivĩwa Nĩ Mbesa.”