Mahtai jaw ai. Akyu hpyi ga ni hpe Karai Kasang mahtai jaw ai lam, Chyum Laika hte teng sha byin nga ai mabyin ni gaw sakse madun nga ai. Chyum Laika hta ndai hku tsun da ai: “[Yehowa] hpe hkrit kamyin ai ni a ra ai hku shi shadik ya nna, Shanhte a jahtau ai hpe shi na la nna, shanhte hpe hkye la mu ai.” (Shakawn 145:19) Raitim, na a akyu hpyi ga hpe Karai Kasang mahtai jaw, n jaw gaw nang hta mung madung ai.

Karai Kasang a matu ahkyak ai lam ni

•   Yesu, Mari, chyoi pra ai masha ni, lamu kasa ni hte gawng ngu sumla ni kaw n re ai sha, Karai Kasang kaw akyu hpyi na matu re. Yehowa langai sha “Akyu hpyi ai ga madat mara ai wa” re.—Shakawn 65:2.

•   Chyum Laika hta madun da ai Karai Kasang a myit ra ai hte maren akyu hpyi na matu re.—1 Yawhan 5:14.

•   Akyu hpyi ga ni hpe Karai Kasang madat ya na matu, Yesu a amying gang nna hpyi na matu re. “Ngai hta nna n rai yang gaw, kadai mung nye Wa kaw n du wa lu ai” ngu Yesu tsun ai.—Yawhan 14:6.

•   Kamsham ai hte akyu hpyi na matu re. Ra ang yang, makam masham grau nga wa hkra akyu hpyi u.—Mahte 21:22; Luka 17:5.

•   Shagrit shanem nna tengman ai myit nga u. Chyum Laika hta ndai hku tsun da ai: “Yehowa gaw tsaw htum nga ti mung, Myit gyip ai ni hpe mada yu nga ai.”—Shakawn 138:6.

•   Shakut shaja u. “Hpyi mu, shaloi nanhte lu la na myit dai” ngu Yesu tsun ai.—Luka 11:9.

Karai Kasang a matu n ahkyak ai lam ni

•   Amyu ru sai (sh) mung masha. “Karai Kasang masha myi man n tau ai gaw, ya ngai gaja wa chye se ai: amyu baw shagu hta shi hpe hkrit hkungga ai hte ding man ai amu galaw ai wa gaw, shi kaw myi man pa nga ai.”—Kasa 10:34, 35.

•   Hkum hkrang nga ra na masa. Dung let, hput di di let (sh) tsap let gara hku mi raitim, Karai Kasang kaw akyu hpyi mai ai.—1 Hkawhkam Labau 17:16; Nehemia 8:6; Daniela 6:10; Marku 11:25.

•   Nsen shapraw nna (sh) nsen n shapraw ai sha akyu hpyi ai lam. Kaga ni n sadi hkrup ai nsen n shapraw ai akyu hpyi ga ni hpe pyi, Karai Kasang mahtai jaw ya ai.—Nehemia 2:1-6.

•   Ahkyak ai lam ni (sh) kaji kajaw lam ni. Karai Kasang hte seng nna Chyum Laika hta ndai hku tsun da ai: “Shi nanhte hpe myit dum ya nga ai majaw, nanhte a myit ru myit tsang ai nlang hte nan, shi a ntsa e kabai mara da mu.”—1 Petru 5:7.