Matiu 17:1-27
17 Nọ edẹ ezeza e vrẹ no, Jesu ọ tẹ rehọ Pita, Jemis gbe Jọn oniọvo riẹ kugbe oma, aimane na ọvo a te kpobọ ehru ugbehru ukpekpehru jọ.
2 Ọ tẹ rẹriẹ evaọ iraro rai; ovao riẹ u te je lo wọhọ ọre, iwu riẹ i te je lo nwranwranwra.*
3 Rri! Mosis avọ Elaeja a tẹ romavia kẹ ae, bi lele Jesu ta ẹme.
4 Kẹsena Pita ọ tẹ ta kẹ Jesu nọ: “Olori, u woma nọ ma rọ rrọ etenẹ. O tẹ were owhẹ, mẹ rẹ bọ iwou-udhu esa fihọ etenẹ, ọjọ rọkẹ owhẹ, ọjọ rọkẹ Mosis, ọjọ rọkẹ Elaeja.”
5 Nọ ọ gbẹ be ta ẹme na, rri! ẹgho ọnwranwra o te ruru ae, urru jọ o tẹ ta ẹme no ẹgho na ze inọ: “Ọnana họ Ọmọ mẹ, oyoyou mẹ na, ọnọ mẹ jẹrehọ. Wha gaviezọ kẹe.”
6 Nọ ilele na a yo onana, ozọ u te mu ae gaga a te kie vovao tuotọ.
7 Kẹsena Jesu ọ tẹ nya kẹle ae, nọ ọ rọ obọ te ae, ọ tẹ ta nọ: “Wha kpama. Jọ ozọ u mu owhai hi!”
8 Nọ a kpare ovao, a gbẹ ruẹ ohwo ọvo ho ajokpaọ Jesu ọvo.
9 Nọ a je no ugbehru na ruọ otọ, Jesu ọ tẹ vẹvẹ ae unu nọ: “Wha ta oware nọ wha ruẹ na kẹ ohwo ọvo ho bẹsenọ Ọmọ ohwo ọ rẹ kparoma no uwhu ze no.”
10 Rekọ ilele na a tẹ nọe nọ: “Kọ fikieme otu ikere-obe na a rọ ta nọ Elaeja ọ te kake nyaze tao?”
11 Ọ tẹ kẹ ae uyo nọ: “Elaeja ọ te ginẹ nyaze ọ vẹ ruẹrẹ eware kpobi họ.
12 Rekọ mẹ be ta kẹ owhai nọ Elaeja ọ nyaze no, yọ a vuhu rie he, rekọ a ru rie oware kpobi nọ u je rai. Epọvo na re Ọmọ ohwo ọ te ruẹ uye evaọ obọ rai.”
13 Kẹsena ilele na a te vuhumu inọ Jọn Ọhọahwo-Ame na ọ be ta kpahe na.
14 Nọ a nya kẹle ogbotu na no, ọzae jọ ọ tẹ nya bru rie ze, o te kigwẹ fihọ aro riẹ ọ tẹ ta nọ:
15 “Olori, jọ ohrọ ọmọzae mẹ o re owhẹ keme o re kie ewawa, yọ ọ be mọ gaga. Ẹsibuobu ọ be hai kie fihọ erae je kie fihọ ame.
16 Yọ mẹ wọ riẹ bru ilele ra ze rekọ a sai siwi ei hi.”
17 Jesu ọ tẹ ta nọ: “O oge nọ ọ kare ẹrọwọ jẹ vọ avọ uzioraha, ẹvẹ mẹ rẹ jọ kugbe owhai kri te? Ẹvẹ me re thihakọ kẹ owhai kri te? Rehọ ọmọ na se omẹ.”
18 Kẹsena Jesu ọ tẹ whọku idhivẹri na, o te no ọmọ na oma, oma ọmọ na o tẹ ga no auwa yena vrẹ.
19 Ilele na a tẹ nya bru Jesu ze nọ ọye ọvo ọ jọ oria a tẹ nọe nọ: “Fikieme ma gbẹ sai ro le idhivẹri na no ho?”
20 Ọ tẹ ta kẹ ae nọ: “Fiki ẹrọwọ ọkakao rai. Uzẹme mẹ be ta kẹ owhai, otẹrọnọ wha te wo ẹrọwọ nọ ọ make kawo wọhọ ubi mọstad, wha te ta kẹ ugbehru nana nọ, ‘No etenẹ kpohọ obei,’ o ve no etẹe, yọ oware ovo o te bẹ owhai eruo ho.”
21 ——
22 Nọ a kokohọ evaọ Galili, etẹe Jesu ọ jọ ta kẹ ae nọ: “A ti vivie Ọmọ ohwo họ obọ ahwo,
23 a ve ti kpei, ẹdẹ avọ esa ọ vẹ kparoma ze.” Uweri ogaga o tẹ jarai oma.
24 Nọ a te Kapaniọm, ezae nọ i re mi osa-uzou ibiugho edrakma ivẹ* na a tẹ nya bru Pita ze, ta nọ: “Kọ owuhrẹ rai ọ rẹ hwa osa-uzou ibiugho edrakma ivẹ na?”
25 Ọ tẹ kuyo nọ: “Ee.” Rekọ nọ ọ ruọ evaọ uwou na, Jesu ọ tẹ kaki mu ẹme na họ kẹe inọ: “Saemọn, ẹvẹ who roro? Amono ivie akpọ na i re mi azọhọ hayo osa-uzou? Emọ rai manikọ erara?”
26 Nọ ọ kẹe uyo nọ: “Erara,” Jesu ọ tẹ ta kẹe nọ: “Koyehọ, emọ na e rẹ hwa osa-uzou ho.
27 Rekọ re ma siọ ae ba eru zoruẹ, kpobọ abade, who fi oghọlọ họ ame, whọ vẹ rehọ eri ọsosuọ nọ o ti mu, who te rovie unu riẹ whọ te ruẹ ubiugho isiliva. Rehọ iẹe kẹ ae rọ hwa osa-uzou mẹ avọ ọra.”
