Kpohọ eme nọ e riẹ eva

Kpohọ oria izoẹme

Jemis 4:1-17

  • Whọ jọ ogbẹnyusu akpọ na ha (1-12)

    • Wọso Ẹdhọ (7)

    • Si kẹle Ọghẹnẹ (8)

  • Unuovẹvẹ kpahe omoya (13-17)

    • “O tẹ ruọ Jihova” (15)

4  Eme ọ be wha ẹwhọ gbe ohọre nọ e rrọ udevie rai na ze? Kọ ogbẹrọnọ isiuru uwo nọ e rrọ oma rai họre owhai e be wha onana ze?  Eware i bi si owhai urru, rekọ wha bi wo ai tobọ họ. Wha bi mukpahe* ohwohwo je bi siuru eware amọfa, ghele na wha be sai wo ai tobọ họ. Wha be họre je fi ẹmo. Wha bi wo ho keme wha be yare he.  Nọ wha tẹ make yare dede, wha bi wo ho keme fiki ẹjiroro ọthọthọ wha be rọ yare, re wha rehọ ae wha isiuru uwo rai họ aro.  Ibruẹnwae,* kọ wha gbẹ riẹ nọ usu kugbe akpọ na yọ egrẹ kugbe Ọghẹnẹ? Fikiere, ohwo kpobi nọ ọ gwọlọ jọ ogbẹnyusu akpọ na o bi ru omariẹ họ ọwegrẹ Ọghẹnẹ.  Hayo kọ wha bi roro nọ igheghe ikereakere na e rọ ta nọ: “Ẹzi nọ ọ rrọ eva mai o bi ru omai rọ ihri-eriọ siuru eware”?  Rekọ, uwowou ulogbo nọ Ọghẹnẹ o re dhesẹ o rro vi ẹzi yena. Oyejabọ nọ ikereakere na e rọ ta nọ: “Ọghẹnẹ ọ rẹ wọso enọ i wo omorro, rekọ o re dhesẹ uwowou ulogbo kẹ enọ i wo omaurokpotọ.”  Fikiere, wha rehọ omarai kẹ Ọghẹnẹ; rekọ wha wọso Ẹdhọ, ọ rẹ te dhẹ siọ owhai ba.  Wha si kẹle Ọghẹnẹ, o re ti si kẹle owhai. Wha wozẹ abọ rai fo, whai erahaizi, je ru udu rai fo, whai enọ e be sae jiroro evo dhobọ họ.  Jọ wha weri gaga jẹ viẹ. Jọ ehwẹ rai i zihe ruọ uweri, jọ oghọghọ rai u zihe ruọ ọkora ọgaga. 10  Wha hrẹ omarai kpotọ evaọ aro Jihova,* ọ te kpare owhai kpehru. 11  Inievo, wha gbẹ ta ẹme wọso ohwohwo ho. Ohwo kpobi nọ ọ be ta ẹme wọso oniọvo hayo brukpe oniọvo riẹ ọ be ta ẹme wọso uzi je brukpe uzi. Whaọ, otẹrọnọ who bi brukpe uzi, kiyọ whẹ yọ ọnọ o bi koko uzi hi, rekọ obruoziẹ. 12  Ọkẹ-uzi gbe Obruoziẹ ọvo ọ riẹ, ọnọ ọ rẹ sai siwi jẹ sae raha. Rekọ, ono họ owhẹ nọ who re ro brukpe ọrivẹ ra? 13  Wha gaviezọ whai enọ e rẹ ta nọ: “Nẹnẹ hayo odẹnotha ma ti kpohọ okpẹwho yena ma vẹ rria etẹe ẹgbukpe, ma rẹ te thueki ma ve wo erere,” 14  rekọ wha riẹ oware nọ o te via kẹ uzuazọ rai odẹnotha ha. Keme whai yọ igrigri nọ e rẹ romavia omoke e vẹ rayẹ no. 15  Ukpoye, u fo re wha ta nọ: “O tẹ ruọ Jihova,* ma te jọ uzuazọ ma ve ti ru onana hayo oyena.” 16  Rekọ wha be yoma evaọ ehaise rai. Ehaise itieye na kpobi yọ umuomu. 17  Fikiere, otẹrọnọ ohwo ọ riẹ epanọ o re ro ru oware nọ u kiehọ rekọ o bi ru ei hi, yọ uzioraha rọ kẹe.

Eme-Obotọ

Evaọ Griki, “kpe.” Rri 1 Jọn 3:15.
Hayo “Whai enọ e be rọ eva rai kpobi gọ Ọghẹnẹ hẹ.”
Rri oria Otofa Eme.
Rri oria Otofa Eme.