2 Timoti 1:1-18
1 Pọl, ọnọ ọ rrọ ukọ Kristi Jesu wọhọ epaọ oreva Ọghẹnẹ, re o whowho eyaa uzuazọ na onọ a re wo ẹkwoma Kristi Jesu,
2 ro se Timoti, ọmọ oyoyou mẹ:
Jọ Ọghẹnẹ Ọsẹ na gbe Olori mai Jesu Kristi a dhesẹ uwowou ulogbo gbe ohrọ-oriọ kẹ owhẹ jẹ kẹ owhẹ udhedhẹ.
3 Me bi yere Ọghẹnẹ, ọnọ mẹ be gọ wọhọ epanọ esẹ-ode mẹ a ru, yọ mẹ be gọ avọ obruoziẹ-iroro ọfuafo, be kareghẹhọ owhẹ ẹsikpobi evaọ elẹ-ayare mẹ taso tuvo.
4 Nọ mẹ be kareghẹhọ irui-oviẹ ra, u bi si omẹ urru re mẹ ruẹ owhẹ, re oghọghọ o vọ omẹ eva.
5 Keme mẹ be kareghẹhọ ẹrọwọ ra nọ ọ kare eviẹhọ, onọ o kaki dhesẹ oma via evaọ oma Lọis oni-ode ra gbe Yunisi oni ra, onọ u mu omẹ ẹro nọ who wo re.
6 Fiki onana mẹ be kareghẹhọ owhẹ nọ hae rehọ okẹ Ọghẹnẹ nọ who wo na ruiruo, onọ u te owhẹ obọ okenọ mẹ rọ abọ kpahe owhẹ. Hai ru ere avọ ajọwha wọhọ ẹsenọ who bi fou erae.
7 Keme orọnikọ ẹzi ozodhẹ oye Ọghẹnẹ ọ kẹ omai hi, rekọ ọrọ ogaga gbe uyoyou gbe iroro egbagba.
8 Fikiere whọ jọ oma isẹri-ise kpahe Olori mai o vuọ owhẹ hẹ, hayo jọ oma o vuọ owhẹ fiki mẹ hẹ, ọnọ ọ rrọ uwou-odi fiki riẹ, rekọ ruẹrẹ oma kpahe inọ whọ rẹ ruẹ uye fiki usi uwoma na avọ ogaga Ọghẹnẹ nọ whọ rẹ rẹroso.
9 O siwi omai je se omai re ma jọ erezi, orọnọ fiki iruo mai hi, rekọ fiki ẹjiroro riẹ gbe uwowou ulogbo riẹ. Ẹkwoma Kristi Jesu a rọ kẹ omai onana ugbanwẹdẹ,
10 rekọ enẹna a ru rie vẹ ziezi no ẹkwoma omarọvia Osiwi mai, Kristi Jesu, ọnọ o si uwhu no otọ je dhesẹ epanọ a re ro wo uzuazọ gbe ugboma nọ u re gbo ho ẹkwoma usi uwoma na,
11 onọ a rọ fiki riẹ rehọ omẹ mu ọtausiuwoma gbe ukọ gbe owuhrẹ.
12 Fiki onana mẹ be rọ ruẹ uye eware nana re, rekọ oma o be vuọ omẹ hẹ. Keme mẹ riẹ Ọnọ me fi ẹrọwọ họ, yọ u mu omẹ ẹro nọ ọ sae sẹro oware nọ me mu họ iẹe obọ ri bọo ẹdẹ yena.
13 Gbẹ nya lele emamọ eme* nọ who yo mi omẹ gbe ẹrọwọ avọ uyoyou nọ who wo fiki usu ra kugbe Kristi Jesu.
14 Rehọ ẹkwoma obufihọ ẹzi ọfuafo nọ ọ rrọ omai oma na sẹro efe ọghaghae nọ a mu họ owhẹ obọ na.
15 Whọ riẹ nọ ezae kpobi nọ e rrọ ubrotọ Esia a nyasiọ omẹ ba no, te Fajẹlọs gbe Hẹmojẹnis.
16 Jọ Olori na ọ re ohrọ uviuwou Ọnẹsiforọs, keme ọ jẹ sasa omẹ oma ẹsikpobi, yọ oma o vo riẹ hẹ fikinọ mẹ rrọ uwou-odi.
17 Ukpoye, okenọ ọ ziọ Rom, ọ romatotọ gwọlọ omẹ bẹsenọ ọ rọ ruẹ omẹ.
18 Jọ Olori na o ru ei wo ohrọ-oriọ Jihova* evaọ ẹdẹ yena. Yọ whọ riẹ kpahe iruo kpobi nọ o ru evaọ obọ Ẹfisọs.
