1, 2. Hari, Dirava ena taunimanima be dahaka hekwakwanai idia davaria? (Laulau ginigunana herevalaia.)

DOKETA taudia momo be daihanai gorere idauidau idia abia taudia huanai idia gaukara. Unai gorere taudia idia naria, badina idia ura durudia. To, unai idia karaia neganai, idia sibodia idia naria namonamo be namo, dika unai gorere idia abia hanai. Unai hegeregerena, iseda noho gabunai o gaukara gabunai, taunimanima momo be Dirava ena kara namodia idia hahedinaraia lasi. Bona unai be hekwakwanai badana ta.

² Inai dina gabediai, kara dika be bada herea. Paulo ese Timoteo dekenai ia torea revareva iharuana lalonai, ia ese Dirava amo idia daudau taudia edia kara ia herevalaia, bona dina gabediai edia kara be do ia dika herea. (2 Timoteo 3:1-5, 13 duahia.) Ena be edia kara dekenai do ita hoa, to edia kara ese iseda kara namodia idia hadikaia diba. (Aon. 13:20) Inai stadi ai, ita ese dina gabediai taunimanima edia kara bona Dirava ena taunimanima edia kara edia idau do ita herevalaia. Momokani, ita ura taunimanima ita durua Dirava idia diba totona, to unai ita karaia neganai, ita sibona do ita gimaia dalana do ita herevalaia danu.

3. Timoteo Iharuana 3:2-5 ese edena kara ia herevalaidia?

³ Aposetolo Paulo ia gwau: “Dina gabediai nega aukadia do idia  vara, bona unai ese taunimanima do idia hahekwarahia bada.” Bena, iseda negai taunimanima ese idia karaia karadia 19 ia gwauraia. Unai be Roma 1:29-31 ese ia gwauraia karadia hegeregerena, to Paulo ese Timoteo dekenai ia torea revarevana ai ia gwauraia karadia be Keristani Grik Toretoredia ena kahana ma haida dekenai idia hedinarai lasi. Paulo ese taunimanima edia kara ia do herevalaia lasi neganai, ia gwau “badina taunimanima be . . .” To, taunimanima ibounai be unai bamona karadia do idia hahedinaraia lasi. Keristani taudia edia kara be idau.​—⁠Malaki 3:18 duahia.

4. Idia heagi taudia be edena bamona do oi gwauraia?

⁴ Paulo ia gwau taunimanima be sibodia do idia laloa bada bona moni do idia ura henia bada, unai murinai ia gwau taunimanima be sibodia do idia abia isi, do idia hekokoroku, bona heagi. Unai bamona idia kara taudia idia laloa idia be ma haida idia hereaia, reana badina idia be hairai, edia diba be bada, edia kohu be momo, eiava edia dagi be bada. Bona idia ura ma haida ese do idia hanamodia. Diba bada tauna ta ese ia heagi tauna be inai bamona ia herevalaia: “Iena kudouna ai pata maragina ta ia noho, bona ia be ia sibona vairanai ia tui diho.” Haida idia gwau heagi karana be dika herea, bona idia heagi taudia danu be unai kara idia ura henia lasi, bema ma haida ese idia hahedinaraia.

5. Iehova ena abidadama hesiai taudia haida be edena dala ai idia hekokoroku?

⁵ Baibel ia gwau bamona, Iehova be “hekokoroku ena toana” ia inai henia. (Aon. 6:16, 17) Hekokoroku tauna be Dirava kahirakahira do ia lao lasi. (Sal. 10:4) Hekokoroku be Diabolo ena kara ta. (1 Tim. 3:6) Madi, Iehova ena hesiai taudia haida danu be idia hekokoroku. Iuda ena king, Usaia, be lagani momo lalonai Iehova ia badinaia. To Baibel ia gwau: “Ia goada neganai, iena hekokoroku ia vara, bona unai dainai ia dika. Badina be Lohiabada, iena Dirava dekenai ia koikoi, ia be Lohiabada ena Dubu lalonai ia vareai kava, muramura patana ena latanai muramura mai bonana do ia gabua totona.” Gabeai, King Hesekaia danu be nega sisina sibona lalonai ia hekokoroku.​—⁠2 Siv. 26:16; 32:25, 26.

6. Davida be dahaka dainai ia hekokoroku diba, to dahaka dainai unai ia karaia lasi?

⁶ Taunimanima haida idia hekokoroku, badina idia be hairai, edia sivarai be bada, miusiki idia diba momo, edia tauanina be goada, eiava edia dagi be bada. Davida be unai bamona tauna ta, to ena mauri ibounai lalonai ia manau. Goliata ia alaia mase bona ia dekenai King Saulo ena natuna kekeni idia henia murinai, Davida ia gwau: “Lau be daika, bona lauegu varavara taudia be daika, bona unai dainai lau be king ena ravana do lau lao?” (1 Sam. 18:18) Dahaka dainai Davida ia manau? Badina ia diba Dirava be “iena kwarana ia atoa diho” o ia manau dainai, ia karaia karana ia karaia bona unai hahenamo ia abia. (Sal. 113:5-8) Davida ia diba ia karaia gau namodia ibounai be Iehova amo.​—⁠1 Korinto 4:7 sekea.

7. Dahaka dainai manau karana do ita hahedinaraia?

⁷ Davida hegeregerena, Iehova ena taunimanima be idia hekwarahi manau idia hahedinaraia totona. Ita moale badina Iehova, guba bona tanobada edia Lohiabada, be manau Diravana. (Sal. 18:35) Namona be inai sisiba ita badinaia: “Inai bamona kara be dabua bamona do umui hahedokilaia, hebogahisi mai lalokauna, hariharibada, lalomanau, manau, bona boga-auka.” (Kol. 3:12) Danu, ita diba “lalokau be ia mama lasi, ia heagi lasi, bona ia hekokoroku lasi.”  (1 Kor. 13:4) Ita manau neganai, taunimanima be Iehova dekenai ita veria mai diba. Hahine ese edia kara amo edia adavadia idia durua diba abidadama taudia ai idia lao totona, unai hegeregerena, Dirava ena taunimanima edia manau karana dainai, ma haida be abidadama taudia ai idia lao diba.​—⁠1 Pet. 3:1.

8. (a) Hari momo ese tama sina kamonai henia lasi karana be edena bamona idia laloa? (b) Baibel ese natudia ia hagania dahaka idia karaia totona?

⁸ Paulo be dina gabediai taunimanima ese ta ta do idia kara henia dalana ia gwauraia. Ia gwau dina gabediai, natudia be tama sina do idia kamonai henia lasi. Unai kara be buka, muvi, bona televisen program momo dekenai idia hedinarai, to unai kara ese famili ena lalotamona ia hadikaia. Idaunega taudia danu be unai hakaua herevana idia diba. Hegeregere, idaunega Grik ai, bema tau ta ese ena tama sina ia botaia, iena maoro gau haida dekenai do ia haboioa; Roma ena taravatu henunai, tamana botaia karana be ala-ala karana hegeregerena. Heberu Toretoredia bona Keristani Grik Toretoredia ese natudia ia hagania edia tama sina idia matauraia totona.​—⁠Eso. 20:12; Efe. 6:1-3.

9. Dahaka ese natudia do ia durua edia tama sina idia kamonai henia totona?

⁹ Natudia do idia ura edia tama sina idia kamonai henia, bema edia tama sina ese idia totona idia karaia karadia idia laloa dobu. Namona be natudia idia laloparara danu, Dirava, ita ibounai iseda Tamana, ia ura idia ese edia tama sina do idia kamonai henia. Bema natudia ese edia tama sina edia kara namodia idia herevalaia, edia turadia do idia durua edia tama sina idia kamonai henia totona. To, bema tama sina ese edia natudia idia lalokau henia lasi, reana do ia auka edia natudia ese edia tama sina idia kamonai henia totona. Bona bema natudia idia itaia edia tama sina ese idia lalokau henidia, idia ese do idia hanamodia, hahetoho idia davaria negadiai danu. Austin ia gwau: “Ena be nega haida lau ura kara kererena lau karaia, to egu tama sina ese taravatu haida idia atoa, unai taravatu idia atoa ena badina idia hahedinaraia, bona nega momo ai herevahereva. Unai dainai ia auka lasi idia lau kamonai henia totona. Lau diba idia be lau idia lalokau henia, unai dainai lau ura idia lau hamoalea.”

10, 11. (a) Edena kara ma haida ese idia hahedinaraia taunimanima be idia lalokau heheni lasi? (b) Keristani taudia korikoridia edia lalokau be edena bamona?

¹⁰ Paulo ese ia gwauraia kara ma haida ese idia hahedinaraia taunimanima be ta ta idia lalokau henia lasi. Ia ese ‘tama sina kamonai henia lasi’ karana ia gwauraia murinai, ia gwau taunimanima be tanikiu karana do idia hahedinaraia lasi, badina unai bamona taudia be ma haida ese idia totona idia karaia kara namodia idia laloa bada lasi. Taunimanima ese ma haida do idia badinaia lasi danu. Do idia ura lasi gwauhamata idia karaia, anina be do idia ura lasi ma haida ida maino idia karaia. Hadikaia herevadia do idia gwauraia bona ma haida edia mase dalana do idia karaia, oibe, idia ese Dirava bona ma haida do idia gwauraia dika. Taunimanima edia ladadia do idia hadikaia, idia ese koikoi herevadia do idia gwauraia ma haida edia ladana namona idia hadikaia totona. *

¹¹ Iehova idia tomadiho henia taudia be tanobada taudia amo idia idau momokani, badina idia ese ma haida idia lalokau henia. Bona unai be momokani. Iesu ese ia hahedinaraia, Mose ena Taravatu lalonai, emu  dekena tauna lalokau henia karana, a·ga’pe lalokauna unai, be taravatu hereadaena iharuana, bona ginigunana be Dirava lalokau henia karana. (Mat. 22:37-39) Danu, Iesu ia gwau ta ta lalokau henia karana be Keristani korikoridia edia kara. (Ioane 13:34, 35 duahia.) Unai bamona Keristani lalokauna be ta ena inai tauna dekenai ia hahedinaraia diba danu.​—⁠Mat. 5:43, 44.

12. Iesu ese edena dala ai ma haida dekenai lalokau ia hahedinaraia?

¹² Iesu be ma haida ia lalokau henia bada. Ia be taoni idauidau dekenai ia lao, bona taunimanima dekenai Dirava ena Basileia ena sivarai namona ia harorolaia. Ia ese matakepulu, aena dika, lepera taudia, bona taia kudima taudia ia hanamoa. Mase taudia ia hatorea isi danu. (Luka 7:22) Ena be momo ese Iesu idia inai henia, to taunimanima ibounai totona iena mauri ia henia. Iesu ena lalokau karana ese ena Tamana ena lalokau ia hahedinaraia goevagoeva. Tanobada hegegemadai, Iehova ena Witnes taudia be Iesu idia tohotohoa bona ma haida dekenai lalokau idia hahedinaraia.

13. Edena dala ai ma haida dekenai ita hahedinaraia lalokauna ese idia be Iehova dekenai ia veria mai diba?

¹³ Ma haida dekenai ita hahedinaraia lalokauna ese taunimanima be iseda guba Tamana dekenai ia veria mai. Hegeregere Thailand ai, tau ta be iseda rijinol hebouhebou dekenai ia lao, bona tadikaka huanai ia itaia lalokauna ese ena kudouna ia hamarerea. Ruma dekenai ia giroa neganai, tadikaka ia noidia wiki tamona lalonai ena Baibel stadi be nega rua do idia karaia. Iena varavara ibounai ia haroro henia, hebouhebou ia ore bena hua 6 murinai, Kingdom Hall ai iena Baibel duahiduahi ginigunana ia karaia. Ita be ma haida dekenai lalokau ita hahedinaraia, a? Sibona oi nanadaia: ‘Lau gaukara goada egu famili, kongrigeisen, bona haroro gaukara ai lau davaria taudia lau durua totona, a? Iehova ese ma haida ia laloa hegeregerena idia lau laloa, a?’

14, 15. Taunimanima ese edena bamona kara dikadia ma haida idia karaia, to haida be edena bamona edia kara idia haidaua?

¹⁴ Inai dina gabediai, taunimanima ese  kara dika ma haida idia hahedinaraia danu, bona unai ita dadaraia be namo. Hegeregere, momo be kara namodia do idia ura henia lasi. Idia ese kara namo do idia inai henia bona dadaraia. Idia be sibodia edia ura do idia biagua lasi, do idia dagedage. Haida be do idia kwara auka, eiava do idia kara kava bona ma haida do idia laloa lasi.

¹⁵ Animal edia kara bamona idia karaia taudia momo be edia kara idia haidaua. Unai be Baibel ese ia perovetalaia danu. (Isaia 11:6, 7 duahia.) Unai siri ese ia hahedinaraia, dagedage animal, hegeregere uda sisia bona laiona be mamoe bona edia natudia ida do idia noho hebou mai maino danu. Unai do ia vara, “badina be tanobada ibounai, be Lohiabada ena diba maoro dekena amo do ia honu momokani.” (Isa. 11:9) Animal be Iehova ena diba maorona idia abia diba lasi dainai, unai peroveta herevana be taunimanima dekenai do ia guguru.

16. Baibel ese edena dala ai taunimanima ia durua edia mauri idia haidaua totona?

¹⁶ Haida be guna uda sisia bamona idia kara, to hari idia be ma haida ida maino ai idia noho. Idia haida edia ekspiriens be kahana ladana “Baibel ese Mauri Ia Haidaua” dekenai oi davaria diba, unai be jw.org ai. Iehova idia dibaia bona hesiai henia taudia be Dirava badinaia karana be toana sibona idia hahedinaraia, to ena siahu idia abia dae lasi taudia amo idia idau, badina unai taudia idia gwau idia be Dirava idia tomadiho henia, to edia kara amo unai idia hahedinaraia lasi. To guna dagedage karadia idia karaia taudia be “kara matamata [idia] atoa be namo. Unai kara be Dirava ena ura hegeregerena ia vara, ia be maoromaoro momokani bona abidadama dalana ia badinaia.” (Efe. 4:23, 24) Taunimanima be Dirava idia dibaia neganai, do idia ura iena taravatu idia badinaia. Bona idia abia dae gaudia, edia kara, bona lalohadai idia haidaua. Unai idia karaia be auka, to lauma helaga ese Dirava ena ura idia ura karaia taudia do ia durua.

17. Kara dikadia idia karaia taudia edia kara be edena bamona ita dadaraia diba?

¹⁷ Dirava idia hesiai henia taudia bona ia idia hesiai henia lasi taudia edia idau be ia hedinarai goevagoeva noho. Ita, Dirava ita hesiai henia taudia, ita naria namonamo be namo, dika ma haida edia kara dikadia ese iseda kara namodia idia hadikaia. Aonega karana be 2 Timoteo 3:2-5 ese ia herevalaia taudia amo ita raka siri. To, namo lasi kara dika idia karaia taudia ita dadaraidia momokani. Reana ita be idia ida do ita gaukara, ita sikuli hebou, eiava ita noho hebou. To, edia lalohadai bona kara ita dadaraia be namo. Iseda hetura karana Iehova ida ita hagoadaia diba bema Baibel ita stadilaia bona ia idia lalokau henia taudia ita tura henia.

18. Edena dala ai iseda hereva bona kara ese ma haida ia durua diba?

¹⁸ Ita ura ma haida ita durua Dirava idia diba totona. Dala oi tahua ma haida oi haroro henia totona, bona Iehova ena heduru oi noia, unai amo nega maorona ai hereva maorona do oi gwauraia. Namona be ma haida ita hadibaia ita be Iehova ena Witnes taudia. Bena iseda kara namodia amo Dirava ena ladana ita hanamoa diba, to ita sibona lasi. Dirava ese ita ia hadibaia “tanobada ena ura idauidau do ita dadaraia bona inai nega oromana lalonai do ita noho mai laloa maoromaoro bona kara maoromaoro ida bona Dirava do ita badinaia noho.” (Tito 2:11-14) Bema Dirava ena ura hegeregerena ita kara, haida be unai do idia itaia, bona reana do idia gwau: “Mani emu kara, oi danu do ita lao, badina be ai be ai kamonai vadaeni, Dirava be oi dekenai ia noho.”​—⁠Sek. 8:23.