KAROA 8
Edena dala ai tura namodia lau davaria diba?
“Bema lau badu, lau ura ta dekenai egu hemami lau gwauraia. Bema lau lalohisihisi, lau ura ta ese lau ia hagoadaia. Bema lau moale, lau ura ta be lau ida ia moale. Lau dekenai turadia be mai anina bada.”—Brittany.
Oi maragi neganai, oi ura natudia ma haida ida oi gadara. Bona oi idia bamoa dainai, oi mamia oi be sibona oi noho lasi. To hari, oi ura tura korikorina. Ia be oi ia bamoa sibona lasi, to oi laloa bada gaudia do ia abia dae, bona matauraia.
Baibel ia gwau: “Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.” (Aonega Herevadia 17:17) Oibe, tura korikori ena kara be oi maragi negana ai oi ida idia gadara hebou turadia edia kara amo ia idau.
Inai oi laloa: Oi tubu daekau lalonai, oi ura emu turadia be . . .
1. Mai edia kara namodia
2. Edia mauri ai taravatu maorodia idia badinaia
3. Oi idia hagoadaia abia hidi maorodia oi karaia totona
Henanadai: Edena dala ai unai bamona turadia oi davaria diba? Mani inai point toi ita laloa.
Tura Namodia #1—Mai Edia Kara Namodia
Inai oi diba be namo. Iseda turadia haida be unai bamona kara namodia idia hahedinaraia lasi. Badina Baibel ia gwau: “Tura haida be idia sibona huanai hetura karana idia hadikaia.” (Aonega Herevadia 18:24) Reana unai oi abia dae be auka. To inai oi laloa: Emu “turana” be ia ura henia gauna abia totona oi ia tura henia, a? Eiava ia be oi ia maumauraia, o hereva koikoi ia gwauraia, a? Unai ese ia oi trast henia karana do ia hadikaia diba. a Unai dainai laloatao, bema oi be mai emu tura namodia haida, unai be mai anina bada.
Oi karaia diba gauna. Oi abia hidi turadia be haheitalai namona oi dekenai.
“Momo ese egu turana, Fiona totona hereva namodia idia gwauraia. Lau ura lau dekenai unai bamona do idia karaia danu. Momo idia diba Fiona be kekeni namona. Lau dekenai ia be haheitalai namona.”—Yvette, 17.
Inai oi tohoa.
1. Galatia 5:22, 23 duahia.
2. Oi sibona oi nanadaia, ‘Egu turadia be edia kara amo “lauma helaga ena huahua” idia hahedinaraia, a?’
3. Emu tura namodia edia ladadia oi torea. Bena unai ladadia ta ta badinai, idia hahedinaraia karadia oi torea.
Ladana
․․․․․
Kara
․․․․․
Inai oi tahua: Bema oi itaia unai turadia be kara namodia idia hahedinaraia lasi, anina be idia be tura namodia lasi!
Tura Namodia #2—Taravatu Maorodia Idia Badinaia
Inai oi diba be namo. Bema oi laloa namonamo lasi, bona turadia oi abia hidi haraga, kerere ia vara diba. Baibel ia gwau: “Kavakava taudia ia bamoa tauna be dika do ia davaria.” (Aonega Herevadia 13:20) Inai hereva “kavakava taudia” be diba bada lasi taudia ia herevalaia lasi. To, laloa maoromaoro karana idia dadaraia bona kara maoromaoro taravatudia idia badinaia lasi taudia ia herevalaia. Unai bamona taudia oi tura henia lasi be namo.
Oi karaia diba gauna. Taunimanima oi tura henia kava lasi, to idia oi diba namonamo guna. (Salamo 26:4) Unai amo “kara maoromaoro tauna bona kara dika tauna, Dirava ia hesiai henia tauna bona ia hesiai henia lasi tauna, edia idau do [oi] itaia.”—Malaki 3:18.
“Egu tama sina lau tanikiu henia, badina lau idia durua tura namodia lau davaria totona. Idia be egu mauri lagani tamona taudia bona Iehova idia lalokau henia.”—Christopher, 13.
Inai henanadai haerelaia:
Egu turadia ida lau noho neganai, lau laloa momo badina dika lau idia doria kara kererena lau karaia totona, a?
□ Oibe
□ Lasi
Egu tama sina lau do hadibaia lasi, daidia be egu turadia, badina lau gari egu turadia do idia abia dae lasi, a?
□ Oibe
□ Lasi
Inai oi tahua: Bema ataiai idia noho henanadai dekenai emu haere be oibe, namona be tura namodia oi tahua—Keristani maurina ai idia be haheitalai namona.
Tura Namodia #3—Edia Kara ese Oi idia Durua
Inai oi diba be namo. Baibel ia gwau: “Hebamo dikadia ese ta ena kara namodia idia hadikaia diba.” (1 Korinto 15:33) Kekeni matamata ladana Lauren ia gwau: “Egu sikuli turadia be lau idia abia dae bema edia hereva lau badinaia. Lau be turana lasi dainai, edia kara lau tohotohoa unai amo edia turana ai lau lao diba.” Lauren ia laloparara bema haida edia ura sibona oi badinaia, oi be hegeregere soka bolo bamona edia ura hegeregerena do idia kikia lao mai. To tura namodia oi davaria diba!
Oi karaia diba gauna. Bema oi bamoa noho taudia ese edia mauri dalana badinaia totona oi idia doria, unai taudia tura henia karana oi hadokoa. Bona unai oi karaia dainai, do oi mamia emu turadia be momo lasi. To do oi moale, badina unai ese dala do ia kehoa tura namodia oi davaria totona. Bona dala maorona dekenai oi do idia hakaua.—Roma 12:2.
“Egu tura namona Clint be laloa namonamo tauna bona ma haida ia laloa bada. Bona unai ese lau ia hagoadaia bada.”—Jason, 21.
Oi sibona oi nanadaia:
Egu turadia ese lau idia abia dae totona, egu dabua, hereva eiava kara do lau haidaua, a?
□ Oibe
□ Lasi
Nega momo egu turadia dainai, lau lao diba lasi gabudia dekenai lau lao, a?
□ Oibe
□ Lasi
Inai oi tahua: Bema unai henanadai dekenai emu haere be oibe, emu tama sina eiava lo tauna ta ena sisiba oi abia. Bema oi be Iehova ena Witnes tauna, Keristani elda tauna dekenai oi lao diba. Bona ia oi hadibaia iena heduru oi ura, tura namodia oi abia hidi totona.
DIBA MA HAIDA ABIA TOTONA INAI BUKA ENA VOLIUM 2, KAROA 9 OI DUAHIA
Tura koikoi eiava emu kudouna ese oi ia doria kara dikadia oi karaia totona, a? Unai oi hanaia daladia itaia!
[Footnote]
a Nega haida do ita kerere diba. (Roma 3:23) Unai dainai emu turana ese oi ia hahisia, to gabeai mai momokani ida sori herevana ia gwauraia neganai, laloatao “lalokau ese kara dika momo ia gwauatao.”—1 Petero 4:8.
SIRI BADANA
“Tura haida be tadikaka korikori bamona ta ta idia kara henia.”—Aonega Herevadia 18:24.
DALA TA BE . . .
Kara maoromaoro taravatudia oi badinaia, bona unai bamona idia ura karaia noho taudia ese oi do idia dibaia. Bona emu tura namodia ai do idia lao!
INAI OI DIBA, A?
Dirava be ta ena toana ia laloa lasi, to ia diba daidia do ia abia hidi ‘iena palai ruma lalonai do idia noho’ totona.—Salamo 15:1-5.
EGU PALANI!
Tura namodia lau tahua totona, namona be lau ese ․․․․․
Lau ura mauri lagani bada turadia haida lau diba namonamo idia be ․․․․․
Inai topik ai, egu tama sina dekenai lau ura herevalaia gauna be ․․․․․
DAHAKA OI LALOA?
● Emu turana dekenai edena kara oi ura henia, bona dahaka dainai?
● Tura namona ai oi lao totona, edena kara namodia oi hahedinaraia be namo?
[Blurb]
Egu tama sina be lau idia hagoadaia turadia haida do lau bamoa lasi. Bona unai nega ai lau laloa, lau ura unai taudia lau bamoa, badina idia sibona be egu turadia. To egu tama sina edia sisiba be mai ena namo, badina hari lau laloparara tura namodia momo idia noho.’’—Cole.
[Box]
Inai dala haida oi tohoa
Tura namona tahua totona emu tama sina hereva henia. Idia oi nanadaia, idia be emu mauri lagani hegeregerena neganai, edena bamona turadia idia bamoa. Idia abia hidi turadia dainai, gabeai idia lalohisihisi, a? Bema oibe, dahaka dainai? Oi nanadaidia edena bamona guna idia davaria hekwakwanai idia hanaia.
Emu tama sina oi hadibaia daidia be emu turadia. Bema oi ura lasi unai oi karaia, sibona oi nanadaia, ‘Dahaka dainai unai lau karaia be auka?’ Oi laloa emu tama sina be emu turadia edia kara haida dekenai do idia lalotamona lasi, a? Bema oibe, namona be do oi tura henia taudia oi abia hidi namonamo.
Oi kamonai henidia namonamo. Emu turadia edia lalohadai bona hemami oi laloa.—Filipi 2:4.
Dika oi gwauatao. Namo lasi oi laloa emu turadia be do idia kerere lasi. “Ita ibounai be nega momo ita kerere.”—Iamesi 3:2.
Emu turadia dekenai nega oi henia. Namo lasi idia karaia gaudia eiava lao gabudia ibounai oi dibaia, nega oi henia sibona idia noho totona. Badina tura korikori be nega aukadia ai idia noho hegaegae oi idia durua totona.—Hadibaia Tauna 4:9, 10.
[Picture]
Bema haida edia ura sibona oi badinaia, oi be hegeregere soka bolo bamona edia ura hegeregerena do idia kikia lao mai

