“Oiemu Ladana Lau Hadibaia”

“Tanobada amo lau dekenai oi henia taudia dekenai oiemu ladana lau hadibaia. . . . Lau ese emu ladana be idia dekenai lau gwauraia hedinarai vadaeni, bona do lau gwauraia hedinarai noho.”—IOANE 17:​6, 26.

Anina be Dahaka: Iesu ena haroro gaukara ai Dirava ladana be taunimanima dekenai ia hadibaia. Vaia ena kara, nega momo Iesu be Toretore Helagadia ia duahia. Bona ita diba unai ia karaia neganai, Dirava ena ladana ia hunia lasi eiava ia kokia lasi bona dagi ladana ta ia atoa lasi. (Luka 4:​16-​21) Ena murinai idia raka taudia ia hadibaia inai bamona do idia guriguri: “Tamana e, namona be ibounai ese emu ladana idia hahelagaia.”​​—Luka 11:2.

Keristani Ginigunadia be Unai Idia Karaia, A?: Aposetolo Petero ese Ierusalema ai tau badadia ia hamaoroa, Dirava be idau bese taudia huanai “haida ia abia hidi ena ladana idia abia totona.” (Kara 15:14) Aposetolo taudia bona ma haida idia haroro idia gwau, “Iehova ena ladanai idia boiboi taudia ibounai be mauri do idia abia.” (Kara 2:​21; Roma 10:13) Edia toretore lalodiai Dirava ena ladana idia gaukaralaia danu. Iuda taudia edia taravatu gunadia bukana ta ia gwau, Keristani taudia idia inai henia taudia ese Keristani taudia ese idia torea bukadia, hegeregere Mataio, Mareko, Luka bona Ioane idia gabua, ena be unai buka lalodiai Dirava ena ladana idia torea.

Iseda Negai Daidia be Unai Idia Karaia?: United States ai, National Council of the Churches of Christ, ese ia halasia Revised Standard Version Bible ena vairana kahanai inai idia torea: “Dirava momokani tamona ena ladana korikorina ita torea, unai amo ia be dirava ma haida amo ia idau ita hahedinaraia karana be Iuda tomadihona ese idia hadokoa, unai be Keristani tomadiho be do lasi neganai idia karaia bona hari danu tanobada hegegemadai Keristani Dubu ese idia karaia lasi.” Unai dainai, idia ese Dirava ena ladana korikorina ena gabu ai “LOHIABADA” idia torea. Vanegai, Vatican ese ena bisop taudia ia oda henidia: “Ane bona guriguri lalodiai Dirava ena ladana Tetragramaton ai idia torea gauna, YHWH * be do ita torea lasi bona gwauraia lasi.”

Hari daidia ese Dirava ena ladana idia gaukaralaia bona ma haida dekenai idia hadibaia? Kyrgyzstan ai, Sergey be mero matamata neganai, muvi ta ia itaia bona unai muvi ese ia hahedinaraia Dirava ena ladana be Iehova. Lagani 10 lalodiai, Dirava ena ladana ia kamonaia lou lasi. Gabeai, Sergey be United States dekenai ia lao murinai, Iehova ena Witnes taudia rua be iena ruma dekenai idia lao bona Baibel amo Dirava ena ladana idia hahedinaraia. Sergey ia moale dikadika badina Iehova ena ladana idia gaukaralaia oreana ta ia davaria. Hoa gauna be, Webster’s Third New International Dictionary lalonai inai hereva “Iehova Dirava” henunai inai idia torea, “Iehova ena Witnes taudia ese idia abia dae Dirava badana bona idia tomadiho henia Dirava tamona.”

[Futnout]