“Basileia Ena Sivarai Namona be Tanobada Ibounai Dekenai Do Idia Harorolaia”

“Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.”​​—MATAIO 24:14.

Anina be Dahaka: Evanelia bukana ia torea tauna Luka ia gwau, Iesu be “siti ta ta bona hanua ta ta dekenai ia lao, Dirava ena Basileia ena sivarai namona ia harorolaia.” (Luka 8:1) Iesu danu ia gwau: “Dirava ena Basileia ena sivarai namona lau harorolaia danu be namo, unai karaia totona Dirava ese lau ia siaia.” (Luka 4:​43) Ena hahediba taudia be taoni bona hanua dekenai ia siaia sivarai namona do idia harorolaia, bona gabeai ia hamaorodia: “Tanobada ena daudau momokani gabudia dekenai lau do umui gwauraia hedinarai.”​​—Kara 1:8; Luka 10:1.

Keristani Ginigunadia be Unai Idia Karaia, A?: Iesu ena hahediba taudia be karaharaga iena hereva idia badinaia. “Dina ibounai dubu helaga ai bona ruma-ta-ruma-ta ai, Iesu Keriso ena sivarai namona idia hadibaia bona harorolaia noho, idia hadokoa lasi.” (Kara 5:​42) Haroro gaukara be orea maragi ta sibona lasi, to kongrigeisen taudia ibounai ese idia karaia. Histori torea tauna Neander, ia gwau: “Celsus, Keristani ginigunadia ia inai henia tauna ese Keristani taudia ia kirikirilaia, badina idia be diba bada lasi bona idia duahiduahi diba lasi taudia, unai be wulu idia gaukaralaia taudia, tamaka idia karaia taudia, bona leda idia karaia taudia ese sivarai namona idia harorolaia.” Jean Bernardi ena buka (The Early Centuries of the Church) lalonai, ia gwau: “[Keristani taudia] be gabu ibounai dekenai do idia lao bona taunimanima ibounai dekenai do idia haroro. Dala bona siti ai, pablik gabudia bona ruma ai do idia haroro. Taunimanima idia kamonai o lasi to idia haroro. . . . Tanobada ena daudau momokani gabudia dekenai do idia lao.”

Hari Daidia be Unai Idia Karaia?: Anglikan pris David Watson, ia gwau: “Dubu be haroro bona hadibaia gaukara idia karaia lasi dainai, hari taunimanima be Dirava idia laloa bada lasi.” José Luis Pérez Guadalupe ena buka Why Are the Catholics Leaving? lalonai ia gwau. Evangelical, Adventist, bona dubu ma haida “be ruma-ta-ruma-ta dekenai idia lao lasi.” To, ia gwau Iehova ena Witnes taudia be “dala hereadaena ai ruma-ta-ruma-ta haroro gaukara idia karaia.”

Jonathan Turley be Cato Supreme Court Review, 2001-​2002 ia duahia murinai, ia gwau: “Iehova ena Witnes taudia edia ladana oi gwauraia neganai, taunimanima momo be haraga momokani, idia hegaegae lasi horana ai edia iduara dekenai idia pidipidi haroro taudia idia laloa. Iehova ena Witnes taudia be ruma-ta-ruma-ta ai idia haroro bona taunimanima idia boiria edia orea lalonai idia vareai totona be edia orea idia habadaia sibona lasi, to unai be edia abidadama ena kara badana ta.”

[Maua]

Unai Maka Oi Itaia, A?

Inai atikol idauidau ai ita herevalaia gaudia amo, oi laloa hari inai negai daidia be Keristani korikori taudia edia maka idia hahedinaraia? Ena be grup bona tomadiho oreadia tausen momo be sibodia idia gwauraia Keristani taudia, to namona be Iesu ese ena hahediba taudia dekenai ia gwauraia hereva ita laloa, ia gwau: “Lau dekenai idia gwau, ‘Lohiabada e, Lohiabada e,’ taudia ibounai be guba Basileia lalonai do idia vareai lasi, to egu Tamana guba ai ia noho ena ura ia karaia tauna sibona be do ia vareai.” (Mataio 7:​21) Tamana ena ura idia karaia tomadiho oreana​—Keristani tomadiho korikorina ena maka idia abia oreana unai​—oi dibaia bona bamoa neganai, Dirava ena Basileia henunai hahenamo idauidau do oi moalelaia ela bona hanaihanai. Dirava ena Basileia bona ena hahenamo idauidau dekenai diba ma haida oi abia totona, Iehova ena Witnes taudia oi nanadaia.​​—Luka 4:​43.