DAHAKA dainai Rastafarian orea tauna ta ese ena huina ia utua bona kopi kurokuro taudia ia inai henia karana ia rakatania? Bona dahaka dainai dagedage momo tau matamata ta be drag idia hoihoilaia taudia durua totona moni ia gogoa karana ese ena mauri ia haidaua? Mani edia hereva ita laloa.

“Taunimanima inai henia karana lau rakatania.”​—HAFENI NGHAMA

MAURI LAGANI: 34

TANO: ZAMBIA

GUNA: RASTAFARIAN OREANA ENA MEMBA

EGU MAURI GUNANA: Zambia ena refugi kamepa ta lalonai lau vara. Tuari dainai egu sinana be Namibia ia heautania bona orea ta ladana South West Africa People’s Organization (SWAPO) ai ia vareai. Unai neganai South Africa gavamani ese Namibia ia lohiaia bona Rastafarian oreana ese gavamani idia tuari henia.

Lau matamata neganai, lagani 15 lalonai refuji kamepa idauidau ai lau noho. SWAPO kamepa aí idia noho matamata taudia be fridom tahua totona treinini idia abia. Politik dalanai ai idia hadibaia kopi kurokuro taudia ai inai henia totona.

Egu mauri lagani be 11 neganai kamepa ai idia noho dubu lalonai lau ura vareai, Roman Catholic, Lutheran, Anglican, ibounai be gabu tamona ai idia hebou. Pasto ta lau hereva henia to lau ia koua. Unai murinai lau abia dae Dirava ia noho lasi. Egu lagani be 15 neganai, Rastafarian oreana lau bamoa badina reggae miusiki lau ura henia, bona lau ura kara dika idia haheaukalaia noho Africa taudia edia mauri lau durua. Egu huina lau utua lasi, mariuana lau gaukaralaia, vamu lau ania lasi bona lau hekwarahi korema taudia edia fridom totona. To kara bodagadia lau manadalaia bona muvi dikadia lau itadia noho. Bona hereva dikadia lau gaukaralaia noho.

BAIBEL ESE EGU MAURI IA HAIDAUA DALANA: Lagani 1995, egu mauri lagani be 20 neganai, egu mauri ai do lau karaia gaudia lau lalohadailaia. Rastafarian oreana edia buka idauidau lau stadilaia. Haida ese Baibel ia herevalaia to ena anina ia hedinarai namonamo lasi. Unai dainai lau sibona ese Baibel lau duahia.

Gabeai, egu Rastafarian turana ta ese Iehova ena Witnes edia Baibel stadi buka ta be lau dekenai ia henia. Lau sibona be stadi bukana bona Baibel lau stadilaia hebou. Gabeai Iehova ena Witnes taudia ida Baibel lau stadilaia.

Ena be lau hekwarahi bada to kuku ania bona inuinu kekero karana lau rakatania. (2 Korinto 7:1) Egu toana lau hanamoa, huina lau utua, ponografi bona dagedage muvi lau itaia lou lasi bona hereva dikadia gwauraia karana lau hadokoa. (Efeso 5:3, 4) Danu, egu badu kopina kurokuro taudia dekenai lau rakatania. (Kara 10:34, 35) Taunimanima hapararaia miusiki bona egu hebamo gunadia lau rakatania, egu lalona do idia ania bona egu dala gunana dekenai lua idia hakaua lou garina.

Egu kara gunadia lau rakatania murinai, Iehova ena Witnes edia Kingdom Hall ta lau tahua bona idia lau noia edia tomadiho lau vareai totona. Baibel stadi idia karaia lau dekenai. To bapatiso lau abia gwauraia neganai Iehova ena Witnes ta ai lau lao totona, egu bese taudia idia moale lasi. Egu sinana ia gwau “Keristani” dubu ma ta oi bamoa be namo to Iehova ena Witnes lasi. Egu vavana, gavamani ena dagi bada tauna ta, ese lau ia gwauraia dika hanaihanai badina Witnes taudia lau bamodia.

To Iesu ese taunimanima ia kara henia dalana lau laloa bona ena heduru hereva lau abiadae neganai dagedage bona hevaseha herevadia lau haheaukalaia diba. Witnes edia hahediba herevadia bona Baibel ena hereva lau hahegeregeredia neganai lau diba tomadiho korikori lau davaria vadaeni. Baibel ena hahegani hegeregerena, sivarai namona idia harorolaia ma haida dekenai. (Mataio 28:19, 20; Kara 15:14) Bona politik karadia ai idia vareai lasi.​—Salamo 146:​3, 4; Ioane 15:17, 18.

NAMO LAU DAVARIA DALANA: Baibel ena hakaua herevadia lau dibaia bona badinaia dainai namo idauidau lau davaria. Hegeregere, mariuana lau ania lasi dainai, hua ibounai moni sisina momo lau negea kava lasi. Egu helt, lalona bona tauanina be idia namo idia lao.

Hari lau egu mauri be mai ena badina, lau be mero matamata neganai lau ura henia maurina be unai. To gau badana be, hari lau mamia lau be Dirava kahirakahira ai lau noho.​—Iamesi 4:8.

“Hari egu badu karana lau biagua diba.”​—MARTINO PEDRETTI

MAURI LAGANI: 43

TANO: AUSTRALIA

GUNA: DRAG HOIHOILAIA TAUNA

EGU MAURI GUNANA: Lau bada noho lalonai egu famili be gabu idauidau dekenai ia noho. Nega haida taoni maragidia, siti badadia bona nega haida daudau gabudia ai aboriginal misin lalonai ai noho. Nega namodia lau laloatao, hegeregere egu kasin bona vavadia ida—ai haoda, ai labana, eiava boomerang bona carving o gau ma haida ai karaia hebou.

Egu tamana be boksini tauna bona lau maragi neganai lau dekenai heatu ia hadibaia. Heatu be egu mauri dalana ta. Lau be tau matamata neganai ba dekenai lau inuinu momo. Egu turadia bona lau be heatu ai tahua. Nega haida kaia bona baseball bat ai gaukaralaia taunimanima 20 mai kahana ai heatu henia totona.

Drag bona wharf dekenai idia gaukara taudia ese idia henaoa kohu lau hoihoilaia moni abia totona. Danu, drag hoia taudia lau durua bona ipidi amo taunimanima lau hagaria drag moni idia henia totona. Egu tahua gauna be ala-ala tauna ai lau lao. Egu hereva badana be oi lau hamasea eiava lau oi hamasea.

BAIBEL ESE EGU MAURI IA HAIDAUA DALANA: Lau bada noho neganai Iehova ena Witnes taudia edia sivarai lau kamonai. Lau lalotao egu mauri lagani be 20 mai kahana neganai, egu sinana lau nanadaia bema Witnes ta ia noho gabuna ia diba eiava lasi. Dina rua murinai Dixson ese egu iduara dekenai ia pidipidi. Ai herevahereva murinai invateisen ia henia Iehova ena Witnes edia hebou lao henia totona. Unai negana amo ema bona hari, lagani 20 lalonai, hebou lau reaia lasi. Baibel amo Witnes taudia ese egu henanadai ibounai edia haere idia henia.

Lau moale badina lau diba Iehova be taunimanima ibounai ia laloa, kara dika taudia danu. (2 Petero 3:9) Ena be taunimanima idia ura lasi lau idia naria to, lau davaria ia be lalokau Tamana bona lau do ia naria. Danu, lau moale badina lau diba bema egu mauri dalana lau haidaua ia ese egu kara dika do ia gwauatao. Baibel siri Efeso 4:22-24 lau laloa. Ia gwau “emui kara gunana umui kokia” bona “kara matamata umui atoa be namo, unai kara be Dirava ena ura hegeregerena ia vara.”

Egu mauri dalana lau haidaua haraga lasi. Wiki lalonai drag lau abia lasi, to egu turadia ida lau hebou neganai drag lau abia. Lau diba, bema lau ura egu mauri lau hanamoa, gau badana be egu turadia lau rakatania, unai dainai siti ma ta dekenai lau lao. Egu laolao dekenai egu turadia haida idia ura lau idia bamoa bona unai lau abiadae. Ai lao noho neganai mariuana idia gaukaralaia matamaia bona lau dekenai haidia idia henia. To idia lau hamaoroa lau ura unai kara lau rakatania, bona siti ena border dekenai ai parara. Gabeai lau kamonai egu turadia ese ipidi idia gaukaralaia banika dekenai moni idia henaoa totona.

NAMO LAU DAVARIA DALANA: Lau egu turadia lau rakatania dainai egu mauri gunana lau haidaua haraga. Lagani 1989 bapatiso lau abia bona Witnes ai lau lao. Bapatiso lau abia murinai egu taihuna, egu sinana bona egu tamana be lau ida Iehova ena hesiai gaukara ai karaia hebou.

Hari lau egu headava laganidia ibounai be 17 bona lau egu natudia be toi. Ena be ta ese lau dekenai ia hevasehalaia to lau badu lasi. Hari lau ese ‘iduhu ibounai, kopina bona gado idauidau’ taudia lau lalokau henia karana lau dibaia vadaeni. (Apokalupo 7:9) Lau laloa Iesu ena hereva be momokani lau dekenai. Ia gwau: “Bema egu hereva umui badinaia, umui be momokani egu hahediba taudia, bona umui be hereva momokani do umui diba, bona hereva momokani ese umui do ia ruhaia.”​—Ioane 8:​31, 32.

[Blurb]

Mauri gunana haidaua totona bese laloa maragi karana ia hagoadaia miusiki ita dadaraia

[Blurb]

Egu turadia bona lau be heatu ai tahua. Nega haida kaia bona baseball bat ai gaukaralaia taunimanima 20 mai kahana ai heatu henia totona.