Luka 2:1-52
2 Unai nega ai, Kaisara* Augusto ese oda herevana ta ia halasia, taunimanima ibounai* ese edia ladana idia torea totona.
2 (Kurenio be Suria ena gavana neganai, unai be nega ginigunana taunimanima ese edia ladadia idia torea.)
3 Vadaeni taunimanima ibounai be edia taoni ta ta dekenai idia lao matamaia edia ladana idia torea totona.
4 Iosepa danu be Davida ena bese tauna ta dainai, Galilea ena taoni Nasareta amo ia lao Iudea, Davida ena taoni ladana Betelehema dekenai,
5 ia bona Maria edia ladana torea totona. Unai nega ai, Maria be Iosepa ena adavana ai ia lao vadaeni, bona kahirakahira do ia mara.
6 Unuseniai idia do noho lalonai, ena mara negana ia ginidae.
7 Vadaeni iena natuna mero roboana ia havaraia, bena dabua amo ia kumia, bona animal idia ubua gabuna ai ia hahekurea, badina laolao taudia idia noho rumadia edia daiutu ibounai idia honu.
8 Danu unai gabu ai, mamoe naria taudia be murimuri ai idia noho bona hanuaboi ai edia mamoe idia gimaia.*
9 Bena karaharaga Iehova ena aneru be idia badinai ia gini bona Iehova ena hairai ese idia ia hagegea bona idia gari dikadika.
10 To aneru be idia dekenai ia gwau: “Umui gari lasi, badina lau mai, umui dekenai taunimanima ibounai ese do idia moalelaia bada sivarai namona lau gwauraia totona,
11 badina hari dina Davida ena taoni lalonai, umui do ia hamauria tauna, Keriso Lohiabada be ia vara.
12 Bona umui dekenai toa be inai: Do umui itaia, beibi ta be dabua amo idia kumia bona animal idia ubua gabuna dekenai ia hekure.”
13 Bona karaharaga aneru momo herea* idia mai bona unai aneru badinai idia gini, bona Dirava idia hanamoa, idia gwau:
14 “Atai momokani Diravana hanamoa, bona tanobada ai ia lalonamo henia taudia ese maino do idia abia.”
15 Vadaeni aneru be mamoe naria taudia idia rakatania bona guba dekenai idia lao neganai, mamoe naria taudia be ta ta dekenai idia gwau: “Namona be Betelehema dekenai ita lao haraga bona ia vara gauna ita itaia, Iehova ese ita dekenai ia hadibaia hegeregerena.”
16 Vadaeni idia lao haraga bena Maria, Iosepa, bona beibi idia davaria, bona beibi be animal idia ubua gabuna dekenai ia hekure.
17 Ia idia itaia neganai, aneru ese ia totona ia gwauraia herevana be idia dekenai idia gwauraia.
18 Bona idia kamonai taudia ibounai be mamoe naria taudia edia hereva dekenai idia hoa.
19 To Maria be unai hereva ibounai ia laloa noho, bona ena kudouna ai edia anina ia laloa dobu.
20 Vadaeni mamoe naria taudia idia giroa lou, bena idia kamonai bona itaia gaudia ibounai dainai Dirava idia hanamoa, guna idia dekenai ia hadibaia hegeregerena.
21 Vadaeni dina namba 8 murinai, mero ena kopina idia utua negana ia ginidae neganai, ena ladana idia hatoa Iesu. Maria ia do rogorogo lasi neganai, aneru ese unai ladana ia henia vadaeni.
22 Danu, Mose ena Taravatu hegeregerena, edia hagoevaia negana ia ginidae neganai, unai natuna be Ierusalema dekenai idia abia lao, Iehova dekenai idia henia totona.
23 Unai be Iehova ena Taravatu dekenai idia torea hegeregerena: “Natuna mero roboadia ibounai be Iehova dekenai idia gwauhamatalaia.”
24 Bona Iehova ena Taravatu hegeregerena, idia ese boubou gauna idia henia: “Uda pune manu rua eiava pune manu maragidia rua.”
25 Ierusalema dekenai tau ta ladana Simeona ia noho, ia be kara maoromaoro tauna bona Dirava ia gari henia. Dirava ese Israela do ia hagoadaia negana ia naria noho, bona ia be lauma helaga ena hahekau henunai ia noho.
26 Danu, Dirava ese lauma helaga amo ia dekenai ia hahedinaraia, ia do mase lasi neganai ia ese Iehova ena Keriso do ia itaia.
27 Lauma helaga* ena hakaua henunai ia be dubu helaga dekenai ia vareai bona Iesu ena tama sina be dubu helaga lalonai ia idia mailaia, unai amo Taravatu ese natuna maragina totona ia gwauraia gauna, idia karaia diba.
28 Vadaeni Simeona ese natuna ia rosia bona Dirava ia hanamoa, ia gwau:
29 “Siahu Ibounai Lohiabada e, emu hereva hegeregerena, emu hesiai tauna be mai maino ida do ia mase,
30 badina egu matana ese emu hahemauri dalana ia itaia vadaeni.
31 Unai dala be taunimanima ibounai vairanai oi hahedinaraia.
32 Ia be bese idauidau ia koua diburana do ia kokia diarina, bona ia be emu taunimanima Israela edia hairai.”
33 Bona Simeona ese natuna totona ia gwauraia herevadia be ena tamana bona sinana ese idia laloa noho.
34 Danu, Simeona ese ia hanamodia, bona iena sinana Maria dekenai ia gwau: “Israela taudia momo be ia dainai do idia moru bona do idia gini lou. Bona momo ese ia do idia dadaraia,
35 unai amo taunimanima momo edia kudouna ai idia laloa gaudia do idia hedinarai. To oi dekenai unai be hegeregere tuari kaia latana amo oi* idia gwadaia.”
36 Vadaeni peroveta hahinena ta Ana ia noho, ia be Penuela ena natuna, Asere iduhuna amo. (Inai hahine be ia kekeni neganai ia headava bona ena adavana ida lagani 7 sibona ia noho, bona hari ia buruka vadaeni.
37 Bona ia vabu bona ena mauri lagani be 84.) Ia be hanaihanai dubu helaga dekenai ia lao bona dina bona hanuaboi hesiai gaukara helagana ia karaia, ia anivaga bona ia guriguri goadagoada.
38 Unai nega ai idia dekenai ia mai, bona Dirava ia tanikiu henia matamaia bona Ierusalema ena hahemauri idia naria taudia ibounai dekenai unai natuna ia herevalaia.
39 Vadaeni, Iehova ena Taravatu hegeregerena gau ibounai idia karaia murinai, edia taoni Nasareta dekenai idia giroa lou, unai be Galilea ai.
40 Bona unai natuna maragina ia tubu daekau, ia goada bona ena aonega ia bada ia lao. Bona Dirava ese ia lalonamo henia noho.
41 Iena tama sina be vaia lagani ta ta ai Ierusalema dekenai idia lao, Pasova aria totona.
42 Bona iena mauri lagani be 12 neganai, vaia idia karaia bamona, aria totona idia daekau lao.
43 Bona aria ia ore bona idia giroa lou neganai, Iesu be Ierusalema dekenai ia noho bona ena tama sina be unai idia diba lasi.
44 Idia laloa ia be idia lao hebou taudia huanai ia noho bona dina ta ena laolao murinai, edia varavara bona turadia huanai ia idia tahua matamaia.
45 To ia idia davaria lasi, vadaeni Ierusalema dekenai idia giroa lou, ia idia tahua totona.
46 Bena dina toi murinai dubu helaga lalonai ia idia davaria, ia be hadibaia taudia huanai ia helai bona edia hereva ia kamonai bona idia dekenai henanadai ia henia.
47 To ia idia kamonai henia taudia be iena laloparara karana bona haere dekenai idia hoa.
48 Vadaeni ia idia itaia neganai idia hoa bada bona ena sinana be ia dekenai ia gwau: “Natugu e, dahaka dainai ai dekenai inai bamona oi karaia? Lau bona emu tamana be mai lalohekwarahi bada ida oi ai tahua noho.”
49 To idia dekenai ia gwau: “Dahaka dainai lau umui tahua? Umui diba lasi lau be egu Tamana ena ruma dekenai lau noho be namo, ani?”
50 To ena hereva ena anina idia lalopararalaia lasi.
51 Bena idia ida Nasareta dekenai ia giroa lou bona idia henunai ia noho. Danu, ena sinana ese unai hereva ibounai be ena kudouna dekenai ia atoa.
52 Bona Iesu ia tubu daekau, ena aonega ia bada ia lao bona Dirava bona taunimanima ese ia idia ura henia bada.
