Luka 13:1-35
13 Unai nega ai, unuseniai idia noho taudia haida ese Iesu idia hadibaia, Pilato ese boubou idia henia Galilea taudia ia aladia.
2 Vadaeni idia ia haere henia, ia gwau: “Umui laloa unai Galilea taudia edia kara dika ese Galilea taudia oredia edia kara dika ia hereaia dainai, unai gaudia be idia dekenai ia vara, a?
3 Umui lau hamaoroa, lasi momokani, to bema umui helalo-kerehai lasi, idia bamona umui ibounai do umui mase.
4 Eiava Siloama dekenai ia noho kohorona ta be taunimanima 18 latanai ia moru bona ia hamasedia, umui laloa unai ia vara badina edia kara dika* ese Ierusalema ai idia noho taudia edia kara dika ia hereaia, a?
5 Umui lau hamaoroa, lasi momokani, to bema umui helalo-kerehai lasi, idia bamona umui ibounai do umui mase.”
6 Vadaeni inai parabole ia gwauraia: “Tau ta be ena vain uma dekenai fig auna ia hadoa, bona ia mai huahua ia tahua, to ta ia davaria lasi.
7 Bena vain uma naria tauna dekenai ia gwau: ‘Lagani toi lalonai lau mai inai fig auna dekenai huahua lau tahua, to ta lau davaria lasi. Utua oho! Dahaka dainai tano dekenai ia tubu kava, bona huahua ta ia havaraia lasi?’
8 Ia haere ia gwau: ‘Biaguna e, inai lagani ai danu ita rakatania, bona ena badina tano do lau geia bona boromakau ena tage do lau atoa.
9 Bona bema vaira negai huahua ia atoa, ia namo, to bema lasi, vadaeni do oi utua.’ ”
10 Sabati dinana ai Iesu be sinagoga ta dekenai ia hadibaia noho.
11 Bona hahine ta be lagani 18 lalonai demoni ena siahu dainai ia gorere, ena doruna ia kwaidu bona ia gini maoromaoro diba lasi.
12 Iesu ese unai hahine ia itaia neganai, ia dekenai ia gwau: “Hahine e, emu gorere amo oi lau ruhaia.”
13 Bona ena imana be unai hahine latanai ia atoa bena hahine ena doruna ia maoromaoro bona Dirava ia hanamoa matamaia.
14 Unai dainai sinagoga ena ofesa be ia moale lasi, badina Iesu be Sabati dinana ai gorere ia hanamoa, bona hutuma dekenai ia hereva matamaia, ia gwau: “Dina 6 idia noho gaukara umui karaia totona. Unai dainai unai dinadia ai umui mai bona gorere do ia hanamoa, to Sabati dinana ai lasi.”
15 To, Lohiabada be ia dekenai ia haere, ia gwau: “Koikoi taudia e, Sabati dinana ai emui boromakau eiava doniki be animal atoa rumana amo umui ruhaia bona umui hakaua lao ranu umui henia totona, ani?
16 Vadaeni, inai hahine, Aberahamo ena bese amo, be lagani 18 lalonai Satani ese ia guia, bona Sabati dinana ai ia lau ruhaia be kerere, a?”
17 Unai gaudia ibounai ia gwauraia neganai, ena inai taudia ibounai idia hemarai, to hutuma be ia karaia kara namodia ibounai dainai idia moale.
18 Unai dainai ma ia gwau: “Dirava ena Basileia be dahaka bamona, bona ia be dahaka ida do lau hahegeregerea?
19 Ia be mastadi* uhena bamona, tau ta ese ia abia, ena uma dekenai ia hadoa bena ia tubu bona au ta ai ia lao bona guba manudia idia mai bona ena rigi dekenai idia noho.”
20 Bona ma ia gwau: “Dirava ena Basileia be dahaka ida do lau hahegeregerea?
21 Ia be hatubua muramura bamona, hahine ta ese ia abia bona disi badadia toi lalonai ia noho paraoa ena bada hegeregerena ida ia mikisia,* ela bona paraoa ibounai ia tubu.”
22 Bona Iesu be Ierusalema ia lao noho lalonai, taoni bona hanua ta ta ai ia hadibaia.
23 Vadaeni tau ta be ia dekenai ia gwau: “Lohiabada e, haida sibona ese hahemauri do idia abia, a?” Idia dekenai ia gwau:
24 “Do umui hekwarahi bada iduara maragina amo umui vareai totona, badina umui lau hamaoroa, momo be dala do idia tahua vareai totona, to do idia hegeregere lasi.
25 Ruma tauna ia toreisi bona iduara ia lokaia neganai, umui be murimuri dekenai umui gini bona iduara dekenai umui pidipidi matamaia, umui gwau, ‘Tau badana e, mani iduara oi kehoa.’ To umui do ia haere henia, ia gwau: ‘Lau diba lasi umui be daidia.’
26 Bena do umui hereva matamaia, umui gwau: ‘Oi vairanai ai aniani bona ai inuinu, bona oi be emai dala badadia dekenai oi hadibaia.’
27 To umui dekenai do ia hereva, ia gwau: ‘Lau diba lasi umui be daidia. Umui dika karaia taudia e, lau amo umui siri!’
28 Aberahamo, Isako, Iakobo, bona peroveta taudia ibounai be Dirava ena Basileia lalonai do umui itaia, to umui be murimuri dekenai idia negea vadaeni. Unai neganai, do umui taitai bona emui isena do umui koria.
29 Danu, taunimanima be ist, west, not, bona saut kahana amo do idia mai bona Dirava ena Basileia lalonai aniani patana dekenai do idia helai.
30 Unai dainai idia gabeai taudia be do idia guna bona idia guna taudia be do idia gabeai.”
31 Unai neganai, Farisea taudia haida be ia dekenai idia mai bona idia gwau: “Inai gabu oi rakatania bona oi lao, badina Heroda* ia ura oi ia alaia mase.”
32 Bona idia dekenai ia gwau: “Umui lao bona unai koikoi tauna* umui hamaoroa, ‘Hari bona kerukeru lau be demoni do lau lulua bona gorere do lau hanamoa bona egu gaukara be dina ihatoina ai do ia ore.’
33 To hari, kerukeru, bona murina dinana ai do lau lao, badina peroveta tauna be Ierusalema murimuriai do idia hamasea be maoro lasi.
34 Ierusalema e, Ierusalema e, peroveta taudia oi alaia mase bona oi dekenai idia siaia taudia be nadi amo oi hodoa mase. Nega momo lau ura emu natudia lau haboua, kokoroku ese ena natudia be ena apena henunai ia haboua hegeregerena. To umui ura lasi!
35 Vadaeni emui dubu helaga* be do ia noho kava. Umui lau hamaoroa, umui ese lau do umui itaia lasi ela bona umui gwau: ‘Iehova ena ladanai ia mai tauna be Ia ese ia hanamoa!’ ”
