Dirava ese ia gwauatao diba lasi kara dikana ena anina be, ta ia karaia kara dika sibona lasi, to ia laloa gaudia dainai Dirava ese ena kara dika do ia gwauatao lasi. Edena dala ai ta be unai bamona kara ia hahedinaraia diba?

 Dirave ese kara dika amo idia helalo-kerehai, edia mauri lalonai ena taravatu idia badinaia bona Iesu Keriso idia abidadama henia taudia edia dika ia gwauatao. (Kara 3:19, 20) To, bema tau ta be mai lalona ibounai ida kara dikana ia karaia noho, do ia auka ena kara ia haidaua totona. Baibel ia gwau unai bamona tauna dekenai “kudou dikana” ia noho, bona ‘kara dika ena koikoi siahuna ese ena kudouna ia ha-aukaia.’ (Heberu 3:​12, 13) Raro be Kiln eiava oven ai idia hamaoromaoro totona idia gabua, to ia auka dainai idia haidaua diba lasi hegeregerena, kara dika ia karaia tauna ena kudouna ia auka dainai, Dirava ena inai tauna ai ia lao diba. (Isaia 45:9) Unai bamona tauna gwauatao dalana ta be lasi, unai dainai Dirava ese ena kara dika do ia gwauatao lasi.​​—Heberu 10:26, 27.

 Iesu ena negai idia noho Iuda dubu gunalaia taudia haida be Dirava ese ia gwauatao diba lasi kara dikana idia karaia. Idia diba Dirava ena lauma helaga ena siahu amo Iesu ese hoa karadia ia karaia, to mai koikoi ida idia gwau, Iesu be Satani Diabolo ena siahu amo unai ia karaia.​​—Mareko 3:22, 28-30.

Dirava ese ia gwauatao diba kara dika haida ena haheitalai

•  Ta ia diba lasi dainai Dirava ena ladana ia hadikaia. Guna aposetolo Paulo be Dirava ena ladana ia hadikaia, to gabeai ia gwau: “Ia ese lau dekenai hebogahisi ia hahedinaraia, badina lau diba lasi bona mai abidadama lasi ida lau kara.”​​—1 Timoteo 1:13.

•  Heudahanai. Baibel ese ia hahedinaraia guna haida be heudahanai karana idia karaia, to edia kara idia haidaua dainai Dirava ese edia dika ia gwauatao.​​—1 Korinto 6:​9-​11.

“Lau be gwauatao diba lasi kara dikana lau karaia, a?”

 Bema guna oi karaia kara dikadia oi inai henia bona oi ura bada emu kara oi haidaua, vadaeni Dirava ese emu kara dika ia gwauatao diba. Ena be kara dika ta ita karaia loulou, to bema iseda kudouna ita ha-aukaia lasi, Dirava ese ita ia gwauatao diba.​​—Isaia 1:18.

 Haida be guna idia karaia kara dikadia idia lalohisihisilaia momo, bona idia abia dae Dirava ese edia kara dika do ia gwauatao lasi. To, Baibel ia hahedinaraia iseda kudouna ese ita ia koia diba. (Ieremia 17:9) Dirava ese ita dekenai gwaumaoro ia henia lasi, ita sibona bona ma haida, ita hahemaoro henia totona. (Roma 14:4, 12) Dirava ese iseda dika ia gwauatao diba, ena be iseda kudouna ese ita ia kota henia.​​—1 Ioane 3:19, 20.

Iuda Iskariote be Dirava ia gwauatao diba lasi kara dikana ia karaia, a?

 Oibe. Iena mataganigani karana ese ia doria dainai, mai anina bada gaukaradia totona idia atoa moni ia henaoa. Bona koikoi dalanai ogogami taudia ia laloa bada, to ena badina korikorina be ia ura moni ma haida ia henaoa. (Ioane 12:​4-8) Iuda be mai kudouna ibounai ida kara kereredia ia karaia dainai, siliva moni 30 abia totona Iesu ena mase dala ia karaia. Iesu ia diba Iuda be ia karaia karadia dainai do ia helalo-kerehai lasi, unai dainai ia gwauraia “dika do ia davaria tauna.” (Ioane 17:12)Anina be Iuda ia mase neganai, ia be helaro lasi do ia toreisi lou totona.​​—Mareko 14:21.

 Iuda be ia karaia kara dika dainai ia helalo-kerehai lasi. Bona ena kara dika be Dirava dekenai ia gwauraia lasi, to ia ida palani idia karaia dubu gunalaia taudia dekenai ia gwauraia.​—Mataio 27:​3-5; 2 Korinto 7:​10.