yahoshoo 6:1-27
6 israeliyon ki vajah se yareeho ke faatak kaskar band kar diye gaye. na to koi shehar se baahar jaa sakta tha na hi andar aa sakta tha.+
2 tab yahova ne yahoshoo se kaha, “dekh! mainne yareeho ko, uske raja aur uske bade-bade yoddhaon ko tere haath kar diya hai.+
3 tu apne sabhi sainikon ke saath shehar ke chaaron or chakkar kaatna. har din shehar ka ek chakkar lagana aur aisa chhe din tak karna.
4 saat yaajkon se kehna ki woh haath mein ek-ek narsinga liye sandook ke aage-aage chalein. magar saatvein din shehar ke saat chakkar lagana aur yaajak narsinge foonkein.+
5 saatvaan chakkar poora hone par jaise hi narsinge ki aavaz sunayi de,* tu sabhi logon ke saath zordar aavaz mein yuddh ka ailan karna. tab yareeho ki sheharpanah gir jaayegi+ aur tum seedhe shehar mein ghuskar dhaava bol dena.”
6 tab noon ke bete yahoshoo ne yaajkon ko bulakar kaha, “tumhein karar ka sandook uthana hai aur saat yaajkon ko haath mein ek-ek narsinga liye yahova ke sandook ke aage-aage chalna hai.”+
7 yahoshoo ne logon se kaha, “tumhein aage badhkar shehar ke chaaron or chakkar lagana hai. hathiyarband sainikon+ ko yahova ke sandook ke aage rehna hai.”
8 yahoshoo ne jaisa kaha unhonne vaisa hi kiya. saat yaajak haath mein ek-ek narsinga liye yahova ke aage-aage chale aur narsinge foonkne lage. yahova ke karar ka sandook unke peechhe-peechhe aa raha tha.
9 hathiyarband sainik, narsinge foonknevale yaajkon ke aage gaye aur sandook ke peechhe-peechhe sainikon ka ek aur dal hifazat ke liye chala. is beech yaajak narsinge foonkte rahe.
10 yahoshoo ne logon ko aagya di, “tum chillana mat, tumhare munh se koi aavaz na nikle. jab tak main na kahoon, khaamosh rehna. jis din main kahoon ‘chillao!’ us din zor se chillana.”
11 yahoshoo ke kehne par yahova ka sandook lekar shehar ke chaaron or chakkar lagaya gaya. shehar ka ek chakkar kaatne ke baad log vaapas chhaavni mein aa gaye aur raat-bhar vahin rahe.
12 agle din yahoshoo subah-subah utha aur yaajkon ne yahova ka sandook liya+
13 aur saat yaajak apne-apne narsinge foonkte huye yahova ke sandook ke aage-aage chalne lage. unke aage hathiyarband sainik chal rahe the jabki yahova ke sandook ke peechhe-peechhe, sainikon ka ek aur dal hifazat ke liye chal raha tha. is dauran yaajak narsinge foonkte jaa rahe the.
14 doosre din bhi unhonne shehar ka ek chakkar kaata aur vaapas chhaavni mein aa gaye. chhe din tak unhonne aisa hi kiya.+
15 saatvein din ujala hote hi woh uthe aur unhonne har din ki tarah shehar ke chaaron or chakkar lagaya. magar is din unhonne shehar ke saat chakkar lagaye.+
16 saatvaan chakkar poora hote hi yaajkon ne narsinge foonke aur yahoshoo ne logon se kaha, “zor se chillao!+ yahova ne yah shehar tumhein de diya hai.
17 yah shehar aur ismein jo kuch hai us par yahova ka adhikar hai aur usne inhein naash ke laayak thehraya hai.+ sirf raahab+ veshya aur uske saath uske ghar mein jo koi hai, unhein zinda chhod dena kyonki raahab ne hamare jaasooson ko chhipaya tha.+
18 magar naash ke laayak thehrayi cheezon se tum door rehna.+ kahin aisa na ho ki tum unka laalach karne lago aur unmein se kuch le lo.+ agar tumne aisa kiya to israel ki chhaavni naash ke laayak thehregi aur hum par aafat aa padegi.*+
19 lekin sona-chaandi aur tambe aur lohe ki cheezen yahova ke khazane mein de dena.+ ye cheezen yahova ki nazar mein pavitra hain.”+
20 jab narsinge foonke gaye tab log zor se chillaye.+ narsingon ki aavaz sunkar unhonne zordar aavaz mein yuddh ka ailan kiya aur usi vakt yareeho ki sheharpanah gir gayi.+ woh seedhe shehar mein ghus gaye aur us par kabza kar liya.
21 unhonne boodhe-javan, aadmi-aurat, bail, bhed aur gadhe, sabko talvar se maar daala.+
22 ab yahoshoo ne un do aadmiyon se, jo desh ki jaasoosi karne gaye the kaha, “us veshya ke ghar jaao aur use aur uske gharane ke sab logon ko sahi-salamat baahar le aao, jaisa tumne usse shapath khaayi thi.”+
23 is par donon javan aadmi raahab ke ghar gaye aur woh raahab, uske maata-pita, uske bhaaiyon aur jo koi uske saath tha, haan, uske poore parivar ko le aaye.+ woh unhein sahi-salamat israel ki chhaavni ke baahar ek mehfooz jagah le gaye.
24 fir unhonne yareeho shehar aur uski saari cheezen jala daalin. lekin sona-chaandi, tambe aur lohe ki cheezen unhonne yahova ke khazane mein de di.+
25 aur yahoshoo ne raahab veshya, uske pita ke gharane aur jo koi raahab ke saath tha, unhein zinda chhod diya.+ raahab aaj bhi israel mein rehti hai+ kyonki usne un aadmiyon ko chhipaya tha jinhein yahoshoo ne yareeho mein jaasoosi karne bheja tha.+
26 us vakt yahoshoo ne yah shapath khaayi,* “jo aadmi yareeho shehar ko dobara khada karne ki koshish karega, us par yahova ka shaap padega. use iski bhaari keemat chukani padegi. agar usne iski ninv daali to uska pehalautha beta mar jaayega. aur agar usne iske faatak lagaye to uska sabse chhota beta mar jaayega.”+
27 is tarah yahova yahoshoo ke saath raha+ aur dharti ke kone-kone tak uska naam fail gaya.+
