yahoshoo 2:1-24
2 fir noon ke bete yahoshoo ne shitteem se+ do aadmiyon ko chupke se jaasoosi karne bheja aur unse kaha, “jaao jaakaar us desh ki, khaaskar yareeho ki khoj-khabar lekar aao.” woh donon jaasoos nikaal pade aur raahab naam ki ek veshya ke ghar aakaar thahre.+
2 yareeho ke raja ko kisi ne khabar di, “hamare desh ki jaasoosi karne aaj raat kuch israeli aadmi aaye hain.”
3 is par yareeho ke raja ne raahab ke paas yah sandesh bhijvaya, “jo aadmi tere ghar ruke hain, unhein baahar laa kyonki woh poore desh ki jaasoosi karne aaye hain.”
4 raahab ne un donon jaasooson ko chhipa rakha tha lekin usne raja ke aadmiyon se kaha, “kuch aadmi yahaan aaye to the magar mujhe nahin pata ki woh kahaan se the.
5 aur raat ko shehar ka faatak band hone se pehale woh shehar se nikaal gaye. pata nahin woh kahaan gaye, lekin agar tum fauran unke peechhe jaao to unhein pakad loge.”
6 (darasal raahab ne jaasooson ko chhat par bichhe alsi ke danthalon ke beech chhipa diya tha.)
7 is par raja ke aadmi unka peechha karne ke liye yardan ke ghaat ki taraf bhaage+ aur jaise hi woh shehar se nikle, shehar ka faatak band kar diya gaya.
8 isse pehale ki un do jaasooson ki aankh lag jaati, raahab unke paas chhat par aayi.
9 usne unse kaha, “main jaanti hoon ki yahova tumhein yah desh zaroor dega.+ tum logon ka dar hammein sama gaya hai+ aur tumhari vajah se sab nivasiyon ke hausle past ho gaye hain.+
10 kyonki hamne suna hai ki jab tum misra se nikle to yahova ne tumhare saamne laal saagar ka paani sukha diya.+ hamne yah bhi suna hai ki tumne yardan ke us paar* emoriyon ke donon raajaon seehon aur og ka kya haal kiya+ aur kaise unhein poori tarah naash kar diya.
11 yah sunkar hamare ji mein ji na raha. tumhari vajah se hamari himmat toot gayi kyonki hum jaan gaye ki tumhara parmeshvar yahova swarg aur prithvi ka parmeshvar hai.+
12 isliye ab yahova ki shapath khaao ki jaise mainne tum par kripa* ki hai, vaise hi tum mere pita ke gharane par kripa* karoge. mujhe koi aisi nishani do jisse mujhe yakeen ho ki tum apna vaada poora karoge.*
13 tum mere maata-pita, mere bhaai-behen aur unke gharane ke sab logon ki jaan bakhshana aur hamein maut ke munh se bachana.”+
14 is par un aadmiyon ne raahab se kaha, “agar hum apna vaada poora na karein, to tumhari jagah hamari jaan chali jaaye! bas tu kisi se yah mat kehna ki hum kyon aaye the. fir jab yahova hamein yah desh dega, to hum tere saath kripa* aur sachchai se pesh aayenge.”
15 iske baad raahab ne ek rassi ke sahare unhein khidki se neeche utar diya kyonki uska ghar sheharpanah ki deevar se sata hua tha. darasal uska ghar deevar ke oopar hi bana hua tha.+
16 raahab ne unse kaha, “tum pahadi ilake mein chale jaao aur teen din tak vahin chhipe raho taaki tumhara peechha karnevale tumhein dhoondh na sakein. jab woh shehar laut aayen, tab tum apne raaste chale jaana.”
17 jaasooson ne raahab se kaha, “toone hamse jo shapath li hai, hum usse bandhe hain.+
18 magar uske liye tujhe yah karna hoga: jab hum vaapas is desh mein aayenge to tu yah chamkeeli laal rassi is khidki par baandhna jisse toone hamein neeche utara hai. aur tu apne maata-pita, bhaaiyon aur apne pita ke gharane ke sab logon ko apne saath is ghar mein ikattha kar lena.+
19 agar tere ghar se koi baahar nikala aur maara gaya, to uske khoon ka dosh usi ke sir aayega aur hum nirdosh thehreinge. lekin agar koi ghar mein hote huye maara gaya, to uske khoon ka dosh hamare sir aayega.
20 aur haan, agar toone kisi ko bataya ki hum yahaan kyon aaye the+ to hum apni shapath se chhoot jaayenge.”
21 raahab ne kaha, “jaisa tumne kaha hai vaisa hi ho.”
fir usne unhein ravana kiya aur woh apne raaste chale gaye. iske baad, raahab ne khidki par chamkeeli laal rassi baandh di.
22 woh donon jaasoos raahab ke ghar se nikaalkar pahadi ilake mein chale gaye aur teen din tak vahin rahe jab tak ki unka peechha karnevale vaapas shehar nahin laut gaye. un aadmiyon ne har sadak par jaasooson ko dhoondha lekin woh kahin nahin mile.
23 iske baad, woh donon jaasoos pahadi ilake se neeche utre aur nadi paar karke noon ke bete yahoshoo ke paas aaye aur jo-jo ghata tha woh sab keh sunaya.
24 unhonne yahoshoo se kaha, “yahova ne woh desh hamare haath kar diya hai.+ hamari vajah se us desh ke saare nivasiyon ke hausle past ho gaye hain.”+
