doosra itihas 13:1-22
13 abiyah jab yahooda ka raja bana tab yaarobam ke raaj ka 18vaan saal chal raha tha.+
2 abiyah ne yarooshalem mein rehkar teen saal raaj kiya. uski maa ka naam meekayah tha,+ jo giba+ ke rehnevale uriel ki beti thi. abiyah aur yaarobam ke beech yuddh hua.+
3 abiyah taaleem paaye huye* 4,00,000 veer yoddhaon ko lekar yuddh karne gaya.+ aur yaarobam ne uska mukabla karne ke liye taaleem paaye huye* 8,00,000 veer yoddhaon ko tainat kiya.
4 abiyah, samaraim pahad par khada hua jo epraim ke pahadi pradesh mein hai aur usne kaha, “hey yaarobam aur poore israel, meri baat suno.
5 kya tum nahin jaante ki israel ke parmeshvar yahova ne daavid aur uske beton+ ke saath namak ka karar*+ karke israel ka raaj sada ke liye unhein de diya hai?+
6 magar nabat ka beta yaarobam,+ jo daavid ke bete sulaiman ka sevak tha, apne maalik ke khilaf khada hua aur bagavat karne laga.+
7 aur nikamme aur aalsi aadmi uske paas ikattha hote gaye. woh sulaiman ke bete rahoobiyam se zyada taakatvar nikle kyonki rahoobiyam chhota aur buzdil tha aur woh unke aage tik nahin paaya.
8 aur ab tum sochte ho ki tum yahova ke raaj ke khilaf khade ho sakoge, jo daavid ke beton ke haath mein hai kyonki tum ginti mein bahot zyada ho aur tumhare paas sone ke woh bachhde hain jinhein yaarobam ne banaya ki woh tumhare devta hon.+
9 tum logon ne yahova ke yaajkon ko bhaga diya+ jo haaroon ke vanshaj hain aur leviyon ko bhi bhaga diya aur unke badle khud hi doosre aadmiyon ko yaajak bana diya, jaise doosre deshon ke log karte hain.+ jo bhi ek bail aur saat medhe lekar aata hai,* woh un moorton ka yaajak ban jaata hai jo ishvar nahin hain.
10 lekin hamara parmeshvar yahova hai+ aur hamne use nahin chhoda hai. hamare yaajak haaroon ke vanshaj hain, jo yahova ki seva karte hain aur levi unki madad karte hain.
11 woh har din subah-shaam yahova ke liye hom-baliyaan chadhate hain taaki unka dhuaan uthe,+ sugandhit dhoop jalate hain,+ shuddh sone ki mez par rotiyon ka dher*+ rakhte hain aur har shaam sone ki deevat+ aur uske deeye jalate hain+ kyonki hamare parmeshvar yahova ki taraf hamari jo zimmedari banti hai use hum nibhate hain. magar tum logon ne use chhod diya hai.
12 ab dekho, sachcha parmeshvar hamare saath hai aur hamari aguvai kar raha hai. uske yaajak bhi hamare saath hain, jo tumhare khilaf yuddh ka ailan karne ke liye haath mein turhiyaan liye huye hain. israel ke aadmiyo, apne purkhon ke parmeshvar yahova se yuddh mat karo kyonki tum kaamyab nahin hoge.”+
13 magar yaarobam ne unke peechhe sainikon ko ghaat mein bithaya, isliye uska ek sena-dal yahooda ke saamne tha aur ghaat lagaye huye sainik peechhe the.
14 jab yahooda ke aadmi peechhe mude to unhonne dekha ki ab un par aage-peechhe donon taraf se hamla honevala hai. woh madad ke liye yahova ko pukarne lage+ aur yaajak zor-zor se turhiyaan foonkne lage.
15 fir yahooda ke aadmiyon ne zor se yuddh ki pukar lagayi. jab unhonne aisa kiya to sachche parmeshvar ne abiyah aur yahooda ke saamne yaarobam aur poore israel ko hara diya.
16 israeli yahooda ke saamne se bhaag gaye aur parmeshvar ne unhein yahooda ke aadmiyon ke haath mein kar diya.
17 abiyah aur uske logon ne itni maar-kaat machayi ki israel ke taaleem paaye huye* 5,00,000 sainik maare gaye.
18 is tarah israel ke logon ko neecha dikhaya gaya, jabki yahooda ke log taakatvar saabit huye kyonki unhonne apne purkhon ke parmeshvar yahova par bharosa rakha tha.+
19 abiyah, yaarobam ka peechha karta gaya aur usne yaarobam se kuch shehar le liye. usne betel+ aur uske aas-paas ke nagron par, yashana aur uske aas-paas ke nagron par aur epron+ aur uske aas-paas ke nagron par kabza kar liya.
20 abiyah ke raaj ke dauran yaarobam fir kabhi pehale ki tarah taakatvar nahin ban saka. iske baad yahova ne use saza di aur woh mar gaya.+
21 magar abiyah ka raaj mazboot hota gaya. kuch samay baad usne 14 aurton se shaadi ki+ aur uske 22 bete aur 16 betiyaan huin.
22 abiyah ki zindagi ki baaki kahani, usne jo-jo kaam kiye aur baatein kahin, unka byaura bhavishyavakta iddo ke lekhanon* mein likha hai.+
