Emwa Tito 3:1-15
3 Ongendere kubayibusa bachiche bufi, bakenge abarhegesi n’abakulu, babe tayari kukola buli kasi kenja,
2 nta muntu baderhage kubi, barhabaga bantu b’obuhaka si babe bantu banayunva abandi, bayerekane obwirhonzi bunene oku bantu boshi.
3 Bulala nerhu hali amango rhwaliri bihwinja, bantu barhakenga, bahabukire, baja ba buli nyifinjo na buli bintu by’okuchisimisa, rhwalilamire omu bubi n’obongwa, rhwaliri bantu babi bwenene banashombana.
4 Aliko amango obwinja bo Muchunguzi werhu Mungu n’obuzigire bwage oku bantu boshi buyerekanwa,
5 (arhali mpu bulala hali ebijiro binja byoshi-byoshi rhwakolere, s’aliko oku lukogo lwage), arhuchungula amango arhuyoza omu kurhuyerekeza ewa kalamo n’okurhujira bahyahya kugerera eroho lichesibwa.
6 Arhusheshera kw’elyola roho oku bunene kugerera Yesu Kristu Muchunguzi werhu,
7 omu kuntu enyuma w’okutangazwa oku rhuli banyakunali kugerera olukogo lwage rhurhalikwanene, rhube bantu bashokola akalamo k’esiku n’amango rhulangalire.
8 Ebila binwa bili bya kuchizerwa inandonzeze ogenderere kubikaziza, yi balala bagwerhe obwemere mu Mungu bachihangana kukola ebijiro binja. Ebila bintu bili binja binali by’akamaro oku bantu.
9 Aliko ochiyase obuhaka b’obuhwinja n’okulonza-lonza emyazi oku bilolere obuko bw’abantu, entonganyi n’entambala oku bilolere esheriya, bulala birhaherhe kamaro na ntacho bimalire.
10 Omuntu oli walerha ezindi-zindi nyigirizo, omuhe omukonge* ob’oburhanzi n’obwa kabiri, nk’arhayunvirhe wanachilanga kuye,
11 ey’onamenyere ok’omuntu oli nk’oyola ahabukire kurhenga omu njira y’okuli, ali agenderera omu byaha anachichirire olubanja.
12 Hanola ntuma Artema changwa Tikiko emunda oli, ochihangane ombugane e Nikopoli bulala nabwene oku yinagezeza echihe ch’emboho.
13 Ochihangane loshi kurhabala Zena oyinji amarhegeko bwenene na Apolo, omu kuntu nta chintu choshi-choshi babulage eju y’olugenzi lwabo.
14 Aliko abandi nabo bayige okuntu bakagenderera kuyerekana ebijiro binja, omu kuntu bagale kurhabala nka hamarhengerera obulagirire bwa juba-juba yi barhaba bantu barhaburha malehe.
15 Boshi bali haguma nani bakulamusize, nawe olamuse boshi barhuzigire omu bwemere.
Olukogo lwa Mungu rhurhalikwanene lube haguma nenyu mweshi.
Mahugulo m'efo
^ Ao “omulali.”
