Emwa Tito 1:1-16
1 Nyono Paulo muja wa Mungu na ntumwa ya Yesu Kristu. Namakuyandikira omu kukulikiza obwemere bwa balala Mungu achishogere, n’obumenyi burhaherhe magosa b’okuli bupatene n’obushwekerezi ku Mungu,
2 bunayimangire oku bulangalire bw’akalamo k’esiku n’amango Mungu orhakabesha alaganyize kurhenga mira.
3 Aliko omu kasanzi kage kakwanene, amenyeseze echinwa chage kugerera akasi k’okuhubiri nahabirwe omu kukulikiza erhegeko lyo Muchunguzi werhu, Mungu.
4 Tito mwana wani w’okuli eju y’obwemere rhushangirire, namakuyandikira ntya:
Ogwarhe olukogo rhurhalikwanene n’omurhula gurhengere emwa Darha Mungu na Kristu Yesu Muchunguzi werhu.
5 Nakulekaga e Krete y’ogorora ebintu birhaliri oku mustari n’okushimika abashamuka b’ebibaga mu ngasi vile, nk’oku nakubwiraga ojire:
6 Omushamuka akwanene kuba mulume orhali ku chisobe, ogwerhe mukazi muguma, n’abana bali omu bwemere barhagwerhe olugenzi lubi barhanali bigamba.
7 Bulala yewe nka muntu Mungu ashingize, omwimangizi akwanene kuba muntu orhali ku chisobe, arhabaga muntu orhaharhulwa, orhagaya juba-juba, orhali mulalu, orhasima ntambala,* orhajira obuhugu bw’enyungu arhakwanene,
8 s’ahubwe muntu onakaribisana, onasima ebinja, ogwerhe obwenge burhulerere, onakulikiza okunali, mwimana, onachigala,
9 onachishwekera bwenene oku chinwa ch’okuli* omu bufundi bwage b’okuyigiriza, omu kuntu agale kuheba abantu omurhima kugerera enyigirizo ziherhe enyungu n’okukalihira balala bali bapinga.
10 Bulala hali bantu banene bachijirire bigamba, banaderha ebinwa birhaherhe nda na mugongo, banarhebekana, ahanene balala banateteya erhegeko ly’okukatwa.
11 Bihemere okusiza abola bantu, bulala bali bagenderera kuhabula milala minene omu kuyigiriza ebi barhakwanene kuyigiriza, yi bapata enyungu zirhakwanene.
12 Muntu muguma mubo, omulebi wabo bowe bonyine, aliderhere ntya: “Amango moshi Abakrete banabesha, baba binyalubala bikalihire banaba bolokazi banalira obulafi.”
13 Ebyola binwa buli bukweri, che chirhumire ogenderere kubakalihira bwenene yi bagala kusera omu bwemere,
14 barhayunvirizaga engano z’Abayahudi n’amarhegeko m’abantu bali baleka okuli.
15 Ebintu byoshi biba bichere oku bantu bachere, aliko ku balala bazingire barhanaherhe bwemere, ntacho chiba chichere emwabo, bulala amawazo n’ezamiri zabo byoshi biba bizingire.
16 Banaderha wazi mpu bayinji Mungu, aliko banamulahira kugerera ebijiro byabo. Bali bantu bagayisize, barhakenga, barhanayemererwe na Mungu bulala nta chintu n’echiguma chinja banakola.
