Emwa Tito 2:1-15
2 Aliko woyo, ogenderere kuderha ebintu bipatene n’enyigirizo ziherhe echi zimalire.
2 Abalume bakala bashamukire bagwarhe olugero omu ngeso zabo, bachikengese, bagwarhe obwenge burhulerere, basere omu bwemere, omu buzigire, n’omu kulembera.
3 Konakuguma, abakazi bakala mbuguma bayerekane engeso ziyerekene oku bakengere Mungu, barhabaga bantu banakomerana, barhabaga baja b’amavu, si babe balimu b’ebinja,
4 yi bagala kuhanula* abakazi bachili bahya bazigire b’eba, bazigire abana babo,
5 bagwarhe obwenge burhulerere, olugenzi luchere, banakola akasi ahamwababo, benja, bakengere b’eba, y’echinwa cha Mungu chirhadukangwa.
6 Intyo kon’oko, ogenderere kuhanula abarhabana bagwarhe obwenge burhulerere,
7 eyi woyo oli wayerekana olwiganyo lw’ebijiro binja omu njira zoshi. Oyigirize enyigirizo zichere omu njira ekengeseze,
8 omu kukolesa ebinwa biherhe echi bimalire, birhakaderhwa kubi; omu kuntu balala bali bapinga bakozwe eshoni, eyi ntacho chibihire bakarhuderhako.
9 Abaja bakenge banahamwabo omu bintu byoshi, bachihangane kubasimisa, barhabashubizaga kubi,
10 barhagendaga bayiba, si bayerekane oku bali bantu bakachizerwa bwenene omu kuntu omu njira zoshi bapambe enyigirizo zo Muchunguzi werhu Mungu.
11 Bulala Mungu arhuyerekere olukogo lwage rhurhalikwanene, omu kulerha obuchunguke oku bantu ba buli buko.
12 Echola chirhuyigirize oku rhukwanene kukabulira hale ebijiro by’okurhakenga Mungu, enyifinjo z’elila gulu, rhugwarhe obwenge burhulerere, okunali, n’okuchihana loshi emwa Mungu mw’elila gulu libi,
13 oku rhunali rhwalindira obulangalire busimisize amango Mungu werhu mukulu nj’abonekana omu bukuze, na Yesu Kristu Muchunguzi werhu,
14 wachihanaga yewe yenyine oku bulonza y’arhuchungula omu buja b’okurhakenga amarhegeko omu njira zoshi, n’okuchicheseza abantu baba buhirhi bwage bw’akachiro, baherhe obushiru eju ya buli kasi kenja.
15 Ogenderere kuyigiriza ebila bintu, okuhira omurhima, n’okukalihira n’oburhwali boshi. Orhayemeraga omuntu yeshi-yeshi akubonerera.
Mahugulo m'efo
^ Ao “babayibuse ebi bakwanene kujira, babakomeze.”
