Otàn 115

Paladisi Yọyọ de to Aigba Ji

PỌ́N atin gaa, vounvoun whanpẹnọ, po osó ehelẹ po. Be file ma yọnwhanpẹ ya? Pọ́n lehe agbanlin to núdù to alọ ovi pẹvi lọ tọn mẹ do. Sọ pọ́n lehe kinnikinni po osọ́ lẹ po to ote to ogbé-mú lẹ ji do. Be hiẹ ma na jlo nado nọ owhé he taidi nọtẹn ehe gbè ya?

Jiwheyẹwhe jlo dọ hiẹ ni nọgbẹ̀ kakadoi to paladisi mẹ to aigba ji. Podọ, ewọ ma jlo dọ hiẹ ni mọ awufiẹsa gọna agbasa vivẹ he gbẹtọ lẹ nọ jiya etọn to egbehe gba. Biblu dopagbe na mẹhe na nọgbẹ̀ to paladisi yọyọ lọ mẹ lẹ dọmọ: ‘Jiwheyẹwhe na nọ hẹ yé. Okú ma nasọ tin ba, kavi avi, kavi awufiẹsa. Onú hoho lẹ ko juwayi.’

Jesu na hẹn ẹn diun dọ diọdo jiawu ehe mọ hẹndi. Be a yọ́n whenue e na jọ ya? To whenue e na de ylanwiwa po mẹylankan lẹpo po sẹ̀ sọn aigba ji godo wẹ. Flindọ, to whenue Jesu tin to aigba ji, e hẹn azọ̀n wunmẹwunmẹ gbọ na gbẹtọ lẹ, bo tlẹ sọ fọ́n oṣiọ lẹ sọnku. Jesu wà ehe nado do nuhe e na wà to aigba lọ blebu ji to whenue ewọ na lẹzun Ahọlu to ahọluduta Jiwheyẹwhe tọn mẹ hia.

Yí nukun homẹ tọn do pọ́n lehe nulẹ na jiawu do sọ to paladisi yọyọ lọ mẹ to aigba ji! Jesu po mẹdelẹ he ewọ de lẹ po na to gandu to olọn mẹ. Gandutọ ehelẹ na penukundo mẹlẹpo go to aigba ji bo nasọ hẹn ẹn diun dọ yé tindo ayajẹ. Gbọ mí ni pọ́n nuhe mí dona wà nado deji dọ Jiwheyẹwhe na na mí ogbẹ̀ madopodo to paladisi yọyọ etọn mẹ.

Osọhia 21:3, 4; 5:9, 10; 14:1-3.

Kanbiọ Oplọn Tọn Lẹ