KLISTIANI livi susu wẹ basi nudide ma nado nọ dù hùnwhẹ Noẹli tọn. Numọtolanmẹ tẹwẹ yé tindo gando nudide yetọn enẹ go? Be yé nọ mọdọ nude gbọ̀ emi go wẹ ya? Be ovi yetọn lẹ nọ mọdọ yè tẹ̀ nude yé wẹ ya? Pọ́n nuhe Kunnudetọ Jehovah tọn lẹ lẹdo aihọn pé dọ gando whẹho lọ go.

Ayiha zizedo Jesu Klisti ji: “Whẹpo n’do lẹzun Kunnudetọ Jehovah tọn, dopo vlavo wẹ n’nọ yì ṣọṣi. Eyin n’ka na yì, be hùnwhẹ Nọeli tọn kavi Paaki tọn whenu ján e na yin. Amọ́ etlẹ yin to whenẹnu, n’ma tlẹ nọ flinnu jẹ Jesu Klisti ji paali. Todin, n’masọ nọ dù Noẹli ba, amọ́ n’nọ yì opli Klistiani tọn lẹ whla awe to osẹ dopo mẹ, podọ n’tlẹ nọ plọn mẹdevo lẹ nuhe Biblu dọ gando Jesu go!”—EVE, AUSTRALIE.

Ayajẹ he nunamẹ nọ hẹnwa: “Homẹ ṣie nọ hùn taun eyin mẹde na mi nude he n’ma donukun etọn. N’nọ yiwanna nunina madonukun lẹ mimọyi! N’sọ yiwanna awuwiwlena kalti lẹ po yẹdide lẹ po nado na yé mẹdevo lẹ, na enẹ nọ hẹn homẹ yetọn hùn podọ e nọ na mi ayajẹ ga.”—REUBEN, IRLANDE DU NORD.

Alọgigọna mẹhe to hudo mẹ lẹ: “Homẹ mítọn nọ hùn nado dà núdùdù na mẹhe to azọ̀njẹ lẹ. Whedelẹnu, mí nọ hẹn vounvoun, akla kavi onú kleunkleun devo lẹ yì na yé, na yé nido vọ́ huhlọn mọyi. Mí nọ mọ awuvivi to mọwiwà mẹ, na mí gán yì dla omẹ mọnkọ lẹ pọ́n whedepopenu to owhe lọ gblamẹ.”—EMILY, AUSTRALIE.

Ayidedai pọmẹ tọn taidi whẹndo de: “Whenue whẹndo mítọn to ayidedai dopọ, dotẹnmẹ nọ hundote na ovi mítọn lẹ nado yọ́n ylọnẹn, tavẹ, tanyin, nafẹ, gọna ovi yetọn lẹ po mẹjitọ daho yetọn lẹ po dogọ to ninọmẹ dagbe de mẹ. To whenue e yindọ, e ma yin azán owhe tọn tangan de ji janwẹ mí dona basi tito mọnkọ te, mí ma nọ to kọgbidinamẹ glọ podọ hagbẹ whẹndo mítọn tọn lẹ nọ mọdọ mí wá dla yé pọ́n na mí yiwanna yé wutu wẹ.”—WENDY, ÎLES CAÏMANS.

Jijọho: “E nọ taidi dọ nususu wẹ dona yin wiwà to hùnwhẹ Noẹli tọn whenu sọmọ bọ omẹ vude poun wẹ nọ lẹnnupọndo jijọho ji. N’vò sọn ahun mẹ, na n’ko plọn nuhe Biblu dopà etọn na gbẹtọvi lẹ wutu. N’yọnẹn dọ ovi ṣie lẹ na duvivi sọgodo he gọ́ na ayajẹ de tọn.”—SANDRA, ESPAGNE