Dọnsẹpọ Jiwheyẹwhe

“Jiwheyẹwhe Nọ Yiwanna Nunamẹtọ Homẹhunnọ”

Nunina nankọ wẹ a na tindo pinpẹn-nutọn-yinyọnẹn nujọnu tọn na? Matin ayihaawe, suhugan mítọn lẹ sin homẹ wẹ na hùn nado mọ nunina de yí sọn nunamẹtọ he yin whinwhàn gbọn owanyi dali de dè kakati nido yin sọn mẹhe mọ ede to dandannu glọ kavi yin hinhẹn po huhlọn po nado wàmọ de dè. Na nuhe dù nunamẹ, mẹwhinwhàn yin nujọnu. E yin nujọnu na mí, bosọ yin nujọnu taun na Jiwheyẹwhe. Lẹnnupọndo hogbe gbọdo apọsteli Paulu tọn he yin kinkandai to 2 Kọlintinu lẹ 9:7 mẹ lẹ ji.

Naegbọn Paulu do kàn hogbe ehelẹ? E jlo na na tuli Klistiani Kọlinti tọn lẹ nado nọgodona azọ́n he to yinyin wiwà nado hẹn kọgbọ wá na yisenọ hatọ yetọn he tin to nuhudo mẹ to Jude lẹ. Be e tẹnpọn nado hẹn Kọlintinu lẹ po huhlọn po nado basi nunina lọ wẹ ya? Paali, kakatimọ e wlan dọmọ: “Mì gbọ omẹ dopodopo ni basi kẹdẹdile e ko magbe etọn to ahun etọn mẹ do, e ma yin po awuwhiwhle po kavi po huhlọn yí do hẹnmẹ po gba, na Jiwheyẹwhe nọ yiwanna nunamẹtọ homẹhunnọ.” Mì gbọ mí ni yí sọwhiwhe do lẹnnupọndo tudohomẹnamẹ ehe ji.

“Kẹdẹdile e ko magbe etọn to ahun etọn mẹ do.” Paulu dohia dọ Klistiani nugbo de nọ nanúmẹ na e ko magbe “to ahun etọn mẹ” nado wàmọ wutu. Enẹ dohia dọ Klistiani de nọ lẹnnupọn po sọwhiwhe po do nuhudo yisenọ hatọ etọn lẹ tọn ji. Weyọnẹntọ de dọ dọ, hogbe dowhenu tọn he yin lilẹdo “magbe” “bẹ linlẹn tito bibasi jẹnukọn tọn hẹn.” Enẹwutu, Klistiani nugbo de nọ lẹnnupọndo nuhudo yisenọ hatọ lẹ tọn ji, bo nọ kanse ede nuhe e sọgan wà nado gọalọ.—1 Johanu 3:17.

“E ma yin po awuwhiwhle po kavi po huhlọn yí do hẹnmẹ po gba.” Paulu donù aliho nunamẹ tọn awe he Klistiani lẹ dona dapana go, enẹ wẹ nunamẹ po awuwhiwhle po, podọ po huhlọn yí do hẹnmẹ po. To paa mẹ, hogbe Glẹki tọn he yin lilẹdo “awuwhiwhle” nọ zẹẹmẹdo “po awubla po.” Owe alọdlẹndonu tọn de basi zẹẹmẹ dọ, mẹhe nọ whleawu nado nanúmẹ “nọ tindo awubla to ahun mẹ na e nọ mọdọ emi to akuẹ hẹngu.” Mẹhe e nọ biọ dọ yè ni hẹn po huhlọn po nado nanúmẹ nọ mọdọ emi yin kọgbidina nado wàmọ. Mẹnu to mí mẹ na taun tọn wẹ na jlo nado mọ nunina de yí sọn mẹhe nọ whleawu kavi nọ yin hinhẹn po huhlọn po nado nanúmẹ de si?

“Jiwheyẹwhe nọ yiwanna nunamẹtọ homẹhunnọ.” Paulu to didohia dọ eyin Klistiani de basi dide nado nanúmẹ, e dona wàmọ po homẹhunhun po, enẹ wẹ po ayajẹ po. Na nugbo tọn, nunina he yin bibasi po mẹwhinwhàn he sọgbe po nọ hẹn ayajẹ wá. (Owalọ lẹ 20:35) Ayajẹ he nunamẹtọ homẹhunnọ de nọ tindo nọ họnwun na mẹdevo lẹ. Na nugbo tọn, hogbe lọ “homẹhunnọ” sọgbe taun nado dlẹnalọdo numọtolanmẹ homẹ tọn po awusọhia nukunta tọn he nunamẹtọ lọ nọ tindo po. Nunamẹtọ homẹhunnọ nọ hẹn homẹ mítọn hùn taun. E sọ nọ hẹn homẹ Jiwheyẹwhe tọn hùn ga. Lẹdogbedevomẹ devo dọmọ: “Jiwheyẹwhe nọ yiwanna mẹhe yiwanna nunamẹ lẹ.”—Contemporary English Version.

Hogbe gbọdo apọsteli Paulu tọn lẹ yin nunọwhinnusẹ́n de he nọ deanana Klistiani lẹ na nuhe dù nunamẹ. Vlavo mí to whenu mítọn, huhlọn, kavi nutindo mítọn lẹ yizan do mẹdevo lẹ tamẹ, mì gbọ mí ni nọ wàmọ sọn ahun mẹ wá podọ na mí nọ mọ ayajẹ nujọnu tọn to alọtútlú hlan mẹdevo lẹ mẹ wutu, titengbe mẹhe tin to nuhudo mẹ lẹ. Gbọnvona dọ nunamẹ to aliho enẹ mẹ na hẹn họmẹ mítọn hùn, e nasọ zọ́n bọ mí na họakuẹ na Jiwheyẹwhe dogọ, na ewọ yiwanna “nunamẹtọ homẹhunnọ.”

[Nudọnamẹ tangan lẹ to weda 8]

“Jiwheyẹwhe nọ yiwanna mẹhe yiwanna nunamẹ lẹ”