Lehe Hiẹ Sọgan Mọnukunnujẹ Biblu mẹ Do

2. Nọ Hia Ẹ po Ahundopo Po

Be e ko jọ pọ́n bọ họntọn de dọ onú agọ̀ na we gando mẹhe a ma mọ pọ́n de go ya? Whenuena a wá mọ mẹlọ to godo mẹ, be nuhe họntọn towe dọna we lẹ ma glọnalina we nado mọ nugopipe po jẹhẹnu dagbe mẹlọ tọn lẹ po ya? Nudopolọ sọgan jọ gando Biblu hihia go.

APỌSTELI Paulu na avase gando nuhe sọgan jọ go eyin mí gboawupo nado hia Biblu po ahundopo po. Paulu wlan gando Ju azán etọn gbè tọn delẹ go dọmọ: “Yẹn dekunnuna yé dọ yé tindo vivẹnu Jiwheyẹwhe tọn, ṣigba e ma gbọn ali oyọnẹn tọn gba.”—Lomunu lẹ 10:2.

Delẹ to Ju owhe kanweko tintan tọn enẹlẹ mẹ ma jlo na kẹalọyi nugbo he Owe-wiwe Heblu tọn lẹ zinnudeji hezeheze lọ dọ Jesu wẹ Mẹssia lọ. Jesu Nazalẹti tọn jẹ nubiọtomẹsi Owe-wiwe tọn he gando Mẹssia go lẹpo kọ̀n bosọ hẹn dọdai he gandego lẹpo di. Ṣogan, linlẹn agọ̀ he ko doadọ̀do to ahun Ju he nọgbẹ̀ to azán etọn gbè lẹ tọn mẹ glọnalina susu yetọn nado mọnukunnujẹ Ohó Jiwheyẹwhe tọn mẹ.

Etẹwẹ mí sọgan plọn sọn numimọ enẹ mẹ? Nujọnu wẹ e yin nado nọ hia Biblu po ahundopo po. Linlẹn agọ̀ kavi pọndohlan hẹngogo tọn sọgan glọnalina Biblu hiatọ de nado mọnukunnujẹ nugbo he e bẹhẹn lẹ mẹ.

 Di apajlẹ, wesetọ de he nọ plọnnumẹ gando sinsẹ̀n go to Caroline du Nord, États-Unis d’Amérique, dlẹnalọdo Biblu taidi “owe he gbẹtọ kàn de poun he bẹ pọndohlan gbẹtọvi tọn lẹ kẹdẹ hẹn, ehe susu yetọn sọta yede bọ depope to yé mẹ ma yin anademẹ dejidego de na gbẹzan mítọn.” Eyin mẹde pọ́n Biblu hlan taidi “owe he gbẹtọ kàn de poun” to whenuena e to hihia ẹ, be enẹ ma na sisẹ́ ẹ nado gbẹ́ anademẹ kavi nunọwhinnusẹ́n he e ma yiwanna lẹ dai ya?

To vogbingbọn mẹ, Biblu na tuli mí nado plọn Ohó Jiwheyẹwhe tọn po sọwhiwhe po. Owe-wiwe dọ gando Beleanu he nọgbẹ̀ to azán Paulu tọn gbè lẹ go dọmọ: “Yé kọ̀n ayiha dai do yí ohó lọ, bo nọ to Owe-wiwe lẹ dín egbesọegbesọ, eyin mọ wẹ onú nẹlẹ yin.” (Owalọ lẹ 17:11) Taidi Beleanu enẹlẹ, e sọgan biọ dọ hiẹ ni de ayihaawe kavi pọndohlan agọ̀ depope he sọgan glọnalina we nado mọnukunnujẹ Biblu mẹ sẹ̀ sọn ahun towe mẹ. Nọ hia Ohó Jiwheyẹwhe tọn po ahundopo po bo nọ to jejeji nado yọ́n owẹ̀n ojlofọndotenamẹ tọn he e bẹhẹn.