Kanbiọ lẹ sọn Wehiatọ lẹ Dè

Etẹwẹ tito owhe Jubile tọn heyin nùdego to Levitiku weta 25tọ mẹ nọtena?

Osẹ́n Mose tọn zinnudeji dọ to “owhe ṣinawetọ mẹ gbọjẹzan ogbọjẹ ayidego tọn de na tin to e mẹ na aigba lọ.” Islaelivi lẹ yin gbedena gando owhe enẹ go dọmọ: “Hiẹ ma na dó ogle towe kavi de alà na ovẹnpa towe gba. Enẹ he wú sọn ede mẹ sọn ojijẹ towe mẹ hiẹ ma na gbẹ̀n gba, podọ vẹnsinsẹ́n sọn vẹntin madèalọna towe lẹ mẹ hiẹ ma na bẹpli gba: e na yin owhe ogbọjẹ ayidego tọn de na aigba lọ.” (Levitiku 25:4, 5) Enẹwutu, owhe ṣinawetọ lẹpo wẹ dona nọ yin owhe Gbọjẹzan tọn de na aigba lọ. Podọ owhe 50tọ he bọdo owhe Gbọjẹzan tọn debọdo-dego ṣinawetọ lọ go dona nọ yin owhe Jubile tọn ga. Etẹwẹ dona nọ yin wiwà to owhe enẹ mẹ?

Jehovah dọna Islaelivi lẹ gbọn Mose gblamẹ dọmọ: “Mìwlẹ bo nasọ hiọ owhe [kandeaotọ; NW] lọ, bosọ lá mẹdekannujẹ gbọn aigba lọ ji jẹ tòmẹnu etọn lẹpo dè: e na yin Jubile de hlan mì; mìwlẹ bo nasọ lẹgọ omẹ dopodopo hlan nutindo etọn kọ̀n, podọ mì nasọ lẹgọ omẹ dopodopo hlan whédo etọn dè. Jubile de wẹ owhe kandeaotọ nẹ na yin hlan mì: mìwlẹ ma na dó, mọ mì ma na gbẹ̀n enẹ he wú sọn ede mẹ to e mẹ, kavi bẹ ovẹnsinsẹ́n lẹ pli to e mẹ sọn ovẹntin madèalọna lẹ lọ mẹ.” (Levitiku 25:10, 11) Jubile zẹẹmẹdo owhe Gbọjẹzan tọn debọdo-dego awetọ na aigba lọ. Ṣigba e nọ hẹn mẹdekannujẹ wá na tòmẹnu etọn lẹ. Juvi he ko yin sisà do kanlinmọgbenu lẹpo dona yin tuntundote. Ogú mẹdetiti tọn he mẹde sọgan ko yin hinhẹn gánnugánnu nado sà dona yin gigọjo na whẹndo etọn. Owhe Jubili tọn dona yin owhe hẹngọwa po mẹdekannujẹ po tọn to Islaeli hohowhenu tọn mẹ. Etẹwẹ ehe zẹẹmẹdo na Klistiani lẹ?

Tolivivẹ sunnu tintan lọ, Adam tọn hẹn gbẹtọvi biọ kanlinmọgbenu ylando tọn mẹ. Nuhe Jiwheyẹwhe wleawuna nado tún gbẹtọvi lẹ  dote sọn nuyiwadomẹji ylando tọn si wẹ avọ́sinsan ofligọ Jesu Klisti tọn. * (Matiu 20:28; Johanu 3:16; 1 Johanu 2:1, 2) Whetẹnu wẹ Klistiani lẹ nọ yin tuntundote sọn osẹ́n ylando tọn glọ? To hodidọ hlan Klistiani yiamisisadode lẹ mẹ, apọsteli Paulu dọmọ: “Osẹ́n sọn [gbigbọ] ogbẹ̀ tọn mẹ to Klisti Jesu mẹ ko hẹn mi vò to osẹ́n ylando po okú po tọn si.” (Lomunu lẹ 8:2) Mẹhe tindo todido gbẹninọ to olọn mẹ tọn lẹ nọ mọ mẹdekannujẹ ehe yí to whenuena yé yin amisisadode gbọn gbigbọ wiwe dali. Dile etlẹ yindọ yé gbẹsọ tindo agbasa mapenọ gbẹtọvi tọn, Jiwheyẹwhe nọ hia yé taidi dodonọ bo nọ yí yé taidi ovi gbigbọmẹ tọn etọn lẹ. (Lomunu lẹ 3:24; 8:16, 17) Taidi pipli de, Jubile bẹjẹeji na mẹyiamisisadode lẹ to Pẹntikọsti 33 W.M.

Etẹwẹ dogbọn “lẹngbọ devo,” he tindo todido gbẹninọ to aigba ji tọn lẹ dali? (Johanu 10:16) Gandudu Owhe Fọtọ́n Klisti tọn wẹ na sọawuhia nado yin ojlẹ hẹngọwa po mẹdekannujẹ po tọn na lẹngbọ devo lẹ. To Jubile Owhe Fọtọ́n tọn ehe whenu, Jesu na yí ale avọ́sinsan ofligọ etọn tọn lẹ zan na gbẹtọvi yisenọ lẹ bo na diọ nuyiwadomẹji ylando tọn lẹ. (Osọhia 21:3, 4) To vivọnu Gandudu Owhe Fọtọ́n Klisti tọn lọ tọn, gbẹtọvi lẹ na jẹ pipé kọ̀n bo na jẹ mẹdekannu mlẹnmlẹn sọn ylando po okú he yé dugu etọn po si. (Lomunu lẹ 8:21) To whenuena enẹ na ko yin wiwadotana, Jubile Klistiani lẹ tọn na wá vivọnu.

[Nudọnamẹ Odò Tọn]

[Yẹdide to weda 26]

Jubile Owhe Fọtọ́n tọn—ojlẹ hẹngọwa po mẹdekannujẹ po tọn na “lẹngbọ devo” lẹ