Be Jiwheyẹwhe Wẹ Dona Yin Whẹgbledo Na Nuhahun Mítọn lẹ Ya?

TO WHENUENA viyọnnu mẹho Marion tọn jiya awugble sinsinyẹn de tọn to apọ̀nmẹ, Marion wà nuhe suhugan mítọn na ko wà. a E hodẹ̀ hlan Jiwheyẹwhe bo biọ alọgọ. “Yẹn ma lẹndọ yẹn ko tindo numọtolanmẹ flumẹjijẹ po ṣokẹdẹ tọn po sọmọ pọ́n,” wẹ Marion dọ. To godo mẹ, ninọmẹ viyọnnu etọn tọn ylan pete, bọ Marion jẹ ayihaawe tindo ji to Jiwheyẹwhe mẹ. “Naegbọn ehe do to jijọ?” wẹ e kanse. E ma yọ́n nuhewutu Jiwheyẹwhe owanyinọ he nọ homẹtọnpọn na gbẹkọ ewọ go gba.

E mayin Marion kẹdẹ wẹ nọ tindo numọtolanmẹ mọnkọtọn gba. Mẹsusu lẹdo aihọn pé wẹ ko lẹndọ Jiwheyẹwhe ko gbẹkọ yé go to nuhahun lẹ whenu. “Yẹn ma ko yọ́n ‘nuhe zọ́n bọ JIWHEYẸWHE nọ jotẹnna ehelẹ,’ ” wẹ Lisa dọ to whenuena ovivi etọn sunnu yin hùhù. “Yise ṣie to Jiwheyẹwhe mẹ ma ko bu mlẹnmlẹn gba, ṣigba e ko depò.” Mọdopolọ, to whenuena nugbajẹmẹji ylankan de jọ do viyẹyẹ etọn sunnu go, yọnnu de dọmọ: “Jiwheyẹwhe ma miọnhomẹna mi po nujijọ ehe po gba. E ma do ohia depope hia mi dọ e nọ homẹtọnpọn gba.” Yọnnu lọ yidogọ dọmọ: “Yẹn ma na jona Jiwheyẹwhe gbede.”

Mẹdevo lẹ gblehomẹ do Jiwheyẹwhe go to whenuena yé mọ nuhe to jijọ lẹdo yé pé lẹ. Yé nọ mọ otò he ohẹ́n po huvẹ po to yasana lẹ, fibẹtado-dintọ awhàn tọn lẹ, ovi madosọha lẹ he SIDA ko hù mẹjitọ yetọn lẹ, podọ gbẹtọ livi susu lẹ he azọ̀n devo lẹ to yasana. To whenuena ehelẹ po nugbajẹmẹji devo lẹ po jọ, mẹsusu nọ gblewhẹdo Jiwheyẹwhe dọ e ma yí nude wà.

Ṣigba, nugbo lọ wẹ yindọ e mayin Jiwheyẹwhe wẹ dona yin whẹgbledo na nuhahun gbẹtọvi tọn lẹ gba. Na nugbo tọn, whẹwhinwhẹ́n dagbe lẹ tin nado yise dọ Jiwheyẹwhe na doalọtena oyà he yin hinhẹnwa whẹndo gbẹtọvi tọn ji lẹ to madẹnmẹ. Mí basi oylọna we nado hia hosọ he bọdego nado mọdọ Jiwheyẹwhe nọ hò mítọn pọ́n nugbonugbo.

[Nudọnamẹ Odò Tọn]