Be e ko jọ pọ́n bọ a jẹflumẹ na a ma yọ́n nuhe a sọgan wà nado gọalọna mẹde he to awubla na okú mẹyiwanna de tọn wutu ya? To whedelẹnu, mí sọgan nọma yọ́n nuhe mí na dọ kavi wà​—enẹwutu mí gbọ bo nọ hònúpla. Ṣigba, onú delẹ tin he mí sọgan wà nado gọalọ.

To paa mẹ, nuhe nọ yọ́n hugan wẹ nado yì otẹn lọ mẹ bo dọho homẹmiọnnamẹ tọn kleun de taidi, “Payido.” To fisusu, nado gbò mẹlọ fán kavi hẹn alọ go na ẹn yin nuyiwa homẹmiọnnamẹ tọn de he nọ yinuwadomẹji taun. Eyin mẹhe to aluẹmẹ lọ jlo na dọho, yí awuvẹmẹ do dotoaina ẹn. Hú popolẹpo, yí nude wà nado gọalọna whẹndo he to aluẹmẹ lọ, vlavo nado wazọ́n he mẹlọ ma penugo nado wà lẹ taidi nado danú, penukundo ovi lẹ go, kavi gọalọ nado basi tito ṣiọdidi tọn lẹ eyin e biọ domọ. Nuwiwa mọnkọtọn lẹ sọgan tindo kọdetọn dagbe taun hugan hodidọ poun.

To nukọn mẹ, a sọgan dọho gando mẹhe kú lọ go, vlavo nado donù jẹhẹnu dagbe kavi numimọ ayajẹ tọn he a tindo gando e go lẹ go. Hodọdopọ mọnkọtọn lẹ tlẹ sọgan hẹn homẹhun mẹhe to aluẹmẹ lọ. Di apajlẹ, Pam he asu etọn Ian kú to owhe ṣidopo die dọmọ: “To whedelẹnu, mẹdelẹ  nọ dọ nudagbe he Ian wà lẹ, ehe n’ma tlẹ yọnẹn gbede podọ e nọ vivi na mi.”

Dodinnanutọ lẹ na linlin dọ mẹhe to aluẹmẹ lẹ nọ mọ alọgọ susu yí to whenue omẹ yetọn kú tlolo, ṣigba họntọn lẹ nọ yawu wọnji nuhudo yetọn lẹ go dile ojlẹ to yìyì. Enẹwutu, basi tito nado nọ dọhodopọ hẹ mẹhe to aluẹmẹ de to gbesisọ mẹ to nujijọ lọ godo. * Susu mẹhe to aluẹmẹ lẹ tọn wẹ nọ yọ́n pinpẹn dotẹnmẹ hundote ehe tọn taun, na ehe nọ de awubla sinsinyẹn yetọn pò.

Pọ́n apajlẹ Kaori tọn, yèdọ awhli Japon-nù de he jẹflumẹ taun na onọ̀ etọn kú bọ to osun 15 godo, mẹdaho etọn yọnnu sọ kú ga. Ṣigba, họntọn nugbo lẹ ma jo e do paali. Dopo to yé mẹ wẹ Ritsuko he hú mẹho Kaori taun bosọ de nado yin họntọn vivẹ́ etọn. Kaori dọ dọ, “nado dọ hójọhó, linlẹn enẹ ma jlo mi. N’ma jlo dọ mẹdevo de ni yitẹn onọ̀ ṣie tọn, podọ n’ma lẹndọ mẹde sọgan súdo etọn. Etomọṣo, aliho he mẹ Mama Ritsuko yinuwa hẹ mi te zọ́n bọ mí wá vẹ́. To osẹ dopodopo mẹ, mí nọ zọnpọ yì kunnudegbe po opli Klistiani tọn lẹ po. E nọ basi oylọna mi nado hẹjó mi bo nọ hẹn núdùdù wá na mi bosọ nọ kanwehlan mi gbọzangbọzan. Pọndohlan dagbe Mama Ritsuko tọn yinuwado ji e taun.”

Owhe wiawe ko juwayi sọn whenue onọ̀ Kaori tọn kú, podọ wẹndagbe-jlatọ whenu-gigọ́ tọn wẹ ewọ po asu etọn po yin to egbehe. Etomọṣo, Kaori dọ dọ, “Mama Ritsuko gbẹ́ to ayidonugo na mi. Whedepopenu he n’lẹkọyi whé, n’nọ dla ẹ pọ́n janwẹ bosọ nọ duvivi gbẹdido mẹjlọdote tọn de hẹ ẹ.”

Mẹdevo he họntọn lẹ ma jodo paali wẹ Poli he yin Kunnudetọ Jehovah tọn to Chypre. Poli tindo asu homẹdagbenọ de he nọ yin Sozos, mẹhe nọ ze apajlẹ dagbe dai taidi Klistiani lẹngbọhọtọ de gbọn tọṣiọvi po asuṣiọsi lẹ po yiylọ wá owhé etọn gbè nado nọpọ́ bo dùnú hẹ yé dali. (Jakọbu 1:27) E blawu dọ nutitẹ̀ apọ̀nmẹ tọn de hù Sozos to whenue e tindo owhe 53. Poli dọmọ: “Asu nugbonọ he n’ko nọpọ́ hẹ na owhe 33 wẹ n’hẹnbu.”

To ṣiọdidi lọ godo, Poli sẹtẹn yì Canada po visunnu etọn pẹvi pete Daniel he tindo owhe 15 po. To finẹ, yé jẹ awukọndopọ hẹ agun Kunnudetọ Jehovah tọn lẹ tọn de ji. Poli flindọ, “họntọn he to agun ṣie yọyọ lọ mẹ lẹ ma yọ́n nudepope gando nuhe jọ do mí go po nuhahun mítọn lẹ po go. Etomọṣo, yé nọ dọnsẹpọ mí, nọ gbò mí fán, bo nọ yí hogbe he jọmẹ lẹ zan na mí bosọ nọ yí nude wà nado gọalọ. Lehe alọgọ enẹ họakuẹ na visunnu ṣie do sọ to ojlẹ enẹ he mẹ e tindo nuhudo otọ́ etọn tọn te hugan! Mẹhe to anadenanu to agun lọ mẹ lẹ do ojlo nujọnu tọn hia to Daniel mẹ. Dopo to yé mẹ tlẹ nọ plan Daniel hẹn nado yì dla họntọn lẹ pọ́n kavi nado yì hò bọlu.” To egbehe, visunnu lọ po onọ̀ etọn po to ninọmẹ dagbe mẹ.

Na nugbo tọn, aliho susu wẹ tin he mẹ mí sọgan yí nude wà nado gọalọ bo miọnhomẹna mẹhe to aluẹmẹ lẹ te. Biblu lọsu nọ miọnhomẹna mí po todido jiawu he e bẹhẹn gando sọgodo go po.