ZASEŊƆ 37
Baabule La N Tɔɣɛ Tuuma La Ligeri Yɛla Se’em
Tuuma la ligeri yɛla basɛ ti hon ka gisa? La ta’an ni kpe’em bo to ti to bisa tomesi ge kelum tara pu’usegɔ n di mi’a bɔ’ɔra Yehowa. Baabule la bo to la yɛm ka’aŋɔ n wan ta’an soŋɛ tɔ.
1. Baabule la tɔɣɛ tuuma yele la wani?
Naayinɛ boti la to tara pupeelum to tuuma poan. Baabule la yeti “sɛla ka boi n ani soŋa bɔ’ɔra nɛra gana ti a . . . tara pupeelum a tuun kpe’eŋo la poan.” (Pa’ala 2:24) Yehowa tuni mɛ paa. To san tɔɣesa en ge yee inya tuna a puurɛ wan pee mɛ, ti tomam me suure sukɛ.
Tuuma dela ninmɔ’ɔrɛ yele. Ge to kan malum basɛ ti to tuuma yele pakɛ tɔ gana Yehowa pu’usegɔ. (Yon 6:27) A biŋe nɔɔrɛ ti to san dekɛ eŋa yɛla deŋɛ nɛŋa to vom poan a me wan bisera tɔ inganɛ poan.
2. La nari ti to basɛ ti ligeri yɛla makɛ ma’a la wani?
Baabule la sakɛ ti ‘ligeri dela te’elego bunɔʼ ge la me ka’am tɔ ti ligeri ma’a kan ta’an basɛ ti to tara pupeelum. (Pa’ala 7:12) Baabule la kpemese to giila ti to da nɔŋɛ ligeri ge to tuɣum ‘basɛ ti sɛla ti to tara la seke to.’ (Kaalɛ Hebru 13:5.) To san basɛ ti sɛla ti to tara la seke to, to kan ba’a mu’ɛ nini ɛɛra ligeri. To wan gu tomesi sanyooro poan. (Magaha 22:7) To me wan le gu tomesi dɛŋa sɛka n boi loto la kɛkɛ ŋmɛ’a poan ti nɛreba kɔ’ɔn ɛɛra ti ba nyɛ ligeri tɔtɔ la.
3. To wan eŋɛ la wani bɔ’ɔra nɛreba yɛri yɛri?
Yehowa dela Naayinɛ n bo’ori yɛri yɛri. To me tɔɣeseri en mɛ to san ‘bɔ’ɔra yɛri yɛri ge tɔ̃ta to tari sɛla.’ (1 Timoti 6:18) To ta’an dekɛ to ligeri la soŋɛ tansugere la, la sɛba ti yele paɛ ba, yele yele wuu to mabiisi. Sɛla n pakɛ Yehowa dela sɛla zuo ti to bɔ’ɔra ge daɣɛ to bo zo’e se’em. To san yese to suure za’a bɔ’ɔra, to puurɛ wan pee ti Yehowa puurɛ me pee.—Kaalɛ Tooma 20:35.
VIISƐ PA’ASƐ
Bisɛ hon wan nyɛ nyuurɔ se’em ho san tuna maɣesa ge me basɛ ti hon tari sɛla la seke ho.
4. Basɛ ti hon tuni se’em la tara na’asegɔ bɔ’ɔra Yehowa
To tuni to tuuma se’em la wan pa’alɛ ti to dela Yehowa zɔdoma. Ŋmɛ VIDIYO la ge nyaa sɔsɛ sokere ana wa:
-
Vidiyo la poan, bem n basɛ ti hon puurɛ pee la Nsoh n tuni a tuuma se’em la?
-
A eŋɛ la bem ta’an tuna a tuuma maɣesa?
Kaalɛ Kolose 3:23, 24 ge nyaa sɔsɛ sokere wa:
-
Beni n sɔi ti to tuni to tuuma se’em la yele pakɛ?
Tuuma dela ninmɔ’ɔrɛ yele. Ge to kan malum basɛ ti to tuuma yele pakɛ to gana Yehowa pu’usegɔ
5. Nyuurɔ boi bim mɛ to san basɛ ti to tari sɛla la seke to
Nɛreba zo’e zo’e tiregeri mɛ ti ba bɔ ligeri. Ge Baabule la n ka’am to se’em la boi la de to’ore. Kaalɛ 1 Timoti 6:6-8 ge nyaa sɔsɛ sokere wa:
-
Baabule la kpemese to giila ti to ita la bem?
To san puɣum tara fii wa to wan ta’an kelum tara pupeelum. Ŋmɛ VIDIYO la ge nyaa sɔsɛ sokere ana wa:
-
Hali deodoma san puɣum ka tara ligeri, ba wan eŋɛ la wani tara pupeelum?
Ge to san tara ligeri ge kelum bɔta pa’asa? Yezu yuun makɛ pa’alɛ wana wa n de dɛŋa se’em mɛ. Kaalɛ Luke 12:15-21 ge nya sɔsɛ sokere wa:
-
Ho zamesɛ la bem Yezu makerɛ la poan?—Bisɛ kaalegɔ zɛ’an 15.
Kaalɛ ge dekɛ makɛ Magaha 10:22 la 1 Timoti 6:10 ge nyaa sɔsɛ sokere ana wa:
-
Hon ti’isɛ ti beni n de ninmɔ’ɔrɛ gana? Hon de Yehowa zɔ bii hon n tari ligeri zo’e zo’e? Bem zuo?
-
Ho san kɔ’ɔn pa ligeri poore, bem yeledaaŋɔ n wan ta’an paɛ hɔ?
6. Yehowa wan basɛ ti to nyɛta sɛla n pakɛ tɔ
Tuuma la ligeri yɛla ta’an gurɛ to sakerɛ Yehowa poan bisɛ. Ŋmɛ VIDIYO la ge bisɛ to wan eŋɛ se’em ta’an ŋmibe gurebisɛ bamam poan ge nyaa sɔsɛ sokere ana wa:
-
Vidiyo la poan, bem yele n paɛ mabia la?
-
A eŋɛ la wani ta’an maalɛ yele la soŋa soŋa?
Kaalɛ Matu 6:25-34 ge nyaa sɔsɛ sokere wa:
-
Yehowa biŋe nɔɔrɛ ti a eŋɛ la bem bo sɛba n dekɛ a tuuma deŋɛ nɛŋa la?
NƐREBA BASƐBA YETI: “Mam dela n wobege muregere ge ta’an bisɛ n deodoma. Mam kan ta’an kena tansugere zamesegɔ bakwai woo.”
-
Baabule gulesegɔ kuni n basɛ ti hon sakɛ ti ho san dekɛ Yehowa pu’usegɔ deŋɛ nɛŋa, bala n de yelesonɛ gana za’a?
YELEKPINE
Tuuma la ligeri yele pakɛ mɛ ge la ka nari ti to basɛ ti la daregɛ to yese Yehowa pu’usegɔ poan.
Tiisegɔ Sokere
-
Bem n wan ta’an soŋɛ hɔ ti ho basɛ ti ho tuuma makɛ ma’a?
-
Ho wan nyɛ nyuurɔ la wani ho san basɛ ti hon tari sɛla la seke ho?
-
Ho wan eŋɛ la wani pa’alɛ ti, hon tari sakerɛ la Yehowa n biŋe nɔɔrɛ ti a wan bisa a nɛreba la?
Ɛ BISƐ
Viisɛ bisɛ nyaa Baabule la yeti ligeri dela be’em bunɔ?
Zamesɛ baŋɛ bɔ’a sɛka taaba n peeri Naayinɛ puurɛ.
Loto la kɛkɛ ŋmɛ’a daɣɛ be’em tuuma?
“Baabule La N Tɔɣɛ Kɛkɛ Ŋmɛ’a Yele Se’em” (Awake!, March 2015)
Bisɛ nɛra n yuun de nayiga ge tuna loto la kɛkɛ tuuma n nyaa tee a vom se’em.
“Mam Yuun Baʼɛ Nɔŋɛ La Yiiri Bã’a De’eŋo” (The Watchtower, November 1, 2011)
Ho Me Ta'an Bɔta Yele Ana
SOKESE’A TI NƐREBA SƆKERA
Bem Baabule Zamesegɔ N Bala Ti Yehowa Sɛɛradoma Ita La Nɛreba?
Hon la Yehowa Sɛɛradoma san zamesa Baabule la, ho ta’an tara homea Baabule la kaala, zamesegɔ la poan. Ho ta’an yele ho yire nɛreba za’a la ho zɔdoma ti ba laɣum kelese zamesegɔ la.
