Hetaiterei hénte ningo ojerovia Ñandejára Rréinore ha osegi pe instruksión Jesús oheja vaʼekue idisipulokuérape. Haʼe heʼi vaʼekue chupekuéra ojerure hag̃ua kóicha Ñandejárape: “Tou ne rréino, tojejapo ne rembipota yvy ári yvagapeguáicha” (Mateo 6:10, Buenas nuevas para el Paraguay).

Ointeresáramo jepe umi héntepe Ñandejára Rréino, heta rrelihión noñeʼẽguasúi upéva rehe. Pe istoriadór Herbert George Wells, oñesorprende ohechávo mbaʼéichapa hetaiterei iglésia kristiána saʼieterei “oñeʼẽ Ñandejára Rréinore”, siéndo ke Jesúspe g̃uarã iñimportanteterei upéva ha oñeʼẽ meme vaʼekue voi “pe Rréino yvagapeguáre”.

Ore testígo de Jehová katu roñeʼẽ meme Ñandejára Rréinore. Por ehémplo, ore rrevísta ikonosidovéva, releéva hína koʼág̃a, oñeguenohẽ 220 idiómape ha oñeimprimi 46 millónrupi káda mes. Kóva haʼe hína pe rrevísta ojejapo hetavéva ko múndope. ¿Ha mbaʼépa hína itéma prinsipál? Emañamína ijapére, upépe heʼi: Ñemañaha. Oikuaauka Jehová  * Sãmbyhy (Rréino térã Goviérno).

¿Mbaʼérepa ore testígo de Jehová roñeʼẽ meme ko Rréinore? Pórke Ñandejára Rréino haʼe pe téma prinsipál oĩva la Bíbliape, pe lívro iñimportantevéva ko múndope. Avei roguerovia Ñandejára goviérno añoite osolusionataha umi mbaʼe ombohasa asýva yvyporakuérape.

Ore roñehaʼãmbaite rosegi Jesús ehémplo. Haʼe ningo omotenonde meme Ñandejára Rréino hekovépe, upévare oñeʼẽ meme vaʼekue hese oĩrõ guare ko yvy ape ári (Lucas 4:43). ¿Mbaʼérepa iñimportantete Jesúspe g̃uarã Ñandejára Rréino? ¿Mbaʼépa nde ikatu rehupyty ko Rréino rupive? Emañamína mbaʼéichapa ombohovái la Biblia koʼã porandu umi artíkulo oúvape.