¿Oĩmavapa nemboyke térã ndeapoʼíva? ¿Oñenegámavapa ndehegui peteĩ traváho nde pire kolór diferénte haguére, nemboriahu térã reju haguére ótro tetãgui? Oimérõ upéicha, romombeʼuse ndéve peteĩ mbaʼe iporãitereíva: yvypóra omboyke térã oapoʼíramo jepe hapichápe, Ñandejára arakaʼeve ndoporotratáiva upéicha. Apóstol Pedro heʼi porã vaʼekue: ‘Ñandejára nomboykéi avavépe’. (Elee Hechos 10:34, 35.)

Pedro heʼi vaʼekue upéva oĩrõ guare Cornelio rógape. Ko karai ningo ndahaʼéi vaʼekue hudío, ha upe tiémpope umi hudío oapoʼi umi ótro tetãyguápe ha heʼi hesekuéra ikyʼaha Ñandejára renondépe, upévare ni noñeʼẽi hikuái umi ndahaʼéivape hudío. ¿Mbaʼe piko upéicharõ Pedro ojapo raʼe Cornelio rógape? Jehová voi omondo chupe upépe. Upe mboyvemi, peteĩ visión rupive ojeʼe kuri Pédrope: “Anive ere ikyʼaha umi mbaʼe Ñandejára omopotĩ vaʼekue”. Pedro ndoikuaái kuri peteĩ visión rupive peteĩ ánhel heʼi hague avei Cornéliope ohenoika hag̃ua chupe (Hechos 10:1-15, NM). Upéi, Pedro ohechakuaa Ñandejára voi omondoha chupe Cornelio rendápe.

Haʼe heʼi: “Añetehápe koʼág̃a ahechakuaa [Ñandejára] nomboykeiha avavépe” (Hechos 10:34, ÑÑB). Peteĩ vivlísta omombeʼu mbaʼéicha javépa ojeporu jepi pe ñeʼẽ griégo ojetradusíva “omboyke”. Haʼe heʼi: “Ojeporu jepi oñeñeʼẽ hag̃ua peteĩ hués rehe, ohusgáva peteĩ tapichápe ohechávarente. Hova vuénoramo, ohusgántema chupe upévare, oinvestigaʼỹre mbaʼevete”. Ñandejára katu ndahaʼéi upéicha, haʼe ndohusgái avavépe ohechávarente. Haʼe nomboykéi avavépe, chupe g̃uarã peteĩchante ipláta ha imboriahúva, tahaʼe haʼéva ipire kolór térã hetã.

Jehová omaña ñande pyʼapýpe oĩvare (1 Samuel 16:7; Proverbios 21:2). Pedro heʼi Ñandejárare: “Haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua” (Hechos 10:35, NM). ‘Jakyhyje Ñandejáragui’ heʼise jarrespeta ha jajeroviaha hese, avei ñañehaʼãmbaiteha ani hag̃ua jajapo umi mbaʼe ombopochýtava chupe. ‘Ñane rembiapo porã’ katu heʼise jajapoha ñande pyʼaite guive umi mbaʼe ombovyʼátava Jehovápe. Haʼe oguerohory umi ojapóvape hembipota, orrespeta ha omombaʼégui chupe (Deuteronomio 10:12, 13).

Oiméramo oĩma ndeapoʼi ha nemboykéva, katuete nemokyreʼỹta reikuaávo Pedro ohai vaʼekue: Jehová omoag̃ui ijehe hénte opa tetãygua oservi hag̃ua chupe (Juan 6:44; Hechos 17:26, 27). Haʼe ohendu ha ombohovái umi iñeʼẽrendúva ñemboʼe, tahaʼe haʼéva hetã, ipire kolór, imboriahu térã iplátava (1 Reyes 8:41-43). Ñandejára omañávo ñanderehe yvága guive, ohecha enterove yvypórape peteĩchapa, nomboykéi avavépe. ¿Nanemokyreʼỹipa upéva reikuaave hag̃ua Ñandejára Jehovápe?