Mbaʼépa heʼise añetehápe Armagedón
‘Umi demónio espíritu [...] osẽ ombyaty hag̃ua opa mburuvicha guasu yvy arigua [...] peteĩ lugár héravape evréo ñeʼẽme Armagedón.’ (REVELACIÓN [APOCALIPSIS] 16:14, 16)
ARMAGEDÓN, sapyʼánte ojehaíva Har–Magedón, haʼe peteĩ lugár réra. Péro ndojekuaaporãi añetehápepa oĩ rakaʼe peteĩ lugár ko yvy ape ári hérava upéicha.
Upéicharõ, ¿mbaʼépa heʼise Armagedón? ¿Ha mbaʼérepa pyʼỹinte ojeporu oñeñeʼẽ hag̃ua peteĩ mbaʼe vai oikóvare, pór ehémplo peteĩ gérrare?
Oñembyaty peteĩ lugár héravape Armagedón
Pe ñeʼẽ evréo Har–Magedón heʼise “Montaña de Meguidó”. Ndaipóriramo jepe peteĩ montáña hérava péicha, oĩ peteĩ lugár hérava Meguidó. Upéva opyta peteĩ krúsepe noroéste gotyo pe lugár oiko haguépe umi Israelgua. Upéva ypýpe oikovaʼekue heta ñorairõ iñimportánteva, upéicha rupi ojeporu pe téra Meguidó oñeñeʼẽ hag̃ua gérrare. a
Péro pe iñimportantevéva ningo ndahaʼéi mbaʼeichagua ñorairõpa oikovaʼekue Meguidópe, síno mbaʼérepa oñeñorairõ. Ko lugár oĩvaʼekue umi yvy Jehová omeʼẽvaʼekue apytépe umi isrraelítape (Éxodo 33:1; Josué 12:7, 21). Jehová opromete oñangarekotaha hesekuéra umi iñenemigokuéragui, ha upéicha ojapo (Deuteronomio 6:18, 19). Pór ehémplo, Meguidópe Jehová oñangarekovaʼekue ipuévlore pe rréi cananeo Jabín ha Sísaragui, pe ehérsito omoakãva (Jueces 4:14-16).
Upéicharõ, pe ñeʼẽ Har–Magedón térã Armagedón, ojeporu oñeñeʼẽ hag̃ua ambue mbaʼére. Ko ñeʼẽ ojeporu oñeñeʼẽ hag̃ua mokõi ehérsito imbaretetereíva oñorairõtavare.
Pe profesía oĩva la Bíbliape ohechauka koʼẽrõitéma Satanás ha idemoniokuéra omomyitaha umi yvypóra goviérnope ombyaty hag̃ua ijehersitokuérape opuʼã hag̃ua Ñandejára puévlore. Ko mbaʼe oiko vove hetaiterei tapicha omanóta, Ñandejára ohundíta rupi iñenemigokuérape (Revelación 19:11-18).
La Biblia ningo heʼi Ñandejárare ‘oporoporiahuvereko, hasýpe ipochy ha ipyʼaporãha’, ¿mbaʼére piko upéicharõ ohundíta hetaite héntepe? (Nehemías 9:17, ÑÑB.) Ñantende hag̃ua mbaʼépa Ñandejára ojapóta, tekotevẽ ñambohovái mbohapy porandu: 1) ¿Mávapa omoñepyrũta pe gérra? 2) ¿Mbaʼérepa Jehová oñorairõta ko gérrape? 3) ¿Mbaʼépa ohupytýta ko yvy ha yvyporakuéra ko ñorairõ rupive?
1. ¿MÁVAPA OMOÑEPYRŨTA PE GÉRRA?
Armagedón ningo ndahaʼéi peteĩ gérra Jehová ojukapa rei hag̃ua umi héntepe. Haʼe odefendéta guei umi ipyʼaporãvape umi ohundisévagui chupekuéra. Ko ñorairõme, umi ‘mburuvicha guasu yvy arigua’ hína umi opuʼãtava Jehová puévlore. ¿Mbaʼérepa? Satanás omomýita umi mburuvicha ha militarkuérape ohundise hag̃ua umi oservívape Jehovápe (Revelación 16:13, 14; 19:17, 18).
Koʼág̃a rupi ningo heta tetãme ojerrespeta pe derécho oguerekóva la hénte heʼívo opensáva ha osegívo irrelihión. Upévare ikatu oñepensa hasýne hag̃ua umi goviérno oproivi térã ohundi peteĩ rrelihión. Upéicharamo jepe, ojejaposemavaʼekue upéva pe síglo XX-pe ha ko tiémpope avei. b Péro koʼã mbaʼe oikovaʼekue idiferénte pe mbaʼe oikótavagui oñepyrũ hag̃ua Armagedón. Ñepyrũrã, Ñandejára puévlore opuʼãta iñenemigokuéra oparupiete ko yvy ape ári. Ha mokõiha, Jehová koʼýte oiporúta ipodér odefende hag̃ua hembiguaikuérape (Jeremías 25:32, 33). La Biblia ohenói ko gérrape ‘Ñandejára ipuʼakapáva ñorairõ guasu ára’.
2. ¿MBAʼÉREPA JEHOVÁ OÑORAIRÕTA KO GÉRRAPE?
Ñandejára Jehová heʼi hembiguaikuérape oiko hag̃ua pyʼaguapýpe opavavéndi ha ohayhu hag̃ua iñenemigokuérape (Miqueas 4:1-3; Mateo 5:43, 44; 26:52). Upévare, oñepuʼã vove hesekuéra, ndoiporumoʼãi hikuái umi árma oñedefende hag̃ua. Ha Ñandejára ndojapóiramo mbaʼeve ani hag̃ua oñehundi isiervokuéra, haʼetéta ndoporohayhúi, ndahekojojái ha ndorekóiva podér. Avei oñeñeʼẽ vaíta héra rehe. Upéicha rupi, Ñandejára arakaʼeve ndohejareimoʼãi ipuévlope (Salmo 37:28, 29).
Ñandejára nohundiséi avavépe, upévare omombeʼu mbaʼépa ojapóta (2 Pedro 3:9). Heta istória oĩva la Bíbliape ñanemomanduʼa yma Ñandejára oipytyvõ hague isiervokuérape oñepuʼãrõ guare hesekuéra (2 Reyes 19:35). La Biblia ohechauka avei tenonderãme, Satanás ha umi oĩva ipoguýpe opuʼã vove Ñandejára puévlore, Jehová oiporutaha ipuʼaka odefende jey hag̃ua isiervokuérape. Ymaite guivéma la Biblia heʼi Ñandejára ohundietetaha umi iñañávape (Proverbios 2:21, 22; 2 Tesalonicenses 1:6-9). Og̃uahẽ vove upe tiémpo, umi oñemoĩva Jehová puévlore ohechakuaáta oñorairõha Ñandejára Ipuʼakapáva kóntrape (Ezequiel 38:21-23).
3. ¿MBAʼÉPA OJEHUPYTÝTA KO ÑORAIRÕ RUPIVE?
Armagedón rupive ojesalváta hetaiterei tapichápe ha oñepyrũta oĩ pyʼaguapy ko yvy ape ári (Revelación 21:3, 4).
Pe último lívro oĩva la Bíbliape ohechauka oĩtaha peteĩ “aty guasu” nomanomoʼãiva ko ñorairõme (Revelación 7:9, 14). Ñandejára poguýpe, koʼã tapicha oipytyvõta ko yvy tuichakuégui oiko hag̃ua peteĩ hardín iporãitereíva, Jehová oipota haguéicha ymaite guive.
Péro, ¿arakaʼépa oñepyrũta oñepuʼã Ñandejára puévlore?
[Nóta]
a Ndojehecharamói ningo ojeporúramo peteĩ lugár réra oñeñeʼẽ hag̃ua gérrare. Pór ehémplo, pe táva Hiroshímape ojepoivaʼekue bomba atómica, ha upéva koʼág̃a ojeporu ojeʼe jave ikatuha oiko peteĩ gérra nuclear.
b Pe Holocausto haʼe peteĩ ehémplo ohechaukáva umi goviérno oñehaʼã hague ohundi peteĩ rrása ha rrelihión. Pe goviérno soviético tiémpope, ojepersegi mbarete avei umi grúpo rrelihiósope. Ehecha pe artíkulo “Testígo de Jehová oñehaʼã omopotĩ héra”, osẽvaʼekue Ñemañaha 1 de julio 2011-pe, ojapóva testigos de Jehová.
[Nóta oĩva taʼanga ndive páhina 6]
Yma, Jehová odefendevaʼekue ipuévlope ohundívo iñenemigokuérape
[Nóta oĩva taʼanga ndive páhina 7]
Jehová odefende jeýta hembiguaikuérape Armagedónpe
