Mbaʼépa ikatu rejapo reñeñandu vai jave?

NDÉPA reñeñandu vai jepi? Oiméne katuete upéicha. Ñaime voi ningo peteĩ múndo henyhẽvape provlémagui ha upéicha rupi jajepyʼapyháre jaiko. Jaikuaaháicha ivai la pórte, oĩ heta inhustísia, ñorairõ ha jejuka. Ndareíri hetaite tapicha oñeñandu vai ha ndovyʼavéi, ojekulpa térã oimoʼã ndovaleiha mbaʼeverã. Ndépa reñeñandu avei upéicha?

Oiméramo rehasa ko situasiónre rehechakuaáne ikatuha ojapo vai nderehe, nembotavy, nderejeroviavéi ndejehe térã nde rapicháre ha nderevyʼavéi. La Biblia heʼi porã: ‘Nekangýramo ivai jave, nanembaretemoʼãi reikotevẽ vove’ (Proverbios 24:10). Jahecha upéicharõ tekotevẽha ñañehaʼãmbaite ñasẽ porã hag̃ua ko múndo ijetuʼuetévape. Upévare, jaikóramo ñapensa vaipa jajepyʼapýgui rei, jahechavaʼerã mbaʼépa jajapokuaa ñambohasa hag̃ua ñandejehegui koʼã mbaʼe. *

Haʼetépe ningo la Biblia ikatu nepytyvõ rembohovái hag̃ua ko situasión. Ani nderesarái Ñandejára Jehová nderayhuetereiha ha ndoipotaiha reñeñandu vai nekangýgui térã ndereikuaái rupi mbaʼépa rejapóta (Salmo 36:9). Upévare koʼág̃a ñahesaʼỹijóta mbohapy konsého oñeguenohẽva la Bíbliagui ha nepytyvõtava reikuaa hag̃ua mbaʼépa ikatu rejapo reñeñandu vai jave.

Nemanduʼákena Ñandejára ojepyʼapyha nderehe

Heta hénte oimoʼã Ñandejára hembiapoitereiha oiko hag̃ua ojepyʼapy ñande ñañandúvare. Péro la Biblia nomboʼéi upéva, heʼi guei: “Ñandejára oñemboja umi ohasa asýva rehe ha oguenohẽ umi ikangývape jejopy vaígui” (Salmo 34:19 [34:18, NM]). Ajépa ñanembovyʼaite jaikuaávo ko univérso Apohare oĩha ag̃uiete ñandehegui jahasa asy jave!

Jajeroviakuaa upéicharõ Jehová ojepyʼapyetereiha ñanderehe jahasa asy jave. Iñeʼẽme heʼi voi: “[Ñandejára] niko mborayhu” (1 Juan 4:8). Haʼe ñanderayhu ha oipota ñaime porã, koʼýte jahasa asy jave. Ojapo 3.500 áño rupi umi isrraelíta oiko hague tembiguáiramo, ha upérõ Jehová heʼivaʼekue: “Ahecha oiko asyha che retãyguakuéra Egíptope. Ahendu ipyahẽ júgo pohýi guýpe, ahechapaite hembiasa asy. Péina aguejy aipeʼa hag̃ua Egiptoygua poguýgui” (Éxodo 3:7, 8).

Jehová ontende porã mbaʼéichapa ñañeñandu, haʼégui “ñande Apohare ha ñande imbaʼe” (Salmo 100:3). Upévare sapyʼánte reñandúramo avave nanentendeiha, rejeroviakuaa Jehová katuete nentende porãtaha. Mbaʼérepa jaʼe upéva? Haʼe heʼi: “Che namaʼẽi peẽicha. Peẽ pemaʼẽ upe kuimbaʼe rováre, che katu amaʼẽ ipyʼapy rehe” (1 Samuel 16:7). Ñandejára ningo ohechapaite oĩva ñandepyʼapýpe, mbaʼeve ndojehasái chugui.

Jehová ohecha avei mbaʼépa jajapo vai ha mbaʼépepa ñanekangy. Péro ani rejepyʼapy, haʼe ñanentende ha ñanderayhu. Upévare omomyivaʼekue rréi Davídpe ohai hag̃ua: “Túva omokunuʼũháicha taʼyrakuérape, upéicha avei Ñandejára umi chupe omombaʼéva ndive. Haʼe oikuaa mbaʼéguipa ñandeaporakaʼe, oikuaa porã yvynteha voi ñande” (Salmo 103:13, 14). Sapyʼánte ñandénte  jajerureterei ñandejehegui, péro ñanemanduʼavaʼerã Jehová ndojeruremoʼãiha ñandéve ikatuʼỹva jajapo. Haʼe ojesareko ñane rembiapo porãrente ha ñaneperdona jajavy jave, ñañembyasýma guive (Salmo 139:1-3, 23, 24).

Upéicharõ, rejekulpáramo térã reñandúrõ nderevaleiha, ani nderesarái ikatuha rembohovái ko situasión rejepyʼamongetávo mbaʼeichaitépa Jehová nderayhu (1 Juan 3:20).

Eñemoag̃uíkena Ñandejárare ne amígo teéicha

Koʼág̃a hesakã porãma Jehová ojepyʼapyetereiha ñanderehe. Ha upéva ñanepytyvõta ñañemoag̃uive hag̃ua hese ñañeñandu vai jave. Péro ikatúne piko jajapo upéva?

Ikatu, ha ndahaʼéi upéva añónte, ñande Ru yvagapegua voi oipota jaiko iñamígoramo. Iñeʼẽme heʼi: ‘Peñemoag̃ui Ñandejárare ha haʼe oñemoag̃uíta penderehe’ (Santiago 4:8). Ñapensamíntena: ñande yvypóra imperfékto ikatu jaiko Ñandejára ipuʼakapáva amígoramo. Ajépa tuichaite mbaʼe upéva!

Péro jahupyty hag̃ua ko mbaʼe jahechavaʼerã mbaʼépa heʼi la Biblia, upépe ningo Ñandejára omombeʼu mbaʼeichaguápa haʼe. Upévare tekotevẽ jalee meme jaikuaa porãve hag̃ua chupe. * Avei ñamboykevaʼerã tiémpo jajepyʼamongeta hag̃ua umi mbaʼe jaleevaʼekuére, péicharõmante ñañemoag̃uivéta hese ha jahechakuaáta haʼeha peteĩ Túva ñandeporiahuvereko ha ipyʼaporãva.

Akóinte ñapensáramo la Biblia heʼívare jahupytýta heta mbaʼe. Pór ehémplo, jaikuaáta mbaʼéichapa jaikovaʼerã ha ñandepyʼaguapýta ñañeñandu vai jave. Upévare, tekotevẽterei ñamboyke tiémpo jajepyʼamongeta hag̃ua jaleevaʼekuére. Heʼi voi ningo pe salmísta Ñandejárape: “Jepyʼapy oguapy pohýiramo che ári, nde [chembopyʼapytuʼu] ha chembovyʼa” (Salmo 94:19). Ñandejára Ñeʼẽ ñanembopiroʼy, ha ñañemomirĩramo jajapo hag̃ua umi mbaʼe oĩva ipype opáta ohóvo umi mbaʼe ñandepyʼapýva ha ñañandúta mbaʼéichapa Ñandejára ñanembopyʼaguapy. Peteĩ túva oñangarekoháicha ifamiliakuérare, Jehová oĩta ñande ykére ñaikotevẽve jave ñanepytyvõ ha ñanekonsola hag̃ua.

Péro jaiko hag̃ua Ñandejára amígoramo tekotevẽterei ñañemongeta meme hendive. La Biblia heʼi voi: “Jajeruréramo pe haʼe oipotáva, ñanerendúta” (1 Juan 5:14). Upéva heʼise tahaʼe haʼéva upe ñandepyʼapýva, ikatu ñañemboʼe Ñandejárape ñanepytyvõ hag̃ua. Ñamombeʼúramo chupe mbaʼéichapa ñañeñandu tuicha ñanembopyʼaguapýta. Apóstol Pablo heʼivaʼekue: ‘Pemoĩ opa mbaʼe Ñandejára pópe peñemboʼévo. Pejerure ha peagradese avei chupe. Ha Ñandejára omeʼẽne peẽme ipyʼaguapy tuichavéva opa ikatuvaʼerãgui yvypóra ohaʼarõ. Ha pe pyʼaguapy oñangarekóne  pende pyʼapy ha pene remiandúre, Cristo Jesús rupi’ (Filipenses 4:6, 7).

Nemanduʼákena: releéramo la Biblia ára ha ára, rejepyʼamongeta umi mbaʼe reaprendévare ha reñemboʼe pyʼỹirõ Ñandejárape, katuete reñemoag̃uivéta nde Ru yvagapeguáre. Upéva haʼetéta peteĩ eskúdo nemoʼãva reñeñandu vai jave. Péro mbaʼépa ikatu rejapove rembohovái hag̃ua ko situasión?

Ejeroviákena pe esperánsa Ñandejára omeʼẽvare

Jahasa asy térã ñañeñandu vaietereíramo jepe ikatu javyʼa. Mbaʼérepa jaʼe upéva? Ñandejára opromete koʼẽrõitéma jaiko porãvetaha. Apóstol Pedro oñeʼẽ upe esperánsa iporãitévare ohaírõ guare: “Ñande ñahaʼarõ heʼi haguéicha [...] Ñandejára, yvága pyahu ha yvy pyahu, peteĩ arapy oĩtahápe tekojoja” (2 Pedro 3:13, JMP). Mbaʼépa heʼise ko promésa Ñandejára ojapóva?

Heʼívo “yvága pyahu” oñeʼẽhína Ñandejára Rréino yvagapeguáre, oĩva Jesucristo poguýpe. Ha heʼívo “yvy pyahu” katu oñeʼẽhína umi yvypóra ojapóvare Ñandejára rembipota, oikótava ko yvy ape ári. Pe “yvága pyahu” ogoverna vove pe “yvy pyahu” ári, ndaiporimoʼãvéima oñeñandu vai térã oimoʼãva ndovaleiha mbaʼeverã. Oñeʼẽvo umi hekojojávare oikótava upe tiémpope, la Biblia heʼi: “[Ñandejára] omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy” (Revelación [Apocalipsis] 21:4).

Koʼãichagua promésa porã ningo oimeraẽvape omokyreʼỹ, ajépa! Upévare la Biblia oñeʼẽvo umi mbaʼe porãite Ñandejára ojapótavare heʼi isiervokuéra ‘torypápe ohaʼarõha’ haʼe oprometéva (Tito 2:13). Rejesarekóramo ipromésare ha umi mbaʼe ohechauka porãvare oñekumplitaha, katuete regueropuʼakáta umi mbaʼe nemokangy ha nanembovyʼáiva (Filipenses 4:8).

La Bíbliape oñembojoja umi mbaʼe porã ñahaʼarõva peteĩ káskore, oiporuvaʼekue umi soldádo yma guare (1 Tesalonicenses  5:8). Haʼekuéra ndohoivaʼekue ñorairõhápe omoʼãʼỹre iñakã, mbaʼérepa? Upéicha oprotehe iñakã heta gólpegui ha umi mbaʼe opoívagui iñenemígo. Pe kásko omoʼãháicha peteĩ soldádo akã, umi mbaʼe porã ñahaʼarõva oprotehe ñapensáva. Jajepyʼamongeta meméramo pe esperánsa porãite Ñandejára omeʼẽvare, katuete ñambohovái porãta ñanemongyhyjéva ha ñanepytyvõta ani hag̃ua ñapensa vaipa.

Rehechaháicha hetaiterei mbaʼe nepytyvõkuaa regueropuʼaka hag̃ua umi pensamiénto ikatúva nemokangy. Aníkena nderesarái ñande Ru yvagapegua ojepyʼapyetereiha nderehe, eñemoag̃ui hese ne amígo teéicha ha ejerovia meme pe esperánsa porãite omeʼẽvare ndéve. Koʼẽrõitéma opáta umi mbaʼe ñanemoñeñandu vai ha ñanembohasa asýva. Upévare, aníkena reheja mbaʼeve nemokangy! (Salmo 37:29.)

[Nóta]

[Taʼanga ha rrekuádro oĩva páhina 21-pe]

Koʼã téysto oĩva la Bíbliape ikatu ñanekonsola

“[Jehová,] oporombyasýva ha oporoporiahuverekóva, ipochykuaaʼỹva, oporohayhuetéva ha nopyrũiva iñeʼẽngue rehe.” (ÉXODO 34:6)

“Ohechapa opaite yvy ape ariguápe, oipytyvõ hag̃ua ipuʼaka rupi umi ojeroviáva añetehápe hese.” (2 CRÓNICAS 16:9, ÑÑB)

“Ñandejára oñemboja umi ohasa asýva rehe ha oguenohẽ umi ikangypávape jejopy vaígui.” (SALMO 34:19 [34:18, NM])

“Nde niko nembaʼeporã ha reheja rei oréve ore rembiapo vaikue.” (SALMO 86:5)

“[Jehová] imbaʼeporãite maymáva ndive g̃uarã, ha oiporu imborayhu opaite hembiapokuépe.” (SALMO 145:9, ÑÑB)

‘Che, Jehová nde Jára rojagarra nde po akatúagui ha haʼe ndéve: “Ani rekyhyje, aju roipytyvõ hag̃ua.”’ (ISAÍAS 41:13)

‘Ñamombaʼeguasu Ñandejárape, haʼe niko ñande Ru oporoporiahuverekóva ha Ñandejára tapia oporokonsoláva.’ (2 CORINTIOS 1:3, BNP)

‘Ikatúta ñandepyʼaguapy Ñandejára renondépe, ñande pyʼapy ñanemoĩ vaírõ jepe. Haʼe tuichave ñande pyʼapýgui, ha oikuaa opa mbaʼe.’ (1 JUAN 3:19, 20)

[Taʼanga ha rrekuádro oĩva páhina 22-pe]

Mbaʼépa ojapo hikuái oñeñandu porãve hag̃ua?

“Che túva ningo okaʼuháre oiko, hetáma chembohasa asy. Ymaite guive añandu ndavaleiha mbaʼeverã. Péro peteĩ jey añepyrũ astudia la Biblia testigos de Jehová ndive ha aaprende Ñandejára oprometeha ñandéve jeikove opaʼỹva peteĩ múndo pyahúpe. Upéva chembovyʼaiterei ha añepyrũ alee la Biblia ára ha ára; ha che ypýrupinte voi aguereko peteĩva, upéicharõ añeñandu vai jave aleéntema hag̃ua umi versíkulo chemokyreʼỹva. Ajepyʼamongetávo mbaʼeichaitépa Ñandejára cherayhu ha chemombaʼe tuicha chepyʼaguapy jey.” (Katia, 33 áño) *

“Che haʼuetereivaʼekue vevída, ha ajedroga hag̃ua aiporúmi pegaménto, mariguána, kokaína ha crack. Aperdepa arekomíva guive ha aiko kállere. Péro peteĩ jey testigos de Jehová oporandu chéve ndastudiaséipa la Biblia, ha añepyrũ astudia hendivekuéra. Tuichaiterei akambia ha ajerovia Ñandejárare che pyʼaite guive. Heta vése ningo ambyasy umi mbaʼe vai ajapovaʼekue ha añandu ndavaleiha, péro apensávo mbaʼéichapa Jehová cherayhu ha chentende, tuicha chepyʼaguapy jey. Ajerovia akóinte chemombaretetaha añeñandu vai jave. Avyʼaiterei aikuaa rupi chupe, chéve g̃uarã ndaipóri mbaʼeve iporãvéva upévagui.” (Renato, 37 áño)

“Chemitãkuñaʼíme añembojojámi che ermáno tuichavévare, upéicha rupi añandu ndavaleiha. Ha jaʼe porãsérõ g̃uarã koʼag̃aite peve ndajeroviapái chejehe ha aimoʼã nosẽporãmoʼãiha chéve mbaʼeve. Péro ndahejái upéva chemokangy. Akóinte añemboʼe Jehovápe ha ajerure chupe tachemombarete aha porã hag̃ua hese, haʼe ningo arakaʼeve ndofallái chéve. Avyʼaiterei aikuaa rupi Ñandejára cherayhu ha ojepyʼapyha cherehe!” (Roberta, 45 áño)

[Nóta]