Jesucristo omomarandu opavavépe

“Peteĩ kuimbaʼe Capernaumgua * ningo iñarandueterei, upévare koʼag̃aite peve heta hénte imanduʼa porã ha oñongatu ikorasõ mbytetépe umi mbaʼe omboʼevaʼekue.” (GREGG EASTERBROOK, ESKRITÓR)

UMI mbaʼe jaʼéva ningo ikatu omokyreʼỹ, ombopyʼaguapy ha okambia heta héntepe, ha pe ehémplo iporãvéva hína Jesús. Upéicha voi heʼi peteĩ kuimbaʼe ohenduvaʼekue chupe omeʼẽvo pe diskúrso iporãitéva sérro ári guive. Tiémpo rire ko kuimbaʼe omombeʼu: ‘Jesús heʼipávo koʼã mbaʼe umi hénte ijurujaipa opytávo’ (Mateo 7:28, NM).

Koʼág̃a rupi hetaiterei hénte ko múndo tuichakuére oikuaa umi mboʼepy hypyʼũva Jesús heʼivaʼekue. Pór ehémplo:

‘Peẽ ndaikatúi peiko Ñandejára rembiguáirõ ha avei peiko pláta rapykuéri.’ (Mateo 6:24, NM.)

‘Pejapo pende rapicháre peẽ peipotáva haʼekuéra ojapo penderehe.’ (Mateo 7:12, NM.)

‘Pemeʼẽvaʼerã Césarpe umi imbaʼe teéva, péro pemeʼẽvaʼerã avei Ñandejárape umi imbaʼe teéva.’ (Mateo 22:21, NM.)

‘Javyʼave ñameʼẽrõ, ñandéve oñemeʼẽ rangue.’ (Hechos 20:35.)

Péro Jesús ñeʼẽngue iporãramo jepe ndopái upépe. Haʼe oñeʼẽvaʼekue Ñandejárare, ohechauka mbaʼéichapa ikatu javyʼave ha avei Ñandejára Rréino añoite ikatuha omyatyrõ ñande jehasa asy. Koʼã mbaʼe opokoiterei umi héntere. Koʼág̃a ñahesaʼỹijóta umi mbaʼe haʼe heʼivaʼekue, péicha ñantende porãvéta mbaʼéicha rupípa “heta hénte imanduʼa porã ha oñongatu ikorasõ mbytetépe umi mbaʼe omboʼevaʼekue”.

[Nóta]