Jahasa jave umi situasión ijetuʼúva, ikatu ñañeñandu vaieterei ha ñañekevrantaháre jaiko, haʼete voi nañameʼẽvéimava, japyta yvýre ha amo ipahápe nañanderetiaʼevéi. Péicha oñeñandu vaʼekue rréi David ojere vaipaitérõ guare chupe, péro ¿mbaʼéichapa ombohovái upe situasión? Haʼe heʼi: “Ajerure asy Jehovápe chepytyvõmínte hag̃ua, asapukái Jehovápe cheporiahuvereko hag̃ua. Henondépe ahykuavo opa mbaʼe chepyʼapýva, ipópe amoĩ upe chekevrantáva. Nameʼẽvéima jave, haʼe ohechauka chéve che raperã”. David iñumílde ha ojerure Ñandejárape oipytyvõmi hag̃ua chupe (Sal. 142:1-3, NM).

Ótro hendápe haʼe oskrivi: “Peteĩ mbaʼénte ajerure Jehovápe ha upéva ahekáta: aikose Jehová rógape aikove aja pukukue. Ikatu hag̃uáicha ajepyʼamongeta ahechávo Jehová imbaʼeporãha ha aguerohorýta itémplo” (Sal. 27:4, NM). Ñañeimahinamína David oĩha pe tavernákulo korapýpe, haʼe ojesareko hína pe lugár Jehová oiporúvare ojeadora hag̃ua chupe. Péro ndahaʼéi rupi Leví trivugua, oka guivénte opyta omaña. Upéicharamo jepe, haʼe ovyʼa ha oagradeseterei Jehovápe, upévare oikose upe lugárpe oikove aja pukukue ikatu hag̃uáicha “ojepyʼamongeta ohechávo Jehová imbaʼeporãha”.

Ko téxtope ojeporu peteĩ palávra evréa heʼiséva “igústo”, térã “ñanembovyʼa”. Rréi David siémpre omombaʼe ha oguerohory vaʼekue pe lugár ha opa mbaʼe Jehová omeʼẽva ikatu hag̃uáicha isiervokuéra oadora chupe. Ha ñande, ¿ñamombaʼe ha jaagradesépa avei péicha Jehovápe?

Koʼág̃a ñande nañaikotevẽvéima katuete peteĩ lugár ñañemoag̃ui hag̃ua Jehováre, koʼág̃a haʼe omoĩ peteĩ témplo espirituál, upéva hína opa mbaʼe oiporúva ikatu hag̃uáicha jaadora chupe. * Ñande “jaguerohorýramo itémplo” koʼag̃agua, ikatúta avei ñañeñandu David oñeñandu haguéicha, “jahecháta Jehová imbaʼeporãha”.

Pe tavernákulope oĩ vaʼekue pe altár ojehapyhápe umi sakrifísio, ¿mbaʼépa orrepresenta upéva? Ohechauka vaʼekue Ñandejára oaseptataha Jesús rekove peteĩ sakrifísioramo (Éx. 38:1, 2; 40:6; Heb. 10:5-10). Upéva tuichaiterei mbaʼe ñandéve g̃uarã, ¿mbaʼérepa? Apóstol Pablo heʼi: “Ñande haʼe aja gueteri Ñandejára enemígo, Itaʼýra omano rupi, jaiko porã jey hendive. Koʼýte koʼág̃a jaiko porã jeýmarõ hendive ikatu jaguerovia jajesalvataha haʼe oikove rupi” (Rom. 5:10). Jajeroviáramo Jesús sakrifísiore ikatúta ñaime porã Jehová renondépe ha ñañemoag̃ui hese kyhyjeʼỹre. Añetehápe ikatúta jaiko Ñandejára amígoramo (Sal. 25:14).

Jehová operdona rupi ñande pekádo, ñande javyʼa ha ñandepiroʼy (Hech. 3:19). Ikatu ñamoĩ peteĩ ehémplo, ymave ñande jajogua peteĩ préso oñekondenávape omano hag̃ua, péro upéi oñekumpli mboyve la ikondéna oñarrepenti ha okambia. Pe hués ohechávo upéva oiporiahuvereko chupe ha omondoro la ikondéna ha operdona chupe. ¡Mbaʼeichaite piko ovyʼáne pe kuimbaʼe! Jehová hína pe hués, pórke haʼe oiporiahuvereko entéro persóna oñarrepentívape ha omeʼẽ chupe pe oportunida oikove hag̃ua.

David ikatu vaʼekue ohecha heta mbaʼe ojejapóva Jehová rógape, por ehémplo oñembyatývo ipuévlo, ojelee ha oñemyesakã jave pe Léi, pe insiénso  ojehapývo ha mbaʼéichapa umi levíta ha saserdóte oservi Ñandejárape (Éx. 30:34-38; Núm. 3:5-8; Deut. 31:9-12). Ñane tiémpope ñande jajapo avei heta mbaʼe ojoguáva umi mbaʼe David ohecha vaʼekuépe.

La Biblia heʼi: “Ajépa iporã ha igustoite jahecha ermanokuéra oiko porãmbaha oñondive”. Ñande jahechakuaa siertoiteha upéva (Sal. 133:1, NM). Koʼág̃arupi ko múndo tuichakuére heta hetave umi ermáno omombaʼeguasúva Jehovápe (1 Ped. 2:17). Avei ñane rreuniónpe ojelee ha oñemyesakã Ñandejára Ñeʼẽ. Iñorganisasión rupive Jehová omeʼẽ ñandéve opa mbaʼe ñaikotevẽva ñamombarete hag̃ua ñande jerovia. Jareko avei heta informasión ikatúva jaiporu jajapo jave pe Aty Jastudia Hag̃ua Ñande Rogayguándi térã ñande estúdio personál. Peteĩ ermáno oĩva Kuérpo Governántepe heʼi: “Alee rire Ñandejára Ñeʼẽ, che apyta ajepyʼamongeta hese, apensa mbaʼépa heʼise chéve g̃uarã ha mbaʼéichapa ikatu aiporu pe informasión che rekovépe. Koʼã mbaʼe omombarete che jerovia ha chembovyʼaiterei; ndaipóri mbaʼeve iporãvéva upévagui”. Añetehápe, la Biblia heʼíva ikatu ñanembopyʼarory (Prov. 2:10).

Koʼág̃a avei káda día Ñandejára siervokuéra oñemboʼe Jehovápe. Chupe g̃uarã umíva hyakuã asy pe insiénsoicha (Sal. 141:2). Ajépa ñañeñandu porãite jaikuaávo Jehová oguerohoryha ñane ñemboʼe. Ha ñaneumílderamo haʼe katuete ñanerendúta.

Moisés oñemboʼe vaʼekue heʼívo: “Ñandejára Jehová, ndepyʼaporã toĩ orendive. Ha ehovasami ore rembiapo osẽ porã hag̃ua” (Sal. 90:17, NM). Koʼág̃a Jehová ovendesi ñane rembiapo japredika rupi kyreʼỹme (Prov. 10:22). Ikatu oime ñaipytyvõ peteĩ ñande rapichápe oikuaa hag̃ua pe añetegua, térã heta tiémporema japredika, jepe umi hénte nañanerenduséi, ñanderasykatu, ñañedeprimi térã oĩ ñandepersegíva (1 Tes. 2:2). Upéicharamo jepe, ‘jahecha Jehová imbaʼeporãha’ ha ñañandu oguerohoryha opa mbaʼe jajapóva hesehápe.

Rréi David opurahéi vaʼekue Ñandejárape: “Jehová nde reime che ykére ha upéva che la aipotáva. Nde hína pe párte otokáva chéve, ha remyenyhẽte che kópa. Yvy iporãháme remeʼẽ chéve aiko hag̃ua. Mbaʼéiko aipotave upévagui” (Sal. 16:5, 6, NM). Haʼe ovyʼaiterei oreko haguére peteĩ “párte otokáva” chupe, térã ikatúgui oservi Jehovápe ha oĩ porã henondépe. Ñande ikatu hína jasufri heta, David ohasa asy haguéicha, péro Jehová avei ñanevendesi chupe ovendesi haguéicha. Upéicharõ, jahechakuaákena mbaʼeichaitépa Jehová imbaʼeporã ñanendive, ha siémpre jaagradese opa mbaʼe omeʼẽva ñaime porã hag̃ua hendive.