JEHOVÁ haʼe pe “Mboʼehára Ijojahaʼỹva” (Is. 30:20, NM). Haʼe ohayhúgui yvypórape ohekomboʼe chupekuéra. Pór ehémplo, oporohayhúgui “ohechauka [Jesúspe] opa mbaʼe ojapóva” (Juan 5:20, NM). Haʼe ñanderayhúgui “ñanembokatupyry ñañeʼẽ hag̃ua”, upéicha ñamombaʼeguasu chupe ha ñaipytyvõ ñande rapichakuérape (Is. 50:4, NM).

Pe Komite de Enseñánsa oĩva Kuérpo Governánte poguýpe osegi Jehová ehémplo ha omoĩ 10 eskuéla oñembokatupyry hag̃ua umi ermáno ohosévape koʼã eskuélape ha isituasión omeʼẽva chupe upearã. ¿Rehechakuaápa koʼã eskuéla rupive mbaʼeichaitépa Jehová ñanderayhu?

Romokyreʼỹ relee hag̃ua heʼihápe “Umi eskuéla Jehová oiporúva oporombokatupyry hag̃ua”, ohechaukáva umi eskuéla ojejapóva koʼág̃a rupi ha umi mbaʼe heʼíva ermanokuéra ohovaʼekue koʼã eskuélape. Upéi reñeporandumi: “¿Mbaʼéichapa ikatu chepytyvõ koʼã eskuéla?”.

Jehová, pe “Ñandejára oporohayhúva” ñanerekomboʼe rupi ñanepytyvõ ñambohovái hag̃ua umi provléma ha akóinte javyʼa hag̃ua iservísiope (2 Cor. 13:11, NM). Umi kristiáno ypykuépe oñembokatupyry haguéicha, Jehová ñanembokatupyry ‘ñamboʼe hag̃ua opa mbaʼe’ Jesús omandavaʼekue ñandéve (Mat. 28:20).

Oiméne jahechakuaa ndaikatumoʼãiha jaha enterove eskuéla oĩvape, péro peteĩvape jepe ikatu jaha ha upéva tuicha ñanepytyvõta. Enterove ikatu ñañehaʼã jajapo umi mbaʼe ñaaprendéva la Bíbliagui, ha japredikáramo umi ermáno ohovaʼekuéndi koʼã eskuélape katu ñandekatupyryvéta predikasiónpe.

Eñeporandumína: “¿Ijápa chéve aha hag̃ua peteĩvape jepe koʼã eskuélape?”.

Enterove Jehová siervokuéra ñamombaʼeterei ikatu haguére jaha ha ñaaprende hetave mbaʼe umi eskuélape. Hiʼãite umi mbaʼe reaprendéva nemoag̃uive Ñandejárare ha nepytyvõ rejapo porãve hag̃ua nerembiapo Jehová servísiope, koʼýte remotenonde hag̃ua pe tembiapo iñimportantevéva: Remombeʼu pe marandu porã enterove tapichápe.