Umi kristiáno tee omombaʼe Ñandejára Ñeʼẽ

REPRODUCIR EN

“Ne ñeʼẽ ningo pe añetegua.” (JUAN 17:17, ÑÑB)

1. Mbaʼérepa ere testígo de Jehová idiferenteha ambue rrelihióngui?

NEMANDUʼÁPA reñemongeta ypýrõ guare peteĩ testígo de Jehovándi? Mbaʼépa reguerohoryvéraʼe? Katuete heta kristiáno heʼíne: “Amombaʼeterei ombohovái porãmba haguére chéve la Biblia rupive umi mbaʼe aporandúva guive”. Ajépa javyʼaite jaikuaávo mbaʼépa Ñandejára ojapóta ko Yvy ha yvyporakuéra rehehápe, ñaaprendévo mbaʼépa oiko umi omanovaʼekuégui ha ikatutaha jahecha jey chupekuéra.

2. Mbaʼérepa nde remombaʼe la Biblia?

² Restudiavévo rehóvo, oiméne rehechakuaa la Biblia omyesakãha heta mbaʼe yvyporakuéragui, ñemanógui ha umi mbaʼe ñaneraʼarõvagui. Péro noñeʼẽi koʼã mbaʼérente. Ko lívrope oĩ konsého yma guivéma ideprovechoitereíva hetápe. Opavave ojapóva heʼíva ipype oiko porã ha ovyʼa (elee Salmo 1:1-3). Ndareíri umi kristiáno tee oguerovia la Biblia “ndahaʼeiha yvypóra ñeʼẽnte, haʼeha Ñandejára Ñeʼẽ uvei” (1 Tes. 2:13, JMP). Ko artíkulope jahecháta mbaʼéichapa yma guive tuicha idiferénte umi ohayhúva la Biblia ha umi nomombaʼéiva.

OÑESOLUSIONA PETEĨ MBAʼE IJETUʼÚVA

3. Mbaʼe provlémapa oñepyrũ kongregasiónpe síglo primérope, ha mbaʼérepa ijetuʼuete upéva?

³ Cornelio ojeporavovaʼekue espíritu sánto rupive oho hag̃ua yvágape, jepe ndahaʼéi hudío ha noñesirkunsidái, ha upe guive heta hetave tapicha tetã ambuegua oñepyrũ ojerovia Crístore. Péro ko situasión omoñepyrũ peteĩ provléma ijetuʼúva. Ojedesidivaʼerã tekotevẽtapa umi ndahaʼéiva hudío oñesirkunsida ojevautisa hag̃ua. Umi oĩvaʼekue hudiokuéra rrelihiónpe ndoikuaaporãi mbaʼépa ojejapovaʼerã. Ani ñanderesarái umi okumplíva pe Léi ni ndoikeiha hudioʼỹva rógape, ha koʼýte hasy chupekuéra otrata hag̃ua koʼãvape iñermánoicha. Hiʼarive umi kristiánope ojepersegi omboyke haguére irrelihión yma guare. Upévare ohejáramo oike ijapytepekuéra tetã ambuegua, iprovléma hetavéta ha umi ótro hudío koʼýte oñemoĩta hesekuéra (Gál. 2:11-14).

4. Máva mávapa oñembyaty osolusiona hag̃ua pe provléma, ha mbaʼépa oñembohovaivaʼerã?

⁴ Áño 49-pe, umi apóstol ha ansianokuéra Jerusalengua ‘oñembyaty oñemongeta hag̃ua upe mbaʼére’. Enterovéva koʼã kuimbaʼe oñesirkunsidavaʼekue (Hech. 15:6, BNP). Haʼekuéra noñemoĩri ojodiskuti rrelihiónre, síno kyreʼỹme ohesaʼỹijo Ñandejára Kuatiañeʼẽ heʼíva. Ohechakuaa hikuái oñepensaha mokõi hendáicha, ha enterovévante odefende mbareteha ogueroviáva. Mbaʼéichapa oñesolusionáta ko provléma? Omboykétapa hikuái umi ndahaʼéivape hudío ha odesidíta haʼekuéra ontendeháichante? Ohaʼarõtapa oñetrankilisa raẽ umi rrelihióso hetãyguakuéra? Omboykétantepa pe oĩ porãva ani hag̃ua ombopochy avavépe?

5. Mbaʼérepa pe aty oikovaʼekue Jerusalénpe áño 49-pe idiferentete umi aty ojapóvagui rrelihionkuéra omoakãva?

⁵ Oñembyaty jave umi omoakãva rrelihión heʼíva ijehe kristianoha, pyʼỹinte oguevi okonvenítaramo chupekuéra, térã ijaty mboyve voi oñomboligapáma ovota hag̃ua ou porãvévare chupekuéra. Péro umi apóstol ha ansianokuéra oñembyatýrõ guare Jerusalénpe ndojapoivaʼekue upéva. Haʼekuéra nopensáiramo jepe peteĩchapa, oñehaʼã og̃uahẽ peteĩ ñeʼẽme. Mbaʼérepa? Enterovéva omombaʼeve Ñandejára Ñeʼẽ, upévare omboykénte haʼekuéra opensáva. Avei oikuaa hikuái upéva añoite oipytyvõtaha oñesolusiona hag̃ua upe provléma (elee Salmo 119:97-101).

6, 7. Mbaʼéichapa umi kristiáno oiporu Ñandejára Ñeʼẽ osolusiona hag̃ua pe provléma?

⁶ Mbaʼe téystopa oipytyvõ chupekuéra osolusiona hag̃ua pe provléma? Amós 9:11, 12 heʼíva, oĩva avei Hechos 15:16, 17-pe: “Ajúta amyatyrõ David róga hoʼapavaʼekue ha amopuʼã jeýta, ikatu hag̃uáicha umi hénte opytáva, ha hendivekuéra umi tetã ambuegua oñehaʼãmbaite oñemoag̃ui cherehe. Che ningo Jehová, ha haʼekuéra ogueraha che réra” (NM).

⁷ Amós 9:11, 12-pe ndeʼíri umi tetã ambuegua oserviséva Ñandejárape natekotevẽiha oñesirkunsida. Péro umi kristiáno hudío olee rire ko téysto ontendéta mbaʼépa ojejapovaʼerã. Mbaʼérepa? Haʼekuéra oikuaa peteĩ hudioʼỹva oñesirkunsidáramo ojehechamaha peteĩ hudío teéramo, ndojeʼevéima hese haʼeha “tetã ambuegua” (Éxo. 12:48, 49). Upéva ojehecha avei Ester 8:17-pe, heʼihápe: “Heta umi tetãygua apytégui oñesirkunsida ha oiko hudíoramo” (NM, nóta). Upéicharõ, mbaʼépa heʼi Amós oikotaha? Heʼi opuʼãtaha peteĩ tetã pyahu oikótava Jehová rérape. Upe tetã pyahúpe ñepyrũrã oikéta Israelgua. Umíva hína kuimbaʼe ha kuña hudío teéva ha avei tetã ambuegua oñesirkunsidavaʼekue. Péro heʼi hendivekuéra oĩtaha “tetã ambuegua” térã hudioʼỹva noñesirkunsidáiva. Upéicha hesakã porã umi ndahaʼéiva hudío natekotevẽiha oñesirkunsida ojevautisa hag̃ua.

8. Mbaʼérepa jaʼe umi kristiáno ipyʼaguasu hague?

⁸ Ñandejára Ñeʼẽ ha pe espíritu sánto oipytyvõ umi kristiáno ipyʼaporãvape ‘oñemoĩ hag̃ua peteĩ ñeʼẽme’ (Hech. 15:25, NM). Ha opavave kristiáno iñeʼẽrendúva oguerovia oĩ porãha upe ojedesidivaʼekue Ñandejára Kuatiañeʼẽ rupive, oikuaáramo jepe ojepersegivetaha chupekuéra upévare (Hech. 16:4, 5).

TUICHA IDIFERÉNTE HIKUÁI

9. Mbaʼéicha rupípa oñemboʼe heta mbaʼe hekopeguaʼỹ kongregasiónpe, ha mbaʼépa omboʼe hikuái?

⁹ Pablo heʼivaʼekue oĩtaha omboʼéva japu umi apóstol omano rire ha upéva ombyaitaha pe kongregasión (elee 2 Tesalonicenses 2:3, 7). Hiʼarive oĩta ansiáno jepe ‘nohendusemoʼãiva mbaʼeve iporãva oñemboʼéva’ (2 Tim. 4:3). Haʼe heʼi porã umi ansiáno itiempopeguápe: “Pende apytégui voi opuʼãta kuimbaʼe omboʼétava heta mbaʼe hekopeguaʼỹ, ogueraha hag̃ua hapykuéri Jesús remimboʼekuérape” (Hech. 20:30, NM). Mbaʼéicha rupípa oñepyrũ omboʼe hikuái heta mbaʼe hekopeguaʼỹ? Peteĩ diksionário omombeʼu: “Peteĩ tiémpope, umi kristiáno ostudiavaʼekue mboʼeharakuéra griégo ndive, oñepyrũ omyesakã Ñandejára Ñeʼẽ haʼekuéra ontendeháicha. Oñemoarandu oipotágui oñembotuicha chupekuéra ha ogueruségui kongregasiónpe tapicha ijestudiovéva” (The New Encyclopædia Britannica). Mbaʼe mbaʼépa omboʼe hikuái? Pór ehémplo, Jesucristo haʼeha Ñandejára, jepe la Biblia heʼi Ñandejára Raʼyha.

10. Mbaʼéichapa ikatúkuri umi saserdóte og̃uahẽ peteĩ ñeʼẽme?

¹⁰ Umi rrelihión omoakãva oñembyatyvaʼekue heta vése ohecha hag̃ua mávapa añetehápe Jesucristo. Ha ndahasymoʼãikuri oñentende porã hag̃ua umi saserdóte omombaʼérire la Biblia. Péro haʼekuéra ndojapói upéva, síno oñembyaty mboyve voi odesidíma mbaʼépa heʼíta, ha osẽvo upégui koʼýte oñemohatã upe ogueroviávape. Pyʼỹinte umi léi haʼekuéra omoĩva irrelihionkuérape g̃uarã noñeguenohẽi la Bíbliagui.

11. Mbaʼeichaite pevépa oñemombaʼe umi Paʼi yma guare kuatiañeʼẽ, ha mbaʼérepa?

¹¹ Mbaʼérepa omboyke la Biblia umi opensáva Jesús haʼeha Ñandejára? Peteĩ mboʼehára hérava Charles Freeman omombeʼu: “Hetaiterei vése Jesús voi heʼivaʼekue oĩha itúva poguýpe. Ha umi saserdóte ndoikuaavéima mbaʼépa ojapóta Jesús ñeʼẽnguégui”. Upéicha rupi omboyke ohóvo Mateo, Marcos, Lucas ha Juan kuatiañeʼẽ, ha omotenonde hikuái umi rrelihión omoakãva heʼíva ha kostumbrekuéra. Koʼag̃aite peve, heta saserdóte omombaʼeve umi kuatiañeʼẽ ohaivaʼekue umi Paʼi yma guare, omombaʼe rangue Ñandejára Ñeʼẽ. Oñeporandúramo peteĩ seminarístape Trinidad rehe, katuete ojehechakuaáta añetehápe ojeroviaveha hikuái umi Paʼi kuatiañeʼẽre.

12. Mbaʼeichaite pevépa omanda pe mburuvicha Romaygua umi saserdótere?

¹² Ñanemanduʼavaʼerã yma umi saserdóte oñembyaty jave, katuete umi mburuvicha Romaygua omoinge hague ikuchára. Imanduʼávo pe aty ojapovaʼekuére umi paʼi Nicéape, mboʼehára Richard E. Rubenstein omombeʼu mburuvicha Constantino “ombopláta hetaiterei hague [umi ovíspope] ha omeʼẽ chupekuéra oipotáva guive. Un áño rupi oisãmbyhy haguépe, omeʼẽ ha omopuʼãkapa jeýma umi tupao ojepeʼavaʼekue chuguikuéra, omeʼẽmba jey umi paʼípe ipuésto ha oñembotuicha jey chupekuéra [...]. Constantino oheja koʼãva omanda, ojapo haguéicha umi saserdóte ndahaʼéiva kristiáno [...]. Haʼe ojapo rupi koʼã mbaʼe, tuichaiterei omanda umi paʼíre oñembyaty jave hikuái”, térã ikatu voi haʼete odesidi mbaʼépa ojejapóta. Charles Freeman katu heʼi: “Oiko rire pe aty Nicéape, pe mburuvicha Romaygua oipytyvõ paʼikuérape omombarete hag̃ua irrelihión ha avei heʼi mbaʼépa oñemboʼevaʼerã tupaópe” (elee Santiago 4:4).

13. Mbaʼérepa nde ere umi rrelihión omoakãva omboyke hague la Biblia omboʼéva?

¹³ Umi hénte upe tiempopegua ohechakuaa mávapa añetehápe Jesucristo, ndojoguaiete umi rrelihión omoakãvape. Koʼã tapicha ndoikói oñemoĩ porãse pe mburuvicha ndive okonsegi hag̃ua óro ha kárgo ijyvatéva iglésiape, upéicha rupi ndahasýi chupekuéra ojerovia hag̃ua la Bíbliare. Pór ehémplo, peteĩ karai ostudiáva rrelihión hérava Gregorio de Nisa, oñembohory koʼã héntere ha heʼi: “Constantinóplape oĩ heta komersiánte, kambísta ha ambue hénte ombaʼapóva. Umíva oikuaaiterei guaʼu Ñandejáragui ha oimeraẽvante heʼi ndéve Jesús ndahaʼeiha Ñandejára, Túva iñimportanteveha Taʼýragui ha oĩ hague ojapóva Jesúspe”. Péicha jahecha umi hénte oguerovia hague la Bíbliape oĩvante. Péro Gregorio de Nisa ha ambue omoakãva rrelihión ndohechakuaái koʼã mbaʼe. Ajépa iporãve vaʼerãmoʼã ohendúrire hikuái umi héntepe!

“TRÍGO” HA “ÑANA VAI” OKAKUAA OÑONDIVE

14. Mbaʼérepa jaʼekuaa síglo primero guive oĩtaha ko yvy ape ári kristiáno unhído?

¹⁴ Peteĩ ehémplo rupive, Jesús ontendeukavaʼekue síglo primero guive oĩtaha katuete ko yvy ape ári kristiáno unhído. Chupekuéra oñembojoja pe “trígo” okakuaátavare “ñana vai” apytépe (Mat. 13:30, NM). Máva mávapa umi oñembojojáva pe “trígo” rehe? Ndajaikuaaporãiramo jepe, jaʼekuaa oĩ hague heta tapicha pyʼaguasúpe odefendevaʼekue la Biblia ha ohechauka oĩha heta japu oñemboʼéva umi tupaópe. Jahechamína mávapa koʼã kuimbaʼe.

15, 16. Emombeʼu máva mávapa avei omombaʼevaʼekue Ñandejára Ñeʼẽ.

¹⁵ Peteĩ arsovíspo Franciaygua, hérava Agobardo de Lyon (779-840), heʼi noĩporãiha oñemombaʼeguasu taʼanga, ojejapo tupao peteĩ sántope g̃uarã ha ojesegi umi kostúmbre la Biblia nomboʼéiva. Ambue ovíspo itiémpope guare, hérava Claudio de Turín, ndoguerohoryiete umi paʼi ojapóva ha heʼi oĩ vaiha oñeñemboʼe sántope térã oñemombaʼe umi rrelíkia. Síglo 11-pe, peteĩ archidiákono Franciaygua hérava Berengario de Tours, heʼi la Biblia omboʼéva iñimportanteveha opa mbaʼe ojejapóvagui tupaópe. Hiʼarive oñemosẽ irrelihióngui heʼi haguére japuha pe pán ha víno ojeporúva misahápe haʼeha Cristo rete ha huguy.

¹⁶ Síglo 12-pe, pe saserdóte Pedro de Bruys ha pe mónhe Enrique de Lausana, ohechauka omombaʼeha Ñandejára Ñeʼẽ omboʼéva. Pedro de Bruys ndoservivéi saserdóteramo ohechakuaávo la Biblia nomboʼeiha umi mitã oñemongaraivaʼerãha, pe pán ha víno haʼeha Cristo rete ha huguy, ojejapo ñemboʼe omanóvare ha oñemombaʼeguasuvaʼerãha kurusu. Heʼi haguére oĩ vaiha koʼã mbaʼe, ojejuka chupe áño 1140-pe. Enrique de Lausana katu ndokyhyjeivaʼekue heʼi hag̃ua umi paʼi ipokarẽ ha ojapoha heta mbaʼe noĩrivaÑandejára Ñeʼẽme. Áño 1148-pe ojegueraha kárselpe ha ojeheja upépe omano meve.

17. Mbaʼépa ojapo Valdo ha isegidorkuéra?

¹⁷ Pedro de Bruys ojejuka tatápe otaky haguére umi saserdótere. Upe tiémpo rupi, onase peteĩ kuimbaʼe ombaʼapótava iñasãi hag̃ua la Biblia omboʼéva. Ijapellído Valdès, térã Valdo. a Haʼe ningo ndahaʼéi saserdóte ni mónhe, péro omombaʼeterei avei Ñandejára Ñeʼẽ. Mbaʼépa ojapo Valdès? Omeʼẽmbaite umi mbaʼe orekóva ha otradusika heta lívro oĩva la Bíbliape peteĩ idióma oñeñeʼẽvévape Fránciape, suréste gotyo. Heta tapicha ovyʼaiterei olee rire iñeʼẽtépe ko Biblia, upémarõ omeʼẽmba avei umi mbaʼe orekóva ha oikove aja pukukue omombeʼu hapichakuérape Ñandejára Ñeʼẽ omboʼéva. Koʼã kuña ha kuimbaʼe ombaʼapo kyreʼỹvape oñehenói valdénse. Ha omboʼe rupi la Biblia heʼíva, umi paʼi ndaijaʼéi hesekuéra. Áño 1184-pe katu pe pápa omosẽ chupekuéra rrelihión katólikagui ha pe ovíspo iterritóriopegua omosẽ chupekuéra hogakuéragui. Upéicharõ jepe, omombeʼu hikuái ohoha gotyo umi mbaʼe omboʼevaʼekue Valdo, Pedro de Bruys, Enrique de Lausana ha ambue opensáva haʼekuéraicha. Péicha ojepredika hetaiterei hendápe Európape. Upéi, heta áño rire oĩ jey tapicha odefendéva la Biblia, pór ehémplo John Wycliffe (1330-1384 rupi), William Tyndale (1494-1536 rupi), Henry Grew (1781-1862) ha George Storrs (1796-1879).

“ÑANDEJÁRA ÑEʼẼ NDAIKATÚI OJEJOKO”

18. Mbaʼépa ojapo umi Estudiánte de la Biblia síglo 19-pe guare oikuaa hag̃ua la Biblia omboʼéva, ha mbaʼérepa osẽ porã hikuái?

¹⁸ Umi ndoipotáiva iñasãi Ñandejára Ñeʼẽ ndaikatumoʼãi ojapo mbaʼeve; pe marandu porã oĩva ipype katuete oñemombeʼúta. Upévare 2 Timoteo 2:9 heʼi: “Ñandejára Ñeʼẽ ndaikatúi ojejoko” (BNP). Áño 1870-pe, umi Estudiánte de la Biblia oñepyrũ ohecha mbaʼépa añetehápe omboʼe la Biblia. Mbaʼéichapa ojapo hikuái upéva? Peteĩva ombaʼeporandu ha upéi enterovéva oñemoĩ ohesaʼỹijo porã la Biblia. Ojehechapaite umi versíkulo oñeʼẽva upe témare ha oñeg̃uahẽ rire peteĩ ñeʼẽme, ojehai mbaʼépa ojedesidi. Jahechaháicha, umi apóstol ha ansianokuéra síglo primeropegua ojapo haguéicha, koʼã kristiáno oikovaʼekue síglo 19 pahápe, ohesaʼỹijo porã la Biblia ojapo hag̃ua upépe heʼívante. Ajépa ñanembopyʼaguapy jaikuaávo haʼekuéra ojapo hague upéicha!

19. Mbaʼe téystopa ojeporavo áño 2012-pe g̃uarã, ha mbaʼérepa ou porãite opavavépe?

¹⁹ Koʼág̃a peve umi mbaʼe jagueroviáva oñeguenohẽ la Bíbliagui. Upévare Cuerpo Gobernante de los Testigos de Jehová, oiporavo áño 2012-pe g̃uarã Jesús heʼivaʼekue: “Ne ñeʼẽ ningo pe añetegua” (Juan 17:17, ÑÑB). Jaipotáramo Jehová ñandeguerohory, jaikovaʼerã Iñeʼẽ heʼihaichaite. Upévare jahejákena chupe tañanesãmbyhy la Biblia rupive opa mbaʼe jajapóvape.

[Nóta]

a Oñehenóiramo jepe chupe Pierre, térã Pedro, ndojekuaaporãi mbaʼéichapa héra tee.

[Porandu ñahesaʼỹijóva]

[Komentário oĩva páhina 8-pe]

Téysto 2012-pe g̃uarã: “Ne ñeʼẽ ningo pe añetegua” (Juan 17:17, ÑÑB)