Ñamombaʼépa Jehová omeʼẽva ñandéve?

MBAʼEICHAITÉPA ovyʼavaʼekue umi Israelgua Jehová omosãsórõ guare chupekuéra Egipto poguýgui. Koʼág̃a ikatúma omombaʼeguasu hikuái Jehovápe mbaʼeve ojokoʼỹre chupekuéra! (Éxo. 14:29–15:1, 20, 21.) Péro sapyʼaitérõ g̃uarã okambiáma hikuái ha oñepyrũ ojekeha. Mbaʼérepa? Ojepyʼapýgui umi mbaʼe ohasávare pe desiértope imanduʼa rangue Jehová ojapóvare hesehapekuéra. Heʼi hikuái Moiséspe: ‘Maʼerãiko oreguenohẽraʼe Egíptogui romanomba hag̃ua ko desiértope, koʼápe ndaipóri pán ni y ha ore ángape ombyajúma ko maná vevuiete’ (Núm. 21:5, ÑÑB).

Heta tiémpo upe rire, David opurahéi Ñandejárape: ‘Che ajerovia nderehe ha avyʼa cherenohẽ haguére jejopy vaígui. Ñandejárape apurahéita, haʼe chepytyvõ haguére’ (Sal. 13:5, 6). David arakaʼeve ndahesaráiri mbaʼéichapa Jehová ohechauka chupe imborayhu ha pyʼỹinte ojepyʼamongeta umívare (Sal. 103:2). Ñande Ru yvagapegua hetaiterei mbaʼe porã ojapo avei ñanderehe, péro nañañatendéiramo ikatu ndajahechakuaái ha nañamombaʼevéi. Ani hag̃ua oiko upéva, jahecháta mbaʼéichapa koʼág̃ama voi Jehová tuicha ñanderovasa.

Jaiko Jehová amígoramo

Pe salmísta opurahéi: ‘Ñandejára ohayhu umi chupe omombaʼévape’ (Sal. 25:14). Ajépa tuichaite mbaʼe ñaneimperféktoramo jepe Jehová ñanderayhu ha jaiko iñamígoramo! Péro ñane rembiapo hetágui sapyʼánte ikatu ñanderesarái ñande Ru yvagapeguágui. Péicha oikóramo ñanderehe, ñapensavaʼerã mbaʼéichapa oñeñandúta Jehová. Haʼe ningo ñane amígo ha oipota jajerovia hese ha ñamombeʼu chupe umi mbaʼe jajaposéva ha ñandepyʼapýva (Pro. 3:5, 6; Fili.  4:6, 7). Añetehápe, iporãta jajepyʼamongetami mbaʼéichapa ñañemboʼeñaína Jehovápe.

Paul, peteĩ mitãrusu testígo de Jehová, ojepyʼamongeta mbaʼéichapa oñemboʼe Jehovápe ha ohechakuaa tekotevẽha okambia. * Haʼe heʼi: “Añemboʼe jave arrepetipa jepi umi mbaʼe haʼéva”. Upémarõ haʼe oheka informasión Índice de las publicaciones Watch Tower-pe ha otopa la Bíbliape oĩha 180 ñemboʼe rupi. Umi ñemboʼépe Ñandejára rembiguaikuéra yma guare omombeʼupaite Jehovápe hemiandu. Paul heʼi: “Ajepyʼamongetávo koʼã ehémplore, ahechakuaa mbaʼe mbaʼe rehépa ikatu añemboʼe ha upéva chepytyvõ añeʼẽ hag̃ua Jehovápe che pyʼaite guive. Koʼág̃a avyʼaiterei añemoag̃uívo Jehováre ñemboʼe rupive.”

‘Tembiʼu hiʼoraitépe’

Ambue mbaʼe Jehová omeʼẽva ñandéve haʼe umi mbaʼe jaikuaáva Iñeʼẽ rupive. Ndareíri ningo ‘vyʼapópe japurahéi ha pyʼarorýgui ñanerenyhẽ’ (Isa. 65:13, 14). Péro ñañeñangarekovaʼerã ani hag̃ua umi mbaʼe vai ojejapóva ko múndope ñanemokangy ha nañamombaʼevéi pe añetegua. Pór ehémplo, jajesarekóramo umi apóstata heʼívare ikatu jajesarea ha nañamombaʼevéi pe ‘tembiʼu’ omeʼẽva ñandéve Jehová ‘hiʼoraitépe’ pe ‘tembiguái jeroviaha ha iñarandúva’ rupive (Mat. 24:45-47).

Péicha oikovaʼekue André rehe, oservíva Jehovápe heta áñore. Haʼe hoʼa umi apóstata ñuhãme oimoʼãgui ndojapovaimoʼãiha hese omañaʼimíramo Internet-pe heʼívare hikuái. André heʼi: “Añepyrũvo alee chembokurióso umi mbaʼe omboʼéva hikuái añeterõguáicha ha aleevévo aroviavéma chupekuéra ha amo ipahápe haʼéma voi iporãveha aheja Jehová organisasión. Péro upe rire ahesaʼỹijo porã umi mbaʼe heʼíva hikuái Testigos de Jehováre ha ahechakuaa koʼã apóstata haʼeha mboʼehára japu ha ikatupyryetereiha oporombotavy hag̃ua. Haʼekuéra oiporu hendapeʼỹ ñane puvlikasionkuérape heʼíva ñandereja vai hag̃ua. Upévare añepyrũ jey alee ñane puvlikasionkuéra ha aha rreunionhápe. Upéi ahechakuaa heta mbaʼe porã ajavy hague añemomombyry haguére Jehová organisasióngui”. Javyʼaiterei André ou jey haguére kongregasiónpe.

Ñane ‘ermanokuéra’

Javyʼa jaiko rupi mborayhúpe ha peteĩ ñeʼẽme ñane ermanokuéra opa tetãygua ndive, péicha Jehová ñanderovasa avei (Sal. 133:1). Ajeve voi Pedro ohai: “Pehayhúkena ermanokuérape” (1 Ped. 2:17, BNP). Añetehápe, ñaime rupi kongregasiónpe jareko heta ermáno, ermána, sy ha túva ñanderayhu ha ñanepytyvõva opa mbaʼépe (Mar. 10:29, 30).

Upéicharamo jepe sapyʼánte ikatu ijetuʼu ñandéve jajogueraha porã hag̃ua ermanokuéra ndive. Pór ehémplo, ikatu  ñandepochy ñane ermáno ojavýramo ha ñañeʼẽ vaíma hese. Oimérõ ojehu ñandéve upéicha, iporã ñanemanduʼa Jehová ohayhuha opavave isiervokuérape iñimperféktoramo jepe hikuái. Aníkena ñanderesarái avei ‘jaʼéramo ndajarekoiha pekádo ñañembotavyha ñandejupe voi, ha ndajaʼeiha pe añetegua’ (1 Juan 1:8, BNP). Iporãvéta jajapóramo Colosenses 3:13 heʼíva: “Pejogueropuʼaka ha peñoperdona”.

Peteĩ mitakuña hérava Ann heta ohasa asy rire ohechakuaa iporãveha ñaime ermanokuéra apytépe. Ojapo haguéicha pe mitãkariaʼy Jesús omombeʼuvaʼekue peteĩ ehémplope, haʼe oñemomombyry Jehová organisasióngui, péro ojepyʼamomgeta porã rire umi mbaʼe ohasávare ou jey kongregasiónpe (Luc. 15:11-24). Mbaʼépa oaprende Ann? Haʼe omombeʼu: “Aju jey guive kongregasiónpe, amombaʼeve che ermáno ha ermanakuérape ojavýramo jepe. Yma apensaʼỹre añeʼẽ vai hesekuéra, koʼág̃a katu ndahejamoʼãi mbaʼeve chejoko aime hag̃ua hendivekuéra. Kongregasiónpe ningo javyʼave ñaime porã rupi Jehová ha ñane ermanokuéra ndive. Tuichaiterei jajavy ñañemomombyrýramo Jehová organisasióngui, ko múndo oikuaveʼẽva ndovaléi mbaʼeverã”.

Akóintekena ñamombaʼe Jehová omeʼẽva ñandéve

Jaikuaa Ñandejára Rréino oipeʼapaitetaha umi provléma jaguerekóva, upéva ningo peteĩ mbaʼe ijojahaʼỹva. Ajépa javyʼaiterei ñahendu ypýrõ guare umi mbaʼe porã Ñandejára ojapótava! Ñamombaʼeterei Jehová omeʼẽva ñandéve ojapo haguéicha pe kuimbaʼe Jesús oñeʼẽ hague. Ko kuimbaʼe ojogua hag̃ua ‘peteĩ pérla iporãitereíva, oho ovendepa umi ikosakuéra’ (Mat. 13:45, 46, NM). Oúpa nomombaʼevéi ko kuimbaʼe pe pérla ojoguavaʼekue? Jesús ndeʼíri upéicha hague. Ñande avei akóinte ñamombaʼévaʼerã pe esperánsa ijojahaʼỹva jaguerekóva (1 Tes. 5:8; Heb. 6: 9).

Jahechamína Jean ehémplo, peteĩ ermána 60 áño rasáma oservíva Jehovápe. Haʼe heʼi: “Añeʼẽ memévo che rapichakuérape Ñandejára Rréinore chepytyvõ akóinte apensa hag̃ua umi mbaʼe porã ojapótavare. Chembovyʼaiterei ahechávo mbaʼéichapa umi cherendúva hova rory asy ontendévo mbaʼépa heʼise ko Rréino. Ha koʼýte ahechávo mbaʼéichapa la Biblia oipytyvõ chupekuéra okambia hag̃ua hekove, upévare ikatu haʼe: ‘Iporãite pe marandu porã ñamombeʼúva opárupi!’”

Jahechaháicha Jehová tuicha ñanderovasa, upévare koʼẽ koʼẽre jaagradesevaʼerã chupe. Añetehápe ningo koʼág̃a ñambohovái heta mbaʼe ijetuʼúva. Pór ehémplo, oĩ oñemoĩva ñanderehe, ñanderasy, ñandetuja, ndajavyʼavéi, omano ñandehegui peteĩ jahayhúva ha ijetuʼu jahupyty hag̃ua ñane remikotevẽ. Péro jaikuaa koʼã mbaʼe sapyʼamitanteha. Pe múndo pyahúpe, Ñandejára Rréino oipeʼaitéta umi mbaʼe koʼág̃a ñanembohasa asýva, ñaneresãita ha vyʼápe jaikóta opa árare (Rev. 21:4).

Upéicharõ ñahaʼarõ aja koʼã mbaʼe, ñamombaʼékena opa mbaʼe Jehová koʼág̃ama voi omeʼẽva ñandéve, ojapo haguéicha pe salmísta. Haʼe heʼi: ‘Jehová, hetaite mbaʼe porãma niko rejapo. Máva piko ndéicha imbaʼeporãva orendive? Hiʼãnte chéve amoherakuã opárupi ha hetágui ndaikatúi amombeʼupa’ (Sal. 40:5).

[Nóta]

[Nóta oĩva taʼanga ndive páhina 18]

Jehová ñanepytyvõ jagueropuʼaka hag̃ua umi provléma