Ndépa akóinte nderekopotĩta?

‘Amano meve cherekopotĩta.’ (JOB 27:​5, ÑÑB.)

1, 2. a) Mbaʼépa ñañehaʼãmbaitevaʼerã jajapo? b) Mbaʼépa ñahesaʼỹijóta koʼág̃a?

 ÑAMOĨ chupe nde rejaposehareína nderogarã ha rekalkula mbaʼéichapa rejapóta. Repensapáma voi mbaʼeichaitépa peiko porãta upépe ne família ndive. Mbaʼépa rejapovaʼerã peiko hag̃ua upéicha? Emopuʼã raẽ vaʼerã la nde róga, upéi peva pype ha peñangareko porã hese.

² Upéicha avei jajapovaʼerã ñanderekopotĩ hag̃ua. Jaikuaa ningo upéva iñimportanteha ha ojapo porãha ñanderehe ha ñande rogayguáre. Péro ndahaʼéi jaikuaantevaʼerã upéva, ñañehaʼãmbaitevaʼerã ñanderekopotĩ ha ñaneñeʼẽrendu Ñandejárape. Peteĩ óga ojejapo hag̃ua heta oñembaʼapo ha ojegasta hese (Luc. 14:​28, 29). Ñande avei heta ñambaʼapovaʼerã ñanderekopotĩ hag̃ua, ha upéicha jajapóramo ñasẽ porãta katuete. Koʼág̃a ñahesaʼỹijomíta mbohapy porandu: Mbaʼépa jajapovaʼerã ñanderekopotĩ hag̃ua? Mbaʼéichapa ikatu ñanderekopotĩ ha ñaneñeʼẽrendu Ñandejárape jahasa asýramo jepe? Ikatúpa hekopotĩ jey umi osẽvaʼekue Ñandejára rapégui?

Mbaʼépa jajapovaʼerã ñanderekopotĩ hag̃ua?

3, 4. a) Mbaʼéichapa Jehová ñanepytyvõ ñanderekopotĩ hag̃ua? b) Mbaʼépa ñanemboʼe Jesús ojapovaʼekue?

³ Jahecháma haguéicha pe artíkulo ohasavaʼekuépe, Jehová oheja ñande jadesidi ñanderekopotĩtapa. Ha haʼe voi ñanepytyvõta ñanderekopotĩ hag̃ua. Upearã ñanerekomboʼe ñaneñeʼẽrendu hag̃ua ha omeʼẽ ñandéve ijespíritu sánto jajapo hag̃ua ñaaprendevaʼekue (Luc. 11:13). Avei oñangareko entéro ñañehaʼãvare ñanderekopotĩ (Pro. 2:7).

⁴ Mbaʼéichapa Jehová ñanerekomboʼe ñanderekopotĩ hag̃ua? Upearã ombou Itaʼýrape ko yvy ape ári. Jesús ningo “iñeʼẽrendu omano meve” opaite mbaʼépe Itúva yvagapeguápe (Fili. 2:8). Jesús ohasa asyve jave jepe, heʼi Itúvape: “Opáichavo, anítei oiko pe che aipotáva, pe nde reipotávante toiko” (Luc. 22:42). Upévare ñañeporandumi: “Chépa apensa avei upéicha?”. Ñanderekopotĩ hag̃ua ningo kyreʼỹme jajapovaʼerã Ñandejára heʼíva. Jahechamíta koʼág̃a mbaʼéicha javépa tekotevẽ ñaneñeʼẽrendu.

5, 6. a) Mbaʼéicha javépa heʼivaʼekue rréi David iñimportanteha ñaneñeʼẽrendu? b) Mbaʼérepa heta ermánope ijetuʼu oiporu jave Internét?

 ⁵ Primero, ñaneñeʼẽrenduvaʼerã Jehovápe ñaime jave ñaneaño. Rréi David heʼivaʼekue iñimportanteha ñaneñeʼẽrendu upéicha jave (jaleemína Salmo 101:2). Haʼe ningo rréi rupi heta mbaʼe ojapovaʼerã hapichakuéra apytépe. Ha ojepokuaáneraʼe oñeʼẽ hetaiterei renondépe (ñambojojami Salmo 26:12 rehe). Upéicha jave haʼe ehemplovaʼerã umi Israelguápe (Deu. 17:​18, 19). Péro, David oikuaa porã avei hekopotĩvaʼerãha hogapýpe oĩ jave haʼeño. Ha ñandépa upéicha avei?

⁶ David heʼi voi: ‘Che namañamoʼãi mbaʼe vai rehe’ (Salmo 101:​3, ÑÑB). Koʼág̃a rupi ñaime jave ñaneaño hetave oportunida jareko jahecha hag̃ua umi mbaʼe vai. Heta ermánope ijetuʼu oiporu jave Internét. Ikatúgui ohecha upépe umi taʼanga tieʼỹ. Ha peteĩ kristiáno ohecháramo umi taʼanga, ndojapoihína heʼíva Salmo 101:​3-pe. Ivaieterei ningo jahecha umi taʼanga tieʼỹ, omongyʼágui ñande pyʼapy ha ñanemoakãrakúgui jajapo hag̃ua ivaíva. Upévare avei ikatu ñanderekovai ha ñandegueraha vai ñane rembireko térã ñane ména ndive (Pro. 4:23; 2 Cor. 7:1; 1 Tes. 4:​3-5).

7. Mbaʼépa heʼi la Biblia ñanepytyvõtava ñanderekopotĩ hag̃ua ñaime jave ñaneaño?

⁷ Ñande jaservíva Jehovápe ningo arakaʼeve nañaiméi ñaneañoite. Ñande Ru yvagapegua opa árape ojesareko ñanderehe (jaleemína Salmo 11:4). Mbaʼeichaite piko oiméne ovyʼa ohecha jave ndajaʼaiha Satanás ñuhãme ha jajapoha heʼi haguéicha Jesús Mateo 5:​28-pe. Upévare tekotevẽ jadesidi ndajahechamoʼãiha umi taʼanga tieʼỹ ñandeguaraha vaítava. Aníkena ñahundi ñande po rupiete opa mbaʼe jajapómava ñanderekopotĩ hag̃ua jahechase térã jaleeséguinte mbaʼe tieʼỹ.

8, 9. a) Mbaʼépa ohasavaʼekue Daniel ha iñirũnguéra? b) Mbaʼépa pejapovaʼerã peẽ testigos de Jehová imitãva pembovyʼa hag̃ua ermanokuérape ha Jehovápe?

⁸ Segundo, ñanderekopotĩ ha ñaneñeʼẽrenduvaʼerã ñaime jave umi Jehovápe ndoservíriva ndive. Ñanemanduʼami ohasavaʼekuére Daniel ha iñirũnguéra. Imitãme ojegueraha chupekuéra préso Babilóniape, ha upépe oĩ heta ndojeroviáiva Jehováre. Koʼãva mbaretépe hoʼukase chupekuéra umi tembiʼu Ñandejára léi oproivíva. Haʼekuéra ikatúkuri heʼi oimeraẽ mbaʼe omboyke hag̃ua Jehová heʼíva. Upépe ningo ndohechamoʼãi chupekuéra ituvakuéra, umi ansiáno ni umi saserdóte. Ha máva piko oikuaáta  hoʼúramo hikuái? Jehová ohechapaitehína. Upévare haʼekuéra ojepytaso mbarete ha iñeʼẽrendu Ñandejárape ojejopy ha ojere vaítaramo jepe chupekuéra (Dan. 1:​3-9).

⁹ Koʼág̃a rupi testigo de Jehová imitãva ojapo avei upéicha eskuélape: omombaʼe Ñandejára léi ha ndoguevíri umi ikompañéro ojopy jave chupekuéra ojapo hag̃ua ivaíva. Peẽ mitãrusu ha mitakuña ndapeiporúiramo dróga, ndapeikói peñorairõ, napendejurutieʼỹi ha napenderekovaíriramo, peneñeʼẽrendupeína Ñandejárape ha penderekopotĩ. Upéva ojapo porãta penderehe voi, pembovyʼáta ermanokuérape ha koʼýte Jehovápe (Sal. 110:3).

10. a) Mbaʼépa oimoʼã heta mitãrusu ha mitãkuña ndahaʼeiha fornicación? b) Mbaʼépa ojapo umi hekopotĩva?

¹⁰ Tercero, ojekuaavaʼerã jatrata lájare kuña térã kuimbaʼépe ñaneñeʼẽrenduha Ñandejárape. La Biblia ningo heʼi ivaietereiha pe fornicación. Péro, oĩ mitãrusu térã mitãkuña heʼíva ikatuha ojapo koʼã mbaʼe: ojojavyky ichíko térã ichíkandi, oipyhy ijuru rupi térã oipyhy ijatukupeguio. Haʼekuéra oimoʼã koʼã mbaʼe ndaivairiha, heʼi ndahaʼeiha gueteri fornicación. Péro umi ojapóva upéicha hesarái térã oñembyesaráinte koʼã mbaʼe haʼeha avei fornicación. Peteĩ kristiánope ningo ikatu oñemosẽ kongregasióngui ojapo haguére koʼã mbaʼe. * Ivaiveha katu umi mitãrusu ha mitãkuña omboykehína Ñandejára heʼíva. Péro umi hekopotĩva noñemoĩri oheka mbaʼépa la Biblia ndoproivíri, ha noñemoĩri avei ohecha moõ pevépa ikatu og̃uahẽ hoʼaʼỹre Satanás ñuhãme. Ndokyhyjéi hikuái ojekastigárõ g̃uarãnte, okyhyje guei ombopochy ha omoñeñandu vaírõ g̃uarã Jehovápe. Haʼekuéra ohecharangue moõ pevépa ikatu og̃uahẽ, oñemomombyry mbaʼe vai apógui ha fornicacióngui (1 Cor. 6:18). Upéicha jajapóramo ñanderekopotĩñaína.

Mbaʼéichapa ikatu ñanderekopotĩ jahasa asýramo jepe

11. Mbaʼérepa tekotevẽ akóinte ñaneñeʼẽrendu Ñandejárape? Emoĩmi peteĩ ehémplo.

¹¹ Jahecháma haguéicha ñanderekopotĩ hag̃ua tekotevẽ akóinte ñaneñeʼẽrendu. Haʼetévaicha vyroreítava ñaneñeʼẽrendu peteĩ mbaʼépe, péro saʼi saʼípe heta mbaʼe porãma jajapóta. Pór ehémplo, peteĩ ladrílloguinte ndajajapomoʼãi mbaʼeve, péro jarekóramo heta ikatúta jajapo peteĩ óga neporãmba jepéva. Upéicha avei, akóinte ñaneñeʼẽrendúramo Ñandejárape, jajapóta heta mbaʼe porã ñanderekopotĩ hag̃ua (Luc. 16:10).

12. Mbaʼe ehémplopa omoĩ ñandéve David?

¹² Jahechauka ñaneñeʼẽrenduha Ñandejárape ñambohovái jave provléma, umi  opuʼãvape ñanderehe ha umi inhustísia. Jahechamína koʼág̃a mbaʼe ehémplopa omoĩ ñandéve David. Imitãrõ guare, rréi Saúl opersegi chupe. Upérõ Saúl oĩ vaíma, ha ipyʼaro David rehe Ñandejára oguerohory haguére chupe. Saúl oisãmbyhy heta áño Israel ha oiporu ijehérsito opersegi hag̃ua Davídpe. Péro David piko ipochy Jehováre oheja haguére areterei ohasa asy? Oimoʼãpa natekotevẽveimaha ogueropuʼaka umi mbaʼe vai? Nahániri. Haʼe omombaʼeterei Saúlpe, Jehová voi oiporavógui chupe oisãmbyhy hag̃ua. Upévare David ndojukaséi Saúlpe ijárõ guare chupe (1 Sam. 24:​2-7).

13. Peteĩ ermáno ñanembopochýramo, mbaʼéichapa jahechaukáta ñanderekopotĩ ha ñaneñeʼẽrenduha?

¹³ Aje piko iporãite pe David ehémplo! Koʼág̃a rupi ñaiméva guive Jehová organisasiónpe ningo ñaneimperfékto. Upévare ikatu oĩ ermáno ñandetrata vaíva térã osẽva Ñandejára rapégui. Péro ñandepyʼaguapy jaikuaágui Jehová organisasión noñehundimoʼãiha arakaʼeve (Isa. 54:17). Ha mbaʼépa jajapóta peteĩ ermáno ñanembopochýramo? Ndovaléi ñandepyʼaro ñane ermánore, ikatúgui japyta vai Jehová renondépe. Ñande rapichakuéra ojapóvarente ndovaléi ñandepochy Ñandejára ndive ha nañaneñeʼẽrenduvéi chupe, haʼe ningo ndorekói la kúlpa (Sal. 119:165). Péro jagueropuʼakáramo koʼã mbaʼe, jahechaukáta ñanderekopotĩ ha ñaneñeʼẽrenduha.

14. Mbaʼépa jajapovaʼerã Jehová organisasión okambia jave peteĩ mbaʼe?

¹⁴ Jahechaukáta avei ñanderekopotĩha nañañeʼẽvaíriramo Jehová organisasiónre okambia jave peteĩ mbaʼe omboʼéva, térã heʼi jave mbaʼéichapa koʼág̃a guive ojejapovaʼerã peteĩ mbaʼe. Upéicha jajapóramo, ñaneñeʼẽrenduñaína Jehovápe. Haʼe ningo ovendesi isiervokuérape, ha hetaitereive oĩ omombaʼeguasúva chupe koʼág̃a rupi (Isa. 2:​2-4). Ha oñemyesakãramo ótro hendáicha peteĩ téysto, térã ojeʼéramo ojejapotaha ótro hendáicha peteĩ mbaʼe, iporãta ñaneñeʼẽrendu. Javyʼavaʼerã katu jahechávo mbaʼeichaitépa koʼẽ koʼẽre oñemyesakãve ñandéve Ñandejára rembipota (Pro. 4:18). Péro, hasýramo ñandéve jahechakuaa hag̃ua mbaʼérepa oñekambiáraʼe peteĩ mbaʼe, jajerurevaʼerã Jehovápe tañanepytyvõ ñantende hag̃ua. Upévare, akóintekena ñaneñeʼẽrendu ha jajerovia Ñandejárare.

Ikatúpa hekopotĩ jey umi osẽvaʼekue Ñandejára rapégui?

15. Mávarepa odepende ñanderekopotĩ hag̃ua?

¹⁵ Jahecháma haguéicha pe ótro artíkulope, tekotevẽ ñanderekopotĩ. Upéicharõmante ñaime porãta Jehová ndive ha ñahaʼarõta heta mbaʼe porã. Péicha jahecha ndahaʼeiha vyrorei ko mbaʼe. Ha aníkena  ñanderesarái ñanderehe odependeha ñanderekopotĩ hag̃ua. Ñande añoite ikatu ñahundi ñande po rupi umi mbaʼe jajapómava ñanderekopotĩ hag̃ua. Upévare Job heʼivaʼekue: ‘Amano meve cherekopotĩta’ (Job 27:​5, ÑÑB). Ha ñande jajapóramo upéicha ha akóinte ñañemoĩ Jehová poguýpe, arakaʼeve nañahundimoʼãi jajapómava ñanderekopotĩ hag̃ua (Sant. 4:8).

16, 17. a) Mbaʼépa nderejapoivaʼerã oiméramo rejapóraʼe ivaíva? b) Mbaʼépa rejapovaʼerã?

¹⁶ Upéicharõ jepe oĩ ermáno ohejáva Ñandejárape. Oikóma haguéicha umi apóstol tiémpope, oĩ ojapóva umi mbaʼe ivaietereíva. Ha oiméramo nde rejapóraʼe ivaíva, nanepohavéimapa? Jahechami koʼág̃a mbaʼépa nderejapoivaʼerã upéicha jave. Enterovénte ningo nañamombeʼuséi jepi jajapo hague ivaíva, tahaʼe ñande tuvakuérape, umi ansiáno térã ambue ermánope. Péro la Biblia heʼi: “Hembiapo vai omokañýva, ndohoichéne tenonde, omombeʼu ha ohejávape katu ojeporiahuverekóne” (Pro. 28:13). Umi omokañyséva hembiapo vaikue ningo tuichaiterei ojavy, Ñandejáragui mbaʼeve nokañýi, haʼe ohechapaite la oikóva (jaleemína Hebreos 4:13). Oĩ katu oporombotavyséva, oserviguaʼu Ñandejárape ha upe aja ojapo ivaíva. Upéicha ojapóva ningo ndahekopotĩri. Jehová ndoguerohorýi umi omokañývape hembiapo vaikue, ombopochy guei chupe ohechágui hovamokõiha (Pro. 21:27; Isa. 1:​11-16).

¹⁷ Ha mbaʼépa ikatu rejapo upéicharõ? Jaikuaa ningo peteĩ ermáno ojapóramo ivaíva, ohovaʼerãha ansianokuéra rendápe. Jehová omoĩ chupekuéra oipytyvõ hag̃ua umi hembiapo vaívape (jaleemína Santiago 5:14). Aníkena rekyhyjégui rejekorrehírõ g̃uarã nereñemoĩporãvéi Ñandejára ndive. Ñamoĩ chupe nderasykatuha ha tekotevẽ oñemoĩ ndéve peteĩ injeksión térã rejeopera. Eréta piko ani hag̃ua ojejapo mbaʼeve nderehe, hasýta rupi ndéve? (Heb. 12:11.)

18, 19. a) Mbaʼépa ohechauka David rehe oikovaʼekue? b) Mbaʼépa rejapovaʼerã nderekopotĩ hag̃ua?

¹⁸ Naipohavéimapa umi hembiapo vai vaʼekue? Ikatúpa hekopotĩ jey? Jahechamína David rehe oikovaʼekue. Haʼe ojapo peteĩ mbaʼe ivaietereíva. Chupe ningo ogusta tembireko ahéno, oñeno hendive, ha upéi katu ojukauka upe kuña ménape. Péicha jahechakuaa David ndahekopotĩri hague upe tiémpope. Upéicharõ jepe, ndahaʼéi naipohavéimava. Ha tekotevẽ vaʼekue ojekorrehi mbarete porã chupe. Péro, Jehová oiporiahuvereko chupe, oñembyasy rupi ipyʼaite guive. David ohechakuaa ojavy hague, ojevy hembiapo vaikuégui ha iñeʼẽrendu Ñandejárape omano meve. Upe hembiasakuére jahecha siertoha heʼíva Proverbios 24:16: ‘Pe hekopotĩva hoʼáramo jepe siete vése, katuete opuʼã jeýta’. Upéi David omano riréma, Jehová heʼi Salomónpe mbaʼépa opensa itúvare (jaleemína 1 Reyes 9:4). Ñandejára imanduʼa David rehe peteĩ kuimbaʼe hekopotĩ ha iñeʼẽrendúvaramo. Péicha jahecha Jehová operdonaha umi oñembyasývape, hembiapo vaivéramo jepe (Isa. 1:18).

¹⁹ Upéicharõ, nderekopotĩ hag̃ua neñeʼẽrenduvaʼerã opa mbaʼépe Ñandejárape ha akóinte rejeroviavaʼerã hese. Avei reñembyasýkena nde pyʼaite guive rejapo mbaʼéramo ivaíva. Aje piko tuichaite mbaʼe ñanderekopotĩ! Jaʼékena David heʼi haguéicha: ‘Che aikóta tekopotĩme’ (Sal. 26:​11, ÑÑB).

Mbaʼépa rembohováita?

• Mbaʼépa ñaikotevẽ ñanderekopotĩ hag̃ua?

• Mbaʼépa ikatu rejapo nderekopotĩ hag̃ua rejejopy vaíramo jepe?

• Ikatúpa hekopotĩ jey umi osẽvaʼekue Ñandejára rapégui?

[Nóta]

[Porandu ñahesaʼỹijóva]

[Rrekuádro oĩva páhina 8-pe]

“IPORÃITEREI NINGO LA OJAPÓVA”

Upéicha heʼi peteĩ kuñakarai imanduʼávo peteĩ mitãkuña imbaʼeporãvare. Upe kuñakarai ningo hyeguasu de cinco mése. Ha hesaraimi ivilletéragui peteĩ kafeteríape, 2.000 dólar voi orekókuri pype. Upéva ningo hetáma chupe g̃uarã. Haʼe heʼi peteĩ periodístape: “Haimete chepyʼaropu”. Péro la ipláta ningo noñehundíri. Peteĩ mitãkuña otopákuri upe villetéra ha oheka oikóvo ijárape. Ha ndotopáimaramo, ogueraha polisíape. Haʼekuéra oñemoĩ oheka upe kuñakaraípe. Upe rire ko kuñakarai heʼi: “Iporãiterei ningo la ojapóva”. Péro, mbaʼérepa hetaite oikóraʼe pe mitãkuña omeʼẽ jey hag̃ua ijárape la pláta? Pe periodísta heʼi hese testigo de Jehováha, ha “michĩ guive oñehekomboʼe hague chupe irrelihiónpe ani hag̃ua imonda”.

[Nóta oĩva taʼanga ndive páhina 9]

Umi imitãva ikatu hekopotĩ ojejopy vaíramo jepe

[Nóta oĩva taʼanga ndive páhina 10]

David ojapóramo jepe ivaíva, ojevy hembiapo vaikuégui