1, 2. ¿Mbaʼe asignasiónpa Josué orresivi Moisés omano rire?

JEHOVÁ heʼi vaʼekue Josuépe: “Che siérvo Moisés omanóma. Koʼág̃a epuʼã ejeprepara ha ehasa pe Rrío Jordán, nde ha pe puévlo kompletoite, ha peike pe yvy ameʼẽtavape chupekuéra” (Jos. 1:1, 2). Ajépa tuichaite pe kámbio Josuépe g̃uarã, pórke haʼe ningo oservi vaʼekue Moiséspe haimete 40 áñore.

² Moisés ningo omoakã vaʼekue umi israelítape heta tiémpore, péro koʼág̃a Josué la omoakãtava chupekuéra. Upévare, Josué oñeporandúne raʼe oaseptátapa chupe umi hénte kómo líder (Deut. 34:8, 10-12). Peteĩ lívro oñeʼẽva la Bíbliare heʼi ke ymaite guive oñekambia jave pe omoakãva peteĩ puévlope, haʼeha peteĩ moménto ijetuʼuetereíva ha ipeligrósova.

3, 4. ¿Mbaʼéichapa Ñandejára ovendesi Josuépe ojerovia haguére hese, ha mbaʼépa ikatu ñañeporandu?

³ Katuete ningo ñantende mbaʼérepa Josué ojepyʼapýne rakaʼe. Péro haʼe ojerovia Jehováre ha ensegídama voi osegi umi instruksión omeʼẽva chupe (Jos. 1:9-11). Pyaʼe voi ojekuaa Josué ndojeroviareíri hague Ñandejárare. La Biblia heʼi Jehová ogia hague Josué ha ipuévlo Israélpe peteĩ ánhel rupive. Posívlemente pe  ánhel haʼe kuri “pe Ñeʼẽ”, Ñandejára raʼy ypykue (Éx. 23:20-23; Juan 1:1).

⁴ Jehová oipytyvõ umi israelítape ojadapta hag̃ua la kámbiore ha oasepta hag̃ua Josuépe kómo líder. Ñane tiémpope avei jahecha oikoha heta kámbio tuicháva. Upévare ikatu ñapensa: “Koʼág̃arupi ningo Ñandejára organisasión pyaʼeterei oavansa, ¿ikatu piko jajerovia Jesús ñanemoakã porãha?” (elee Mateo 23:10). Jaikuaa hag̃ua upéva iporãta jahecháramo mbaʼéichapa Jehová ogia ipuévlope ymave oikórõ guare heta kámbio.

5. ¿Mávandipa Josué ojotopa Jericó ypýpe?

⁵ Josuére oiko peteĩ mbaʼe ohaʼarõʼỹva, umi israelita okrusa riremírente pe rrío Jordán. Jericó ypýpe, haʼe ojotopa peteĩ kuimbaʼe orekóvandi peteĩ espáda. Josué oporandu pe kuimbaʼépe: “¿Nde piko reime ore ládo térã ore kontrário ládo?”. Josué oñesorprendete voi pe kuimbaʼe heʼíramo guare chupe haʼeha “ Jehová ehérsito prínsipe” oúva odefende hag̃ua ipuévlope (elee Josué 5:13-15 ha pe nóta). Jepe la Bíbliape heʼi heta pártepe Jehová voi oñeʼẽ hague Josuépe, katuete oiméne haʼe oipuru peteĩ ánhelpe oñeʼẽ hag̃ua chupe ojapo haguéicha heta vése ymave (Éx. 3:2-4; Jos. 4:1, 15; 5:2, 9; Hech. 7:38; Gál. 3:19).

6-8. a) ¿Mbaʼérepa umi israelita ikatu kuri opensa naisentidoiha umi instruksión omeʼẽva pe ánhel? b) ¿Mbaʼéichapa jaikuaa umi instruksión ideprovécho ha oñemeʼẽ hague itiempoitépe? (Ehecha avei pe nóta).

⁶ Pe ánhel heʼi Josuépe mbaʼépa ojapo vaʼerã ojagarra hag̃ua Jericó. Ñepyrũrã haʼete naisentídoiva kuri umi instruksión orresivíva. Por ehémplo, pe ánhel heʼi Josuépe osirkunsida hag̃ua entéro umi soldádope. Upéva heʼise haʼekuéra ndaikatumoʼãiha oñorairõ unos kuánto díare. ¿Oĩ porã piko raʼe oñesirkunsida umi kuimbaʼépe upe moméntope? (Gén. 34:24, 25; Jos. 5:2, 8).

⁷ Ikatu ningo umi soldádo opensa: “¿Mbaʼéicha piko ikatúta adefende che hentekuérape, umi enemígo oataka sapyʼárõ ore kampaménto?”. Péro upéi oiko peteĩ mbaʼe nohaʼarõietéva hikuái. Umi kuimbaʼe oikóva Jericópe oataka rangue umi israelítape okyhyje chuguikuéra. La Biblia heʼi: “Jericó rokẽ oñembotypaite umi israelita káusare, ndaipóri oikéva ni osẽva” (Jos. 6:1). Ko mbaʼe oikóva katuete oiméne oipytyvõ raʼe umi israelítape ojeroviave hag̃ua Jehováre.

⁸ Pe ánhel heʼi Josuépe ani hag̃ua oataka Jericó. Upéva rangue, haʼekuéra oguata vaʼerã pe siuda jerére 6 día pukukue unave káda día, ha pe día sieteha katu oguata vaʼerã ijerére siete vése. Umi soldádo ikatu kuri heʼi operdereitaha itiémpo ha ikaneʼõmbareitaha. Péro Israel líder, haʼekuéra ndaikatúiva ohecha, oikuaa porãiterei la ojapóva. Umi instruksión osegíva umi israelita omombareteve ijerovia, ha iñeʼẽrendu rupi hikuái natekotevẽi oñorairõ umi soldádo Jericogua imbaretetévandi (Jos. 6:2-5; Heb. 11:30). *

9. ¿Mbaʼérepa jasegi vaʼerã umi instruksión jarresivíva Ñandejára organisasióngui? Emoĩ peteĩ ehémplo.

⁹ ¿Mbaʼépa ikatu ñaaprende ko rrelátogui? Jehová organisasión sapyʼánte ikatu ojapo peteĩ mbaʼe anteve ndojapói vaʼekue, ha ikatu voi nañantendepái mbaʼérepa péicha koʼág̃a. Por ehémplo, ymave ikatu kuri ñapensa noĩporãiha jaipuru selulár ha távlet jajapo hag̃ua ñande estúdio personál, japredika hag̃ua térã rreunionhápe. Péro koʼág̃a jahechakuaa ideprovechoitereiha ñandéve. Jahecha jave umi mbaʼe porã jahupytýva koʼã kámbio rupive, jajerovia mbareteve ha ñaneunidove ñane ermáno ha ermanakuéra ndive.

10. ¿Mávapa ogia pe rreunión iñimportantetéva oreko vaʼekue pe Kuérpo Governánte?

¹⁰ Peteĩ karai ndahaʼéiva judío hérava Cornelio natekotevẽi vaʼekue oñesirkunsida oiko hag̃ua chugui kristiáno. Upéicharõ jepe, haimete 13 áño oiko rire upéva heta kristiáno judío omboʼe gueteri entéro oñesirkunsida vaʼerãha (Hech. 15:1, 2). Por ehémplo, umi ermáno Antioquiagua noñemoĩri kuri de akuérdo mbaʼépa la oĩ porãva ko kásope. Upévare, umi ansiáno ojerure Páblope oho hag̃ua pe Kuérpo Governánte rendápe oĩva Jerusalénpe oporandu hag̃ua upe témare. Péro, ¿mávapa añetehápe omomýi chupekuéra ojapo hag̃ua upéva? Pablo heʼi: “Che aha ñande Ruvicha oikuaauka rupi chéve aha vaʼerãha”. Jahechaháicha, Cristo ogia chupekuéra ikatu hag̃uáicha pe Kuérpo Governánte omyesakã mbaʼépa la oipotáva Ñandejára (Gál. 2:1-3).

11. a) ¿Mbaʼépa opensa vaʼekue heta kristiáno judío pe sirkunsisiónre? b) ¿Mbaʼéichapa Pablo orreaksiona umi ansiáno Jerusalengua omeʼẽrõ guare chupe peteĩ instruksión? (Ehecha avei pe nóta).

¹¹ Cristo odirihi pe Kuérpo Governántepe ontendeka hag̃ua enterovévape umi kristiáno ndahaʼéiva judío natekotevẽiha oñesirkunsida (Hech. 15:19, 20). Péro tiémpo rire, heta kristiáno judío osegi gueteri osirkunsida ifamíliape. Ha ndahaʼéi voi upéva añónte, umi ansiáno oĩva Jerusalénpe ohendu avei oñekomentaha Pablo ndorrespetaiha Moisés Léi. Upévare, umi ansiáno ojerure chupe ojapo hag̃ua peteĩ mbaʼe ohechaukátava orrespetaha pe Léi (Hech. 21:20-26). * Haʼekuéra heʼi Páblope oraha hag̃ua hendive pe témplope 4 kuimbaʼépe, péicha umi hénte ikatúta ohecha haʼe orrespetaha pe Léi. Pablo ikatu kuri opensa natekotevẽiha ojapo la ojeruréva hikuái, pórke la provléma ndahaʼéi haʼe síno umi kristiáno judío. Haʼekuéra ningo la nontendeséiva pe ojedesidímava kuri pe sirkunsisiónre. Pablo opensa rangue upéva, ohechakuaa umi ansiáno oipotanteha enterove ermáno iñunído ha upévare tekomirĩme ojapo la ojeʼéva chupe. Jesús ningo omeʼẽ vaʼekue hekove sakrifísioramo, upéicha rupi umi kristiáno noĩvéima kuri Moisés Léi poguýpe. Upévare  ikatu ñañeporandu mbaʼérepa Jesús oheja pe téma de la sirkunsisión osegi omoprovléma umi kristiánope hetaite tiémpore (Col. 2:13, 14).

12. ¿Mbaʼérepa posívlemente Cristo oheja ohasa tiémpo oñentende porã hag̃ua pe téma de la sirkunsisión?

¹² Heta vése ningo oraha tiémpo jajeadapta hag̃ua peteĩ entendimiénto pyahúpe. Upéicha avei, heta kristiáno judío mbeguekatúpemante oasepta kuri ohóvo noĩveimaha pe Léi poguýpe (Juan 16:12). Ijetuʼu vaʼekue chupekuéra ontende hag̃ua pe sirkunsisión ndahaʼeveimaha peteĩ señál ohechaukáva haʼekuéra haʼeha Ñandejára puévlo (Gén. 17:9-12). Oĩ katu okyhyjéva hapicha judío opersegírõ g̃uarã chupekuéra ndosegivéi haguére pe kostúmbre (Gál. 6:12). Péro kon el tiémpo, Cristo omeʼẽve chupekuéra instruksión ha upearã ojevale umi kárta oskrivívare apóstol Pablo (Rom. 2:28, 29; Gál. 3:23-25).

13. ¿Mbaʼépa ikatu ñanepytyvõ ñamombaʼe hag̃ua Cristo ñanemoakã haguére?

¹³ Koʼág̃arupi Cristo osegi omoakã pe kongregasión. Upévare, nañantendeporãiramo umi kámbio oikóva Ñandejára organisasiónpe, ñapensa vaʼerã Cristo omoakã lájare Jehová puévlope ymaite guive. Tahaʼe jepe Josué tiémpope térã umi apóstol tiémpope, Cristo arandúpe ogia vaʼekue Ñandejára puévlope oprotehe hag̃ua chupekuéra. Upéicha rupi ojerovia mbareteve ha iñunidove hikuái (Heb. 13:8).

14-16. ¿Mbaʼéichapa umi instruksión omeʼẽva “pe tembiguái jeroviaha ha iñarandúva” ohechauka Cristo ñanepytyvõha jasegi hag̃ua jajeroviave?

¹⁴ Koʼág̃a “pe tembiguái jeroviaha ha iñarandúva” ñandegia ñaikotevẽhaichaite ha itiempoitépe (Mat. 24:45). Péicha jahechakuaa Jesús ñanderayhu ha oñeinteresaha ñanderehe. Marc ningo peteĩ ermáno orekóva 4 ifamília. Haʼe heʼi: “Satanás oñehaʼã omokangy umi kongregasiónpe ha upearã oataka umi famíliape. Upévare, Ñandejára organisasión ñanemokyreʼỹ meme jajapo hag̃ua káda semána pe estúdio de família. Tekotevẽterei ningo umi omoakãva hogapy osegi ko instruksión ikatu hag̃uáicha oñangareko porã ifamíliare”.

¹⁵ Jahechakuaa jave mbaʼéichapa Cristo ñanemoakã, ñantende haʼe ñanepytyvõseha jasegi hag̃ua jajerovia mbarete. Por ehémplo, peteĩ ansiáno hérava Patrick heʼi: “Ñepyrũrã oĩ mimi kuri la oñedesanimáva, pórke roñembyaty umi grúpo michĩvévape rosẽ hag̃ua ropredika fin de semanakue”. Péro ko ermáno heʼi ko kámbio ohechaukaha Jesús ojepyʼapyha enterovére kongregasiónpe. Por ehémplo, heta ermáno ha ermána hiʼotĩva térã nosẽmeméi vaʼekue predikasiónpe oñandu oñemombaʼeha chupekuéra ha ikatuha ojapo hetave mbaʼe Jehová servísiope. Koʼã kámbio oipytyvõ umi ermánope omombareteve hag̃ua ijerovia.

¹⁶ Cristo ñanepytyvõ avei ñañemeʼẽmbaite hag̃ua predikasiónpe. Ko tembiapo hína pe iñimportantevéva ojejapóva ko yvy tuichakuére (elee Marcos 13:10). André haʼe peteĩ ansiáno oñenombra ramóva ha siémpre oñehaʼãva osegi umi instruksión pyahu oúva Jehová organisasióngui. Haʼe heʼi: “Koʼág̃arupi ningo saʼivéma umi ermáno ombaʼapóva sukursálpe, upéva ohechauka ñandéve mbaʼépa hína pe iñimportantevéva, ha tekotevẽha jajapo ikatúva guive predikasiónpe”.

17, 18. ¿Mbaʼérepa iporã jajepyʼamongeta mbaʼéichapa ideprovécho jajeadaptáramo umi kámbio oiko ramoitévape?

¹⁷ Jesucristo ogoverna hína kómo rréi ha ñandegia ikatu hag̃uáicha ñaĩ porã koʼág̃ama voi ha amo gotyove. Iporãta ñapensáramo mbaʼéichapa ideprovécho ñandéve jajeadapta rupi umi kámbio oiko ramoitévape. Por ehémplo, ñande estúdio de famíliape ikatu  jahecha mbaʼéichapa ñanepytyvõ umi kámbio ojejapo vaʼekue ñane rreunionkuérape ha japredika lájape.

¹⁸ Ñapensa meméramo mbaʼeichaitépa ideprovécho umi instruksión omeʼẽva Jehová organisasión, ifasilvéta ñaneñeʼẽrendu hag̃ua ha javyʼavéta. Por ehémplo, koʼág̃a saʼive oñeimprimi umi puvlikasión, upéicha rupi tuichaiterei ojeaorra. Avei ojepuruve selulár ha távlet, upévare pe marandu porã ikatu og̃uahẽ hetave persónape. ¿Ikatúpa jaipuruve umi puvlikasión elektrónika ha umi archívo multimédia? Jajapóramo upéva, ñapensa hína Jesús opensaháicha. Haʼe ningo oipota ojepuru hekoitépe umi mbaʼe orekóva Ñandejára organisasión.

19. ¿Mbaʼérepa jaheja vaʼerã Cristo ñandegia?

¹⁹ Jahejáramo Cristo ñanemoakã, ñaipytyvõ umi ermánope ojerovia ha iñunidove hag̃ua. Koʼág̃arupi saʼive umi ombaʼapóva Betélpe. André opensávo ko mbaʼére heʼi: “Ahechávo mbaʼéichapa heta betelita ojeadapta porã umi kámbiore, chepytyvõ ajeroviave hag̃ua Crístore ha amombaʼeve hag̃ua koʼã ermánope. Haʼekuéra ningo ovyʼa oimeraẽ asignasión orresivívare Ñandejára puévlope ha oñehaʼã oho Jehová kárro selestiál ohoha gotyo”.

20, 21. a) ¿Mbaʼérepa ikatu jajerovia ñande Líder Crístore? b) ¿Mbaʼe porandúpa ñambohováita pe artíkulo oúvape?

²⁰ Og̃uahẽ potaitéma hína pe tiémpo ñande Líder Jesucristo “omohuʼã hag̃ua iñorairõ” ha ojapo hag̃ua “heta mbaʼe tuichaitereíva” (Apoc. 6:2; Sal. 45:4). Koʼág̃ama voi haʼe ñandeprepara ikatu hag̃uáicha jaiko pe múndo pyahúpe ha jajapo hag̃ua umi tembiapo oĩtava upépe. Upérõ ñaipytyvõta umi oñemoingove jeývape ha ñambaʼapóta oiko hag̃ua ko yvýgui peteĩ paraíso.

²¹ Toiko la oikóva, ñande jajerovia ñande Líder rehe. Haʼe ñandegia hína jaike hag̃ua pe múndo pyahúpe (elee Salmo 46:1-3). Ikatu ijetuʼu jajeadapta hag̃ua umi kámbio oikóvare ñane tiémpope, koʼýte ñandeafektáramo direktoite ha oimérire nañahaʼarõi raʼe. Oikóramo upéva ñanderehe, ¿mbaʼéichapa ikatu jasegi ñandepyʼaguapy ha jajerovia mbarete Jehováre? Ko porandu ñambohováita pe artíkulo oúvape.